បើទោះជាការប្រកួតតានតឹងប្រជែងកៅអីកំពូលពានរង្វាន់លីគកំពូលកម្ពុជា Cambodian Premier League 2023-24 ក្នុងសប្ដាហ៍ទី២០ក្តី ប៉ុន្តែក្រុមភ្នំពេញក្រោន ម្ចាស់ជើងឯក៧សម័យនឹងទៅប្រកួតលើទឹកដីនៃខេត្តស្វាយរៀងដោយអវត្តមានគ្រូបង្វឹកលើទីលាន។
លោក Oleg Starynskyi គ្រូបង្វឹកជនជាតិអ៊ុយក្រែន របស់ភ្នំពេញក្រោន ត្រូវពិន័យមិនអោយចូលទីលានចំនួន១ប្រកួត ក្នុងសប្ដាហ៍ទី២០ ពោលគឺនៅក្រោយលោកត្រូវពិន័យកាតលឿងលើកទី៦ ទល់ក្រុមបឹងកេត ចុងសប្ដាហ៍កន្លងទៅ នៃសប្ដាហ៍ទី១៨ លើទីលានកីឡដ្ឋាន Smart RSN Stadium។
ការពិន័យកាតលឿងទាំង៦សន្លឹករបស់លោក Oleg Starynskyi មាន៖
លើកទី១៖ សប្ដាហ៍ទី២ ទល់ព្រះខ័នរាជស្វាយរៀង
លើកទី២៖ សប្ដាហ៍ទី៤ ទល់ណាហ្គាវើល
លើកទី៣៖ សប្ដាហ៍ទី១០ ទល់បឹងកេត
លើកទី៤៖ សប្តាហ៍ទី១៤ ទល់វិសាខា
លើកទី៥៖ សប្តាហ៍ទី១៥ ព្រះខ័នរាជស្វាយរៀង
លើកទី៦៖ សប្ដាហ៍ទី១៩ ទល់បឹងកេត
ទោះបីជាអវត្តមានលោក Oleg ក្ដីក៏ប៉ុន្តែភ្នំពេញក្រោន នៅមានលោក លី ហៀង ជាអគ្គលេខាធិកា លោក កែវ សុខង៉ន់ ជាអ្នកចាត់ការក្រុម និងលោក គិម កាស៊ី ជាលេខាធិការ លោក ANATOLII BONDARENKO ជនជាតិអ៊ុយក្រែន ជាជំនួយការគ្រូបង្វឹក លោក ARTHUR FRANCK PLANCHENAULTជនជាតិបារាំង ជាគ្រូ Fitness លោក ខេង រស្មី ជាគ្រូចាំទី លោក គឹម លាបហ្វុង ជាគ្រូជំនួយ លោក វ៉ិន វណ្ណៈ ជាគ្រូជំនួយ និងលោក BAUDRIT Florian Mathieu ជនជាតិបារាំង ជានាយកបច្ចេកទេស។
ក្រុមព្រះខ័នរាជស្វាយរៀង កំពុងត្រូវការពិន្ទុបន្ថែមជាបន្តដើម្បីរក្សាកៅអីកំពូលតារាង CPL រដូវកាលនេះ ដែលមាន៤៧ពិន្ទុក្នុងដៃ ស្របពេលដែលក្រុមភ្នំពេញក្រោន ដែលឈរលេខ២ក៏ត្រូវការពិន្ទុបន្ថែម ដើម្បីប្រជែងពិន្ទុ ការពារតំណែងជើងឯកផងដែរ ព្រោះបច្ចុប្បន្នមាន៤៥ពិន្ទុតាមពីក្រោយ និងដាច់ពីក្រុមលេខ៣វិសាខា ដែលកំពុងកាន់៣៥ពិន្ទុ គិតត្រឹមសប្ដាហ៍ទី១៩នេះ។
ចំពោះប្រកួតជក់ចិត្តរវាងព្រះខ័នរាជស្វាយរៀង ទទួលភ្នំពេញក្រោន ក្នុងសប្ដាហ៍ទី២០ ត្រូវនឹងជុំទី៣ នៃពានរង្វាន់ CPL នឹងធ្វើឡើងនៅវេលាម៉ោង៦ល្ងាច លើទីលានកីឡដ្ឋានស្វាយរៀង ថ្ងៃទី៤ ខែកុម្ភៈ ឆ្នាំ២០២៤។ ចំណែកឯសំបុត្រចូលទស្សនាផ្ទាល់មាន២ជម្រើស ក្នុងនោះ CAT A តម្លៃ៦ពាន់រៀល និង CAT B តម្លៃ ៤ពាន់រៀល៕