នៅអំឡុងពេល ៥ ថ្ងៃដើមខែមីនា ឆ្នាំ ២០២៤នេះ យុវជនដែលជាសិក្ខាកាមមកពីគ្រួសារក្រីក្រ និងងាយរងគ្រោះ ៥ ៣០០ នាក់ បានទទួលប្រាក់ឧបត្ថម្ភពីមូលនិធិជាតិជំនួយសង្គមរបស់រាជរដ្ឋាភិបាលកម្ពុជាតាមរយៈក្រសួងការងារ និងបណ្ដុះបណ្ដាលវិជ្ជាជីវៈ ដោយយុវជនទាំងនេះ គឺជាសិក្ខាកាមក្រុមដំបូងគេដែលទទួលបានការឧបត្ថម្ភប្រាក់ប្រចាំខែអំឡុងពេលដែលពួកគេកំពុងសិក្សាជំនាញ។ នេះបើតាមការឱ្យដឹងពីឯកឧត្ដម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។
ឯកឧត្ដមបានបញ្ជាក់បន្ថែមថា គិតត្រឹមថ្ងៃទី២៦ ខែកុម្ភៈ ឆ្នាំ២០២៤ មានយុវជនចុះឈ្មោះសិក្សាជំនាញវិជ្ជាជីវៈ សរុប ២៧ ៣៩៦ នាក់ ក្នុងនោះ ស្រីមានចំនួន ៩ ៤៨៤ នាក់។ យុវជនទាំងនេះមកពី រាជធានីភ្នំពេញ ខេត្តបាត់ដំបង ខេត្តសៀមរាប ខេត្តព្រះសីហនុ ខេត្តកណ្ដាល និងបណ្ដាខេត្តផ្សេងៗទៀត ដោយពួកគេកំពុងសិក្សាលើជំនាញអគ្គិសនី និងថាមពល អេឡិចត្រូនិក កម្មន្តសាល មេកានិចទូទៅ មេកានិចរថយន្ត ធុរកិច្ច និងព័ត៌មានវិទ្យា សេវាកម្ម បរិក្ខារត្រជាក់ និងកម្ដៅ ទេសចរណ៍ កសិកម្ម និងកសិ-ឧស្សាហកម្ម។
សូមរំឭកថា កាលពីពាក់កណ្ដាល ខែវិច្ឆិកា ឆ្នាំ២០២៣ រាជរដ្ឋាភិបាលថ្មីដឹកនាំដោយសម្ដេចមហាបវរធិបតីហ៊ុន ម៉ាណែត បានប្រកាសដាក់ចេញនូវកម្មវិធីនយោបាយចំនួន៦ ក្នុងនោះក៏មានកម្មវិធី បណ្ដុះបណ្ដាល ជំនាញវិជ្ជាជីវៈ និងបច្ចេកទេសដល់យុវជនទូទៅ ជាពិសេសយុវជនមកពីគ្រួសារក្រីក្រ និងងាយរងគ្រោះ ចំនួន ១ ៥០០ ០០០ នាក់ផងដែរ ហើយបានប្រកាសបើកវគ្គដំបូងកាលពីថ្ងៃទី១៥ ខែមករា ឆ្នាំ២០២៤ កន្លងទៅ។ ចំពោះសិក្ខាកាមមកពីគ្រួសារក្រីក្រ និងងាយរងគ្រោះ នឹងទទួលបានប្រាក់ឧបត្ថម្ភ ២៨ ០០០ រៀល ក្នុងមួយខែ ពីរាជរដ្ឋាភិបាលបន្ថែមពីលើការសិក្សាដោយឥតគិតថ្លៃ រហូតដល់ពួកគេបញ្ចប់វគ្គសិក្សា។ ចំណែកសិក្ខាកាមដែលមិនមានប័ណ្ណសមធម៌ ឬប័ណ្ណក្រីក្រទេនោះ ពួកគេអាចសិក្សាដោយឥតគិតថ្លៃ ប៉ុន្តែមិនទទួលបានប្រាក់ឧបត្ថម្ភដូចសិក្ខាកាមមកពីគ្រួសារក្រីក្រ និងងាយរងគ្រោះទេ ។
អត្ថបទ៖ ឈិន ធារ៉ាត់