ភ្នំពេញ៖ កុមារប្រមាណ ៣ សែននាក់ក្នុងនោះសិស្សស្រីមានជាង៤៩% បានអាហារទទួលទានចំនួនពីរពេលក្នុងមួយថ្ងៃ គឺនៅពេលព្រឹក និងពេលថ្ងៃត្រង់ ដែលការផ្តល់អាហារដល់កុមារនេះធ្វើឡើងតាមរយៈកម្មវិធីផ្ដល់អាហារតាមសាលារៀនរបស់ក្រសួងអប់រំ ដែលបាននិងកំពុងបន្តនៅឆ្នាំ២០២៤នេះ។ នេះបើតាមការបញ្ជាក់ពីលោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា កាលពីថ្ងៃទី២៤ ខែមករា ឆ្នាំ២០២៤។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។
អ្នកនាំពាក្យក្រសួងអប់រំបញ្ជាក់ថា កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍នេះ បាននឹងកំពុងអនុវត្តនៅតាមសាលាបឋមសិក្សា ដែលស្ថិតក្នុងខេត្តគោលដៅចំនួន ១០ មានខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ចាម កំពង់ធំ សៀមរាប ព្រះវិហារ ឧត្តរមានជ័យ និងស្ទឹងត្រែង។ កម្មវិធីផ្តល់អាហារនេះគ្របដណ្តប់លើសាលារៀនគោលដៅដែលជួបបញ្ហាខ្វះខាតចំនួន ១ ១១៤សាលា។ ដោយសាលារៀនគោលដៅដែលប្រើប្រាស់ថវិការដ្ឋគិតត្រឹមឆ្នាំ២០២៤ មាន៥៥៣សាលា និងសាលារៀនប្រើប្រាស់ថវិកាកម្មវិធីស្បៀងអាហារពិភពលោកមាន ៥៦១សាលា។
ទិដ្ឋភាពសិស្សមកទទួលអាហារទទួលទានមុនចូលរៀន។រូបភាពពី ក្រសួងអប់រំ។
លោកជំទាវ ឃួន វិច្ឆិកា បន្ថែមទៀតថា កម្មវិធីផ្តល់អាហារដល់កុមារដែលមានជីវភាពខ្វះខាតនេះ មិនត្រឹមតែបានជួយជំរុញអត្រាចុះឈ្មោះចូលរៀនរបស់សិស្សបានកាន់តែច្រើននោះទេ ថែមទាំងបានកាត់បន្ថយអត្រានៃការបោះបង់ចោលការសិក្សារបស់សិស្សថែមទៀតផង។ ពិសេសសិស្សទទួលបានសុខភាពល្អបរិបូរណ៍សម្បូរអាហារូបត្ថម្ភ ខណៈម្ហូបអាហារដែលយកមកចម្អិនជូនសិស្សសុទ្ធសឹងជាកសិផលក្នុងភូមិស្រុកនៅតំបន់នោះ។
ទិដ្ឋភាពសិស្សទទួលទានអាហារមុនចូលរៀន។រូបភាពពី ក្រសួងអប់រំ។
បន្ថែមពីនេះ កម្មវិធីផ្ដល់អាហារតាមសាលារៀនក៏បានជួយរួមចំណែកជួយលើកកម្ពស់ការដាំដុះរបស់ប្រជាកសិករក្នុងភូមិស្រុកផងដែរ ព្រោះសាលាបានប្រមូលទិញផលិតផលកសិកម្មពីពលរដ្ឋដែលអាចបង្កើនប្រាក់ចំណូលដល់កសិករផងដែរ។ មិនត្រឹមតែប៉ុណ្ណោះ កម្មវិធីនេះបានជួយពង្រីកស្មារតីរបស់មាតាបិតាឬអាណាព្យាបាលសិស្សឱ្យចូលរួមគាំពារក្នុងការជំរុញដល់កូនៗមកចូលរៀនបានកាន់តែប្រសើរជាងមុន។
