ក្រុមបាល់ទាត់មជ្ឍមណ្ឌលកងយោធពលខេមរភូមិន្ទ (ទ័ព) បានប្រកាសបង្ហាញសមាជិកថ្មីជាខ្សែប្រយុទ្ធជនជាតិកូរ៉េខាងត្បូង ១រូបទៀត នៅថ្ងៃព្រហស្បត្តិ៍ ទី១២ ខែសីហា ឆ្នាំ២០២១ ក្នុងទីផ្សារដោះដូរកីឡាករសម្រាប់ជើងទី២ នៃពានរង្វាន់លីគកំពូលកម្ពុជា Metfone Cambodian League 2021។
កីឡាករចំណូលថ្មីរូបនេះមានឈ្មោះថា Ha Chanyoung វ័យ២០ឆ្នាំ ដែលផ្លាស់ចេញពីក្លិប Tatran Liptovsky Mikulas សមាជិកលីគទី២ ប្រទេសស្លូវ៉ាគី។ កីឡាកររូបនេះជាយុវជននៅក្រុម Daejeong C Youth ហើយនៅឆ្នាំ២០១៨-១៩ រូបគេបានទៅចូលរួមក្រុម Osan HS នៅស្រុកកំណើតខណៈនៅថ្ងៃទី១១ ខែកុម្ភៈ ឆ្នាំ២០២០ រូបគេបានចេញទៅចូលរួមក្រុមTatran Liptovsky Mikulas U19 នៅប្រទេសស្លូវ៉ាគី មុនតំឡើងចូលក្រុមធំនៅថ្ងៃទី១ខែ កក្កដា ឆ្នាំ២០២០។
អត្ថបទពាក់ព័ន្ធ៖MCL៖Okereke Timothy ជាកីឡាករទី៣ដែលប្រកាសជាសាធារណៈក្នុងទីផ្សារដោះដូរជើងទី២
នៅមិនទាន់មានដំណឹងច្បាស់ការនៅឡើយពីក្រុមទ័ព ថានឹងត្រូវជម្រុះកីឡាករបរទេសណាចេញនោះទេ ក្នុងចំណោមកីឡាករទាំង៥រូបដែលស្ថិតក្នុងបញ្ជីដែលមានស្រាប់ ដូចជាកីឡាករប្រេស៊ីល Romário ម្ចាស់ស្បែកជើងមាសឆ្នាំ២០១៤ Dzarma Bata កីឡាករជប៉ុន Rio Sakuma និង Yuta Kikuchi និងកីឡាករប្រេស៊ីល Cristiano Sergipano។
សូមបញ្ជាក់ថាទីផ្សារដោះដូរកីឡាករនៅកម្ពុជា ជើងទី២ ចាប់ផ្ដើមពីថ្ងៃទី២១ ខែកក្កដា ដល់ថ្ងៃទី២០ ខែសីហា ឆ្នាំ២០២១ ដោយ ក្លិបនីមួយៗ អាចធ្វើការដោះដូរកីឡាកររបស់ខ្លួនបានចំនួន៥នាក់ ដែលក្នុងនោះមានកីឡាករខ្មែរចំនួន៣នាក់ និងកីឡាករបរទេសចំនួន២នាក់ផងដែរ៕
