បើតាមគ្រួសាររបស់បុរសដ៏កម្សត់ឈ្មោះ Paul Alexander ដែលជាមនុស្សពិការដ៏តស៊ូ រស់នៅក្នុងសួតដែកអស់រយៈពេល ៧០ឆ្នាំ បន្ទាប់ពីបានរួចជីវិតពីជំងឺស្វិតដៃជើងកាលពីកុមារភាព បានទទួលមរណភាពនៅក្នុងវ័យ ៧៨ឆ្នាំនេះ។ នេះបើយោងតាមការចញផ្សាយដោយសារព័ត៌មាន The Guardian នាថ្ងៃព្រហស្បតិ៍ ទី១៤ ខែមីនា ឆ្នាំ២០២៤។
លោក Paul Alexander បានទទួលមរណភាពកាលពីថ្ងៃចន្ទ ទី១១ ខែមីនា ឆ្នាំ២០២៤នេះ ដំណឹងនេះត្រូវបានប្អូនប្រុសរបស់លោក ឈ្មោះ Philip បានសរសេរនៅក្នុងការបង្ហោះនៅលើបណ្ដាញទំនាក់ទំនង Facebook ប៉ុន្ដែមិនបានប្រាប់ពីមូលហេតុនៃការស្លាប់របស់លោក Paul នោះទេ។
លោក Philip Alexander បានសរសេរនៅក្នុងសារបង្ហោះលើបណ្ដាញទំនាក់ទំនងសង្គមកាលពីថ្ងៃអង្គារថា «វាជាកិត្តិយសណាស់ ដែលបងប្រុសរបស់លោក ជាផ្នែកមួយនៃជីវិតរបស់យើង»។
លោក Paul ត្រូវបានគេដាក់ឱ្យគេងរស់នៅក្នុងស៊ីឡាំងដែក ឬ សួតដែក ដែលមានតួនាទីផ្លុំខ្យល់ជំនួយចូលទៅក្នុងសួតរបស់លោក តាំងពីលោកមានអាយុ ៦ឆ្នាំ ពោលគឺនៅឆ្នាំ១៩៥២ បន្ទាប់ពីបានឆ្លងជំងឺស្វិតដៃជើង ឬ ជំងឺប៉ូលីយ៉ូ (Polio) ដែលជាជំងឺឆ្លងដ៏សាហាវនាសម័យនោះ ដោយបានធ្វើឱ្យកុមាររាប់ម៉ឺននាក់ ពិការត្រឹមតែរយៈពេល ១ឆ្នាំដំបូងប៉ុណ្ណោះ។
ថ្វីត្បិតលោក Paul បានធ្លាក់ខ្លួនរស់នៅក្នុងសួតដែកនេះយ៉ាងណាក្ដី លោក បានបញ្ចប់ការសិក្សានៅសាលាច្បាប់ ហើយលោក ក៏បានធ្វើដំណើរទៅគ្រប់ទ្វីបដែរ។
គួររំលឹកថា លោក Paul ធ្លាប់បានឆ្លងជំងឺកូវីដ១៩ ហើយចូលសម្រាកព្យាបាលនៅមន្ទីរពេទ្យកាលពីក្នុងខែកុម្ភៈ ហើយជំងឺរបស់លោក បានធ្វើឱ្យរាងកាយខ្សោយ និងខ្សោះជាតិទឹក នេះបើយោងតាមការឱ្យដឹងពីអ្នកតាមដានលោកក្នុងបណ្ដាញសង្គម Tiktok ដែលមានអ្នកតាមដានច្រើនជាង ៣០០,០០០នាក់៕
