ភ្នំពេញ៖ លោកឧកញ៉ា សឹង ចាតវិជ្ជា ស្ថាបនិកនិងជាសមាជិកក្រុមប្រឹក្សាភិបាលដាវីដាកម្ពុជា បាននិយាយនៅចំពោះមុខកងទ័ពអ្នកសារព័ត៌មានថា ក្រុមហ៊ុនរបស់លោកបានគម្រោងចំណាយទុនដល់ទៅ១លានដុល្លារ ក្នុងការបើកទ្វាររោងចក្រផលិតនិងវេចខ្ចប់គ្រឿងសំអាងកម្រិតស្ដង់ដារកូរ៉េ ដើម្បីជួយសម្រួលដល់ម្ចាស់ប្រេនដែលចង់បង្កើតផលិតផលថ្មី ដោយមិនបាច់ពេលវេលាឡើងទៅផលិតនៅបរទេសទៀត។
ក្រុមហ៊ុន ដាវីដាកម្ពុជា គឺជាបុត្រសម្ព័ន្ធរបស់ក្រុមហ៊ុន ដាវីដាកូរ៉េ មានបទពិសោធន៍ជាង៣០ឆ្នាំ(៣៥ឆ្នាំ)ទៅលើការផលិត និងស្រាវជ្រាវគ្រឿងសម្អាង។ បច្ចុប្បន្ននេះ ដាវីដាទទួលបានការបញ្ជាទិញពីអតិថិជន វៀតណាម កម្ពុជា ម៉ុងហ្គោលី ថៃ អាមេរិក ជាដើម។
ការបើកកាត់ខ្សែបូរក្រហមបើកទ្វាររោងចក្រដាវីដាកម្ពុជាលោកឧកញ៉ា សឹង ចាតវិជ្ជា ប្រាប់ពីគោលបំណងនិងការតាំងចិត្តផលិតនូវគ្រឿងសម្អាងដែលមានគុណភាពខ្ពស់សម្រាប់ផ្គត់ផ្គង់នៅក្នុងស្រុក ដើម្បីកាត់បន្ថយការនាំចូលគ្រឿងសម្អាងពីបរទេសថា ដាវីដានៅកម្ពុជាគឺមានសេវាកម្ម ៣ ធំៗដូចជា ទី១. ការផលិតគ្រឿងសំអាងដោយនាំយកនូវវត្ថុធាតុពីក្នុងស្រុកមកផលិត ទី២.ការវេចខ្ចប់គ្រឿងសំអាង និងទី៣.គឺការនាំចូលប្រេនដ៏ល្បីៗពីប្រទេសកូរ៉េ ដែលក្រុមហ៊ុនដាវីដាកម្ពុជានឹងជួយសម្រួលជូនដល់ពាណិជ្ជករទាំងអស់។
លោកឧកញ៉ា សឹង ចាតវិជ្ជា បន្តថា ហើយតាមការស្រាវជ្រាវប្រមូលទិន្ន័យបឋមបានឱ្យឃើញថា កម្ពុជាចំណាយលើការនាំចូលប្រភេទគ្រឿងសំអាងពីបរទេសដល់ទៅ ១៥០ លានដុល្លារក្នុងមួយឆ្នាំ។ មួយវិញទៀតលោកសម្លឹងឃើញថា ប្រទេសខ្លះបាននាំវត្ថុធាតុដើមចេញពីប្រទេសកម្ពុជាទៅផលិត ចុះហេតុអ្វីក៏កម្ពុជាមិនបង្កើតរោងចក្រផលិតដោយខ្លួនឯង?។ ដោយសារតែរូបលោកផ្ទាល់ជាសហគ្រិនមួយដែលតែងតែស្រឡាញ់ពាក្យស្លោកខ្មែរមួយនិយាយថា «ខ្មែរធ្វើបាន» ទើបជាហេតុធ្វើឱ្យលោកចាយទុនដើម្បីបើករោងចក្រវេចខ្ចប់គ្រឿងសំអាងកម្រិតស្ដង់ដារកូរ៉េដែលធ្លាប់មានបទពិសោធន៍មកជាច្រើនឆ្នាំ។
លោកឧកញ៉ា ក៏បានបន្ថែមថា ដំណើរការបើករោងចក្រដាវីដានៅកម្ពុជាបាន៩០% ទៅលើផែនវេចខ្ចប់ដែលចំណាយប្រាក់ទុនដល់ទៅ ៥០ ម៉ឺនដុល្លារក្នុងការសាងសង់រោងចក្រ ហើយចំពោះផែនធំរបស់ក្រុមហ៊ុនទាំងការផលិត និងនាំវត្ថុធាតុដើមពីក្នុងស្រុកមកផលិតជាគ្រឿងសំអាង គឺគ្រោងចំណាយដល់ទៅ ១ លានដុល្លារ។ លោកតាំងចិត្តថា ដាវីដាកម្ពុជានឹងផលិតនូវគ្រឿងសម្អាងដែលមានគុណភាពខ្ពស់សម្រាប់ផ្គត់ផ្គង់ដល់ពលរដ្ឋកម្ពុជា ដើម្បីកាត់បន្ថយការនាំចូលគ្រឿងសម្អាងពីក្រៅប្រទេស។
លោកឧកញ៉ា សឹង ចាតវិជ្ជា បានសង្កត់ធ្ងន់ថា គោលបំណងធំដែលលោកហ៊ានបើករោងចក្រវេចខ្ចប់គ្រឿងសំអាងដ៏ធំនៅកម្ពុជានេះ ក៏ព្រោះតែលោកចង់ឱ្យអ្នកប្រើប្រាស់គ្រឿងសំអាងនៅកម្ពុជា ងាកមកគាំទ្រផលិតផលនៅក្នុងស្រុកដែលស្របតាមការប្រកាសរបស់ក្រសួងសុខាភិបាលដោយគិតទៅលើ គុណភាព សុវត្ថិភាព និងប្រសិទ្ធភាព។
សូមជម្រាបថា សព្វថ្ងៃនេះ ក្រុមហ៊ុនដាវីដានៅកម្ពុជាបានបញ្ចេញផលិតផលដែលមានគុណភាព និងស្ដង់ដារអន្តរជាតិនៅលើទីផ្សាររួចមកហើយរួមមាន Winter, K-GLOW និង Toner pad Vitamin-C ជាដើម។ ដាវីដាប្ដេជ្ញាផ្ដល់ជូនអតិថិជននូវគុណភាព គុណតម្លៃ ផលិតផលសុទ្ធមានស្ដង់ដារអន្តរជាតិ១រយភាគរយ៕