ទិដ្ឋភាពសិស្សទទួលទានអាហារមុនចូលរៀន។រូបភាពពី ក្រសួងអប់រំ។
កម្មវិធីស្បៀងអាហារពិភពលោក(WFP) ធ្លាប់បានលើកឡើងថា កម្មវិធីផ្តល់ស្បៀងអាហារតាមសាលារៀននៅកម្ពុជានេះ ត្រូវបានដាក់បញ្ចូលក្នុងក្របខ័ណ្ឌគោលនយោបាយជាតិអប់រំ និងក្របខ័ណ្ឌគោលនយោបាយគាំពារសង្គមក្នុងគោលបំណងលើកកម្ពស់ការអភិវឌ្ឍធនធានមនុស្សតាមការលើកកម្ពស់លទ្ធភាពទទួលបានការអប់រំ សម្រាប់កុមារថ្នាក់មត្តេយ្យ និងបឋមសិក្សា។ ការលើកកម្ពស់អាហារូបត្ថម្ភ និងសុខភាពរបស់សិស្សានុសិស្ស និងជួយឱ្យពួកគេបានហូបឆ្អែតមួយរយៈពេលក៏ដូចជា ជួយផ្តល់នូវសំណាញ់សុវត្ថិភាពដល់ក្រុមគ្រួសារ ដែលងាយរងគ្រោះ តាមរយៈកម្មវិធីផ្ទេរប្រាក់។
ម្ហូបអាហារដែលផ្តល់ជូនសិស្សទទួលទាន។រូបភាពពីក្រសួងអប់រំ។
ដោយឡែក ចាប់តាំងពីដើមឆ្នាំ ២០២០ មក KOICA បានគាំទ្រកម្មវិធីផ្ដល់ស្បៀងអាហារនៅតាមសាលារៀននៅខេត្តកំពង់ធំ កំពង់ឆ្នាំង និងពោធិ៍សាត់ ដោយផ្តល់មូលនិធិសរុបចំនួន ១០ លានដុល្លារក្នុងរយៈពេល ៤ ឆ្នាំ។ ជំនួយនេះបានអនុញ្ញាតឱ្យមានការសាងសង់ផ្ទះបាយ កន្លែងទទួលទានអាហារ និងហេដ្ឋារចនាសម្ព័ន្ធទឹកស្អាត និងអនាម័យនៅតាមសាលារៀនជាច្រើន ដើម្បីសម្រួលដល់ការផ្ដល់អាហារតាមសាលារៀនប្រកបដោយសុវត្ថិភាព អនាម័យ និងមានប្រសិទ្ធភាព។
ទិដ្ឋភាពសិស្សមកទទួលអាហារទទួលទានមុនចូលរៀន។រូបភាពពី ក្រសួងអប់រំ។
ចំណែកទំព័រហ្វេសប៊ុករបស់ក្រសួងអប់រំវិញលើកឡើងថា កម្មវិធីផ្តល់អាហារតាមសាលារៀននេះ បានរួមចំណែកកម្ពស់គុណភាពអប់រំ ដោយផ្ដោតលើការពង្រឹងគុណភាពគ្រឹះស្ថានសិក្សារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈការពង្រឹងកិច្ចការសំខាន់ៗ រួមមាន៖
ទី១. ការពង្រឹងអភិបាលកិច្ចសាលារៀន ទី២. ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស ទី៣. ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យ គុណភាពចំណីអាហារនៅតាមសាលារៀន និងទី៤. ការជំរុញ និងលើកទឹកចិត្ត ការចូលរួមរបស់មាតាបិតា អ្នកអាណាព្យាបាល និងសហគមន៍ក្នុងការអប់រំ ស្របតាមពាក្យស្លោក “ភាពជាដៃគូរដ្ឋ និងសហគមន៍ ដើម្បីការអប់រំ” ៕