តារាចម្រៀងរូបសង្ហាអតីតតារាចម្រៀង-តារាសម្ដែងប្រចាំផលិតកម្មហង្សមាស និងរស្មីហង្សមាស ដួង វីរៈសិទ្ធ ថ្មីត្បិតតែបានចាកចេញពីទ្រនំចាស់ ទៅជ្រកក្រោមទ្រនំថ្មីផលិតកម្មរាមក៏ពិតមែន ប៉ុន្តែស្នាដៃរបស់លោកមួយចំនួននៅមានបញ្ចាំងនិងត្រៀមបញ្ចាំងនៅលើកញ្ចក់ទូរទស្សន៍ហង្សមាសនៅឡើយ។
លោក ដួង វីរៈសិទ្ធ បុរសវ័យក្មេងសំឡេងផ្អែមស្រទន់រណ្ដំដួងចិត្តថ្វីត្បិតតែពេលនេះបានរួមជាសមាជិកក្នុងផលិតកម្មរាមក៏ពិតមែន ប៉ុន្តែស្នាដៃរបស់លោកមួយចំនួននៅតែមានបញ្ចាំងនៅលើកញ្ចាំងទូរទស្សន៍ហង្សមាសសម្រាប់ហ្វេនដែលនិយមគាំទ្រលោកបានទស្សនា ដូចជាក្នុងពេលថ្មីៗនេះដែររឿងភាគ «សុំទោស លាហើយស្នេហា» រឿងភាគមនោសញ្ចេតនាស្នេហាកម្សត់ ដែលលោកបានចាប់ដៃគូសម្ដែងជាតួអង្គឯកជាមួយនឹងតារាស្រី កញ្ញា ប៉ាច គីមមួយ កំពុងតែទទួលបាននូវប្រជាប្រិយភាពយ៉ោងខ្លាំងពីសំណាក់អ្នកគាំទ្រជាពិសេសអ្នកដែលនិយមទស្សនារឿងភាគខ្មែរផ្ទាល់តែម្ដង។
មុននេះដួង វីរៈសិទ្ធ ក៏ធ្លាប់ទទួលបាននូវការសរសើរយ៉ាងច្រើនពីសំណាក់អ្នកទស្សនាចំពោះសមត្ថភាពសម្ដែងរបស់លោកដែលធ្វើបានល្អមិនចាញ់ច្រៀងតាមរយៈការសម្ដែងរឿងភាគ «ម្ដាយក្មេកចេញពីព្រះច័ន្ទ» ដែលរឿងនេះលោកបានចាប់ដៃគូសម្ដែងជាមួយនឹងកញ្ញា រ៉េត ហ្សូសាណា។
គួរដឹងដែរថាលោក ដួង វីរៈសិទ្ធ គឺជាតារាចម្រៀងដែលមានភាពជោគជ័យខ្លាំងមួយក្នុងអាជីពជាពិសេសបទចម្រៀងថ្មីៗដែលលោកបានចេញនៅលើឆាណែលយូធូបរបស់ផលិតកម្មរាម បានទទួលការគាំទ្រនិងមានចំនួនទស្សនាខ្ទង់លានដងមានមិនតិចបទនោះទេដូចជាបទ «ឆ្នេរអនុស្សា» «សន្យា» និងបទ «វិបត្តិស្នេហ៍» ជាដើម៕