លោក Majid Rashed ប្រធានគណៈកម្មាធិការប៉ារ៉ាឡាំពិកអាស៊ី (APC) បានផ្ញើលិខិតថ្លែងនូវអំណរគុណយ៉ាងជ្រាលជ្រៅបំផុត ជូនចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឯកភាព ទទួលធ្វើជាម្ចាស់ផ្ទះរៀបចំការប្រកួតកីឡាយុវជនអាស៊ីប៉ារ៉ាហ្គេម លើកទី៦ (6 Asian Youth Para Games) បន្ទាប់ពីការរៀបចំការប្រកួតកីឡាយុវជនអាស៊ីហ្គេម លើកទី៥ (5 Asian Youth Games) នាឆ្នាំ២០២៩។
យោងតាមលិខិតចុះថ្ងៃទី០៨ ខែមករា ឆ្នាំ២០២៤ គោរពផ្ញើជូនសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងមកកាន់គណៈកម្មាធិការជាតិប៉ារ៉ាឡាំពិកកម្ពុជា និង គណៈកម្មាធិការជាតិអូឡាំពិកកម្ពុជា និងបានបញ្ជាក់ថា គណៈកម្មាធិការប៉ារ៉ាឡាំពិកអាស៊ី សមាជិកក្រុមប្រឹក្សាភិបាល គណៈប្រតិបត្តិ និងមន្ត្រីគ្រប់គ្រងគ្រប់ឋានានុក្រមទាំងអស់ បានបង្ហាញនូវមនោសញ្ចេតនារំភើបរីករាយ យ៉ាងជ្រាលជ្រៅបំផុត ដែលកម្ពុជា បានឯកភាព ទទួលធ្វើជាម្ចាស់ផ្ទះរៀបចំការប្រកួតកីឡាយុវជនអាស៊ីប៉ារ៉ាហ្គេម លើកទី៦ (6 Asian Youth Para Games) បន្ទាប់ពីការរៀបចំការប្រកួតកីឡាយុវជនអាស៊ីហ្គេម លើកទី៥ (5 Asian Youth Games) នាឆ្នាំ២០២៩។
គណៈកម្មាធិការប៉ារ៉ាឡាំពិកអាស៊ី ប្ដេជ្ញាសហការយ៉ាងជិតស្និទ្ធជាមួយ រាជរដ្ឋាភិបាលកម្ពុជា គណៈកម្មាធិការ ជាតិប៉ារ៉ាឡាំពិកកម្ពុជា គណៈកម្មាធិការជាតិអូឡាំពិកកម្ពុជា គណៈកម្មាធិការជាតិរៀបចំការប្រកួត និងភាគីពាក់ព័ន្ធ ទាំងអស់ ដើម្បីរៀបចំព្រឹត្តិការណ៍កីឡាអាស៊ីប៉ារ៉ាហ្គេម ប្រកបដោយគុណវឌ្ឍន៍ និងទទួលបាននូវមហាជោគជ័យជា ប្រវត្តិសាស្ត្រសម្រាប់តម្កល់ចលនាប៉ារ៉ាឡាំពិកកាន់តែប្រសើរឡើងក្នុងតំបន់អាស៊ី។
លោក Majid Rashed ប្រធានគណៈកម្មាធិការប៉ារ៉ាឡាំពិកអាស៊ី នឹងអញ្ជើញមកធ្វើ ទស្សនកិច្ចនៅព្រះរាជាណាចក្រកម្ពុជា នាខែមីនា ឆ្នាំ២០២៤ ដើម្បីស្នើសុំជួបសម្ដែងការគួរសមជាកិត្តិយស ដ៏ខ្ពង់ខ្ពស់បំផុតជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា និងចុះហត្ថលេខាជាផ្លូវការជាមួយភាគីកម្ពុជា លើកិច្ចព្រមព្រៀងអនុស្សរណៈសហការយោគយល់គ្នាក្នុងការ ទទួលសិទ្ធិធ្វើជាម្ចាស់ផ្ទះរៀបចំព្រឹត្តិការណ៍កីឡាយុវជនអាស៊ីប៉ារ៉ាហ្គេមលើកទី៦ ឆ្នាំ២០២៩ នៅរាជធានីភ្នំពេញ៕