សិល្បៈជាតិ៖ តារាសម្ដែងឯកប្រុសរូបសង្ហា ខាត់ វ៉ៃហាំង បានបង្ហាញវត្តមានទៅទទួលពានរង្វាន់លំដាប់អន្តរជាតិនៅក្នុងកម្មវិធី Asia Top Award 2024 នាប្រទេសថៃ និងឆ្លៀតទៅចូលរួមសម្ពោធការចាក់បញ្ចាំងភាពយន្ត «ប្រុសលក់ខ្លួន» នៅលើផ្ទាំងសំពត់សក្នុងរោងភាពយន្តប្រទេសថៃទាំង ៨៦ ទីតាំងសំខាន់ៗថែមទៀតផង។
លោក ខាត់ វ៉ៃហាំង បានឱ្យតម្លៃពានរង្វាន់តារាសម្ដែងប្រុសឆ្នើមទទួលបាននោះ គឺផ្ដល់កិត្តិយសជូនដល់អ្នកគាំទ្រផ្តល់ឱ្យ និងដល់ស្ថានីយទូរទស្សន៍ភីអិនអិន ម្ចាស់ផលិតកម្ម រួមទាំង ក្រុមការងារថតទាំងអស់គ្នាដែលបានខិតខំយ៉ាងលំបាក ក្នុងការសាងសមិទ្ធផលដ៏ល្អនេះឡើង។
ជាមួយគ្នានោះដែរ តារាសម្ដែងឯកប្រុសរូបនេះ ក៏បានអញ្ជើញចូលរួមសម្ពោធភាពយន្ត«ប្រុសលក់ខ្លួន» របស់ផលិតកម្ម LD ដែលបានចូលទៅបញ្ចាំងជាផ្លូវការនៅក្នុងរោងភាពយន្តប្រទេសថៃនាថ្ងៃទី ១៩ ខែមីនា ឆ្នាំ ២០២៤នេះ ជាមួយតារាឯកស្រី ពេជ្រ វត្តីសារ៉ាវឌ្ឍី ហៅ Pichy តារាសម្ដែងឯកប្រុសភូមា លោក ប៉ៃ ថាកន លោក លៀក លីដា រួមទាំងក្រុមការងារផលិតកម្ម LD ផងដែរ។
សូមជម្រាបថា ភាពយន្ត «ប្រុសលក់ខ្លួន» គឺជាភាពយន្តដែលទទួលបានភាពជោគជ័យលំដាប់ខ្ពស់បំផុតសម្រាប់ការចាក់បញ្ចាំងនៅក្នុងស្រុកដែលត្រឹមតែ ៤ ថ្ងៃប៉ុណ្ណោះ អាចកើបលុយបានដល់ទៅ ៨០០ លានរៀល។ ភាពយន្តមួយនេះ ក៏ត្រូវបានអ្នកគាំទ្រទស្សនា សម្រុកធ្វើកក់កៅអីទុកអស់ៗគ្មានសល់ តាំងពីថ្ងៃដាក់បញ្ចាំងថ្ងៃដំបូងមកម្ល៉េះ ពោលគឺ សំបុត្រទស្សនាត្រូវបានកក់រហូតដល់គ្មានកន្លែងសល់សូម្បីតែជួរមុខជិតអេក្រង់ក៏ដោយ៕