ខ្សែប្រយុទ្ធជនជាតិកាណាដា កីឡាករ Marcus Haber កំពុងប្រកបអាជីពនៅក្លិបបាល់ទាត់វិសាខា បានសម្ដែងការអបអរសាទរ និងមានមោទនភាពខ្លាំង ពីរាជធានីភ្នំពេញ ទៅកាន់ក្រុមបាល់ទាត់ជម្រើសជាតិនារី របស់ប្រទេសខ្លួន ដែលដណ្ដើមបានមេដាយមាស ក្នុងការប្រកួតកីឡាអូឡាំពិក នៅទីក្រុងតូក្យូ ឆ្នាំ២០២០ ក្នុងប្រទេសជប៉ុន កាលពីថ្មីៗនេះ។
នៅលើកម្មវិធីទូរសព្ទដៃ (App) របស់ក្លិបវិសាខា កីឡាករ Marcus បាននិយាយថា៖«ខ្ញុំពិតជាមានមោទនភាព ក្នុងនាមជាជនជាតិកាណាដា ហើយមានមោទនភាពខ្លាំងណាស់ ដែលបានឃើញក្រុមបាល់ទាត់ជម្រើសជាតិនារីកាណាដា ដណ្ដើមបានសមិទ្ធផលដ៏ធំសម្រាប់ប្រទេសជាតិរបស់ខ្ញុំ ក្នុងការដណ្ដើមបានមេដាយមាសកីឡាអូឡាំពិក។ ពួកគាត់បានបង្កើតប្រវត្តិសាស្ដ្រថ្មី ហើយខ្ញុំអាចនិយាយបានថា ពួកគាត់ជាជើងឯកជារៀងរហូត»។
អតីតសមាជិកក្រុមជម្រើសជាតិកាណាដា ផ្នែកបុរសរូបនេះបន្ថែមថា៖«បច្ចុប្បន្នវិស័យកីឡាបាល់ទាត់កាដាណា មានការប្រកួតប្រជែងខ្លាំង ទាំងបាល់ទាត់បុរស និងនារី ហើយក្រុមទាំងពីរ សុទ្ធតែមានកីឡាករ-កីឡាការិនីល្អៗ កំពុងលេងតាមលីគកំពូលលើពិភពលោក។ កីឡាករទាំងអស់គ្នា ពិតជាជឿថា ពួកគាត់អាចសម្រេចសមិទ្ធផលបាន ។ ដូច្នេះខ្ញុំជឿជាក់ថា អនាគតបាល់ទាត់របស់កាណាដា គឺភ្លឺស្វាងមែនទែន»។
ក្រុមបាល់ទាត់ជម្រើសជាតិនារី កាណាដា បានឈ្នះមេដាយមាសប្រភេទកីឡាបាល់ទាត់នារី បន្ទាប់ពីយកឈ្នះក្រុមជម្រើសជាតិនារីស៊ុយអែត ក្នុងវគ្គផ្ដាច់ព្រ័ត្រ ដោយការទាត់បាល់ប៉េណាល់ទីកាត់សេចក្ដី ៣-២ បន្ទាប់ពីប្រកួត ៩០នាទីស្មើគ្នា ១-១ ហើយបានរក្សាលទ្ធផលស្មើគ្នានេះ រហូតចប់ម៉ោងបន្ថែម១៥នាទី ២ដង ។
ក្រោយបញ្ចប់ព្រឹត្តិការណ៍កីឡាអូឡាំពិកឆ្នាំ២០២០ នៅប្រទេសជប៉ុន ត្រឹមល្ងាចថ្ងៃអាទិត្យ ទី៨ ខែសីហា ឆ្នាំ២០២១ នេះប្រទេសកាណាដា បានឈរលេខរៀងទី១១ ក្នុងតារាងចំណាត់ថ្នាក់ប្រទេសដែលឈ្នះមេដាយ បានច្រើនជាងគេ ក្រោយដណ្ដើមបានមេដាយសរុប ២៤គ្រឿង រួមមានមេដាយមាស ៧ ប្រាក់ ៦ និងសំរឹទ្ធ ១១៕
