កីឡាករគុនខ្មែរ ឈឿង ល្វៃ ក្លាយជាម្ចាស់ខ្សែក្រវាត់ 1 World Boxing Championនៅលើទឹកដីហុងកុង ក្រោយយកឈ្នះលើកីឡាករ ថៃ នៅវគ្គពាក់កណ្តាលផ្តាច់ព្រ័ត្រ និងបានយកឈ្នះលើកីឡាករ អាល្លឺម៉ង់ នៅវគ្គផ្តាច់ព្រ័ត្រ កាលពីរាត្រីថ្ងៃទី១២ ខែមីនា ឆ្នាំ២០២៤ កន្លងទៅ។
អ្នកលេងគុនខ្មែរ ឈឿង ល្វៃ ធ្វើឱ្យប្រជាជន និងពិសេសអ្នកសេ្នហាវិស័យកីឡាប្រដាល់គុនខ្មែរ ទូទាំងព្រះរាជាណាចក្រកម្ពុជា សម្ដែងការអបអរសាទរយ៉ាងផុសផុលលើបណ្ដាញសង្គម ក្រោយរូបនេះគេនាំយកជ័យជម្នះជូនខ្លួនឯង និងប្រទេសជាតិ។
មុនទទួលបានខ្សែក្រវាត់កម្រឹតអន្តជាតិ 1 World Boxing Champion កីឡាករគុនខ្មែរ ឈឿន ល្វៃ បានវាយកីឡាករថៃ ហ្វាសាំង ឱ្យសន្លប់នៅទឹកទីមួយ ក្នុងវគ្គពាក់កណ្ដាលផ្ដាច់ព្រ័ត្រ។
បន្ទាប់ពីបានយកឈ្នះលើកីឡាករថៃ រូបនោះ កីឡាករ ឈឿន ល្វៃ បានបន្តយកឈ្នះលើកីឡាករ Elysee Kochiese (អាលីសេ ឃូស៊ី) របស់អាល្លឺម៉ង់ ដោយពិន្ទុក្នុងវគ្គផ្តាច់ព្រ័ត្រវគ្គផ្ដាច់ព្រ័ត្រ គ្រងខ្សែក្រវាត់ពិភពលោក 1 World Boxing Champion នៅលើទឹកដីហុងកុង។
ក្រោយទទួលបានជ័យជម្នះ សម្ដេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី បានឧបត្ថម្ភថវិការដល់កីឡាករ ឈឿង ល្វៃ ចំនួន២០លានរៀលថែមទៀតផង។
សូមជម្រាបថា នេះជាព្រឹត្តិការណ៍ធំមួយដែលបានរៀបចំនៅទឹកដីហុងកុង ប្រទេសចិន ដែលមានការប្រកួតរហូតដល់ទៅ១០គូ ក្នុងនោះមានការប្រកួតខ្សែក្រវាត់ជាច្រើនដូចជា ខ្សែក្រវាត់ World Super-4 Championship, Global Championship, Supreme Championship, គូនារី Intercontinental Championship, Pacific Championship, Super Fight Championship, Asian Championship, Super Fight Championship ទាំងបុរស និងនារី។
ដោយឡែកសម្រាប់កីឡាករ កីឡាការិនីមកពីប្រទេសផ្សេងគ្នាជាច្រើនដូចជា ចិន អាល្លឺម៉ង់ ថៃ លីប៊ី ហ្វីលីពីន ជប៉ុន និងថៃ។
គួររំលឹកថា កីឡាករ ឈឿន ល្វៃ ដែលបានធ្វើដំណើរចាកចេញពីមាតុប្រទេស ឆ្ពោះទៅកាន់ទីក្រុងហុងកុង កាលពីថ្ងៃទី ១០ ខែមីនានោះ ហើយត្រូវបានសម្រកទម្ងន់មកសល់ត្រឹម ៧២ គីឡូក្រាម ដើម្បីចូលរួមការប្រកួតដណ្តើមខ្សែក្រវាត់ពិភពលោកមួយនេះ។
