កីឡាករនីហ្សេរីយ៉ា Okereke Timothy ជាកីឡាករទី៣ ហើយដែលប្រកាសជាសាធារណៈក្នុងទីផ្សារដោះដូរជើងទី២ នៃពានរង្វាន់លីគកំពូលកម្ពុជា Metfone Cambodian League 2021 (MCL) ខណៈកីឡាកររូបមុនគេគឺខ្សែប្រយុទ្ធប្រេស៊ីល Cristian Alex និងខ្សែប្រយុទ្ធកូរ៉េខាងត្បូង Lee Jae Gun របស់ក្រុមវិសាខា។
កីឡាករ Okereke Timothy បានធ្វើដំណើរមកកាន់ប្រទេសកម្ពុជា ដំបូងនៅឆ្នាំ២០១៥ ជាមួយក្រុម CMAC FC ហើយឆ្នាំ២០១៧ រូបគេបានប្តូរទៅចូលរួមក្រុម Cambodia Tiger FC (បច្ចុប្បន្នប្តូរឈ្មោះមកជា Angkor Tiger FC) ហើយនៅឆ្នាំ២០១៨ ជើងទី១ បានចូលរួមជាមួយក្រុមអាស៊ីអឺរ៉ុប នៅជើងទី១ ខណៈជើងទី២រូបគេបានចូលរួមក្នុងក្រុមUITM នៅលីគទី២របស់ម៉ាឡេស៊ី ហើយឆ្នាំ២០១៩ បានចូលរួមជាមួយអង្គរថាយហ្គឺរ សារជាថ្មី ខណៈឆ្នាំ២០២០ ផ្ទេរទៅកាន់ភ្នំពេញក្រោន។
ទីផ្សារដោះដូរកីឡាករក្នុងពានរង្វាន់លីគកំពូលកម្ពុជារដូវកាល២០២១ ជើងទី២ ចាប់ផ្ដើមបើកទ្វាពីថ្ងៃពុធ ទី២១ ខែកក្កដា ឆ្នាំ២០២១ តទៅហើយ ដែលរយៈពេលប្រមាណ១ខែ ដើម្បីឱ្យក្លិបទាំង១៣អាចបន្ថែម ឬ ដកសមាជិកចេញត្រៀមខ្លួនប្រកួតប្រជែងពាក់កណ្ដាលរដូវកាលទៀតដែលនៅសេសសល់។
អត្ថបទពាក់ព័ន្ធ៖ទីផ្សារដោះដូរកីឡាករក្នុងលីគកំពូលកម្ពុជា ជុំទី២បើកទ្វារយៈពេល១ខែ
យោងតាមរយៈលិខិត១៧៨/២១ គ.ប្រ.ប.ជ.ក ចុះថ្ងៃអង្គារទី២៩ខែមិថុនាឆ្នាំ២០២១ កន្លងទៅរបស់គណកម្មការរៀបចំការប្រកួតបាល់ទាត់កម្ពុជា (CNCC) បញ្ជាក់ថាទីផ្សារដោះដូរកីឡាករនៅកម្ពុជា ជើងទី២ ចាប់ផ្ដើមពីថ្ងៃទី២១ ខែកក្កដា ដល់ថ្ងៃទី២០ ខែសីហា ឆ្នាំ២០២១ ដោយ ក្លិបនីមួយៗ អាចធ្វើការដោះដូរកីឡាកររបស់ខ្លួនបានចំនួន៥នាក់ ដែលក្នុងនោះមានកីឡាករខ្មែរចំនួន៣នាក់ និងកីឡាករបរទេសចំនួន២នាក់ផងដែរ៕
