នៅព្រឹកថ្ងៃទី១៩ ខែមីនា ក្រុមជម្រើសជាតិកម្ពុជា បានធ្វើដំណើរដល់ប្រទេសអារ៉ាប៊ីសាអូឌីត ដើម្បីត្រៀមចូលរួមការប្រកួតមិត្តភាពអន្តរជាតិ FIFA Series 2024 ដែលគ្រោងនឹងចាប់ផ្តើមពីថ្ងៃទី២១ ខែមីនា រហូតដល់ថ្ងៃទី២៦ ខែមីនា ឆ្នាំ២០២៤។
ក្រុមជម្រើសជាតិកម្ពុជា ក្រោមការដឹកនាំរបស់លោក Félix Dalmás ស្ថិតនៅពូល (អារ៉ាប៊ីសាអូឌីត A) ជាមួយ ហ្គីយ៉ាន (អាមេរិកខាងជើង), កាប់វែរ (អាហ្វ្រិកខាងលិច) និង ហ្គីណេអេក្វាទ័រ (អាហ្វ្រិកកណ្តាល)។
ខាងក្រោមនេះគឺជាកម្មវិធីប្រកួត 2024 FIFA Series មានដូចជា៖
- ២២ មីនា ២០២៤ ហ្គីណេអេក្វាទ័រ ប៉ះ កម្ពុជា ម៉ោង ២:០០ រំលងអធ្រាត្រ
- ២៦ មីនា ២០២៤ កម្ពុជា ប៉ះ ហ្គីយ៉ាន ម៉ោង ២:០០ រំលងអធ្រាត្រ។
តារាងចំណាត់ថ្នាក់ FIFA World Ranking៖
- កម្ពុជា មានមូលដ្ឋាននៅទ្វីបអាស៊ី ភាគអាគ្នេយ៍ ឈរលេខ១៧៩ពិភពលោក
- ប្រទេសកាប់វែរ ស្ថិតនៅខាងកើតទ្វីបអាហ្វ្រិក ក្នុងមហាសមុទ្រអាត្លង់ទិច ឈរលេខ៦៥ពិភពលោក
- ប្រទេសហ្គីយ៉ាន ស្ថិតនៅខាងជើងទ្វីបអាមេរិកខាងជើង ក្នុងមហាសមុទ្រអាត្លង់ទិច ឈរលេខ១៥៧ពិភពលោក
- ប្រទេសហ្គីណេអេក្វាទ័រ ស្ថិតនៅអាហ្វ្រិកកណ្តាល ឈរលេខ៧៩ពិភពលោក។
បញ្ជីរាយនាមកីឡាករជម្រើសជាតិកម្ពុជា សរុប២៣នាក់៖
- អ្នកចាំទី ហ៊ុល គឹមហ៊ុយ, អុំ វិចិត្រ, វីរៈ ដារ៉ា
- ខ្សែការពារ សឿយ វិសាល, សារ៉េត គ្រីយ៉ា, ធារី ចន្ថាប៊ីន, ជា ច័ន្ទដារ៉ា, ស៊ិន សុផាណាត, កែម វ៉ាន់ដា, ផាច សុជាវីឡា, ហ៊ី ម៉ូស្លីម
- ខ្សែបម្រើ ថេឡរ នីកូឡាស់ ខឿង, គួច ដានី, មិន រតនៈ, គង់ លីហ៊ួរ, សុះ ស៊ូហាណា, យូឌៃ អូកាវ៉ា
- ខ្សែប្រយុទ្ធ សៀង ចន្ធា, ម៉ាត់ នូរុណ, ញាណ សុស៊ីដាន, ផាន សុផន, លឹម ពិសុទ្ធ, ស រតនា៕
សូមបញ្ជាក់ថាចាប់តាំងពីបង្កើតសហព័ន្ធកីឡាបាល់ទាត់កម្ពុជា មកក្រុមជម្រើសជាតិកម្ពុជា ធ្លាប់ប្រកួតទល់ក្រុមហ្គីណេ តែមួយគត់ដែលនៅក្រៅទ្វីបអាស៊ី ក្នុងឆ្នាំ១៩៦៦ គ្រាដែលកម្ពុជា ទទួលសិទ្ធិធ្វើម្ចាស់ផ្ទះកីឡា GANEFO ក្រៅពីនោះការប្រកួតផ្លូវការរបស់ក្រុមជម្រើសជាតិគឺសុទ្ធសឹងតែប៉ះជាមួយក្រុមបណ្តាប្រទេសក្នុងទ្វីបអាស៊ី ទាំងអស់។
នេះគឺជាលើកទី២ហើយក្នុងប្រវត្តិសាស្រ្តដែលបាល់ទាត់ជម្រើសជាតិបុរសកម្ពុជា ត្រូវប្រកួតទល់នឹងក្រុមនៅក្រៅទ្វីបអាស៊ី៕
