ប្រធានការិយាល័យចុះបញ្ជី និងជំរុញសហគមន៍កសិកម្ម នៃនាយកដ្ឋានអភិវឌ្ឍសហគមន៍កសិកម្ម លោក គង់ ពិសិដ្ឋ បានពន្យល់ថា ការចងក្រងជាសហគមន៍កសិកម្មបានផ្ដល់នូវប្រយោជន៍ជាច្រើនជូនដល់កសិករ ដោយកសិករអាចរក្សាបានស្ថិរភាពតម្លៃកសិផល និងចំណូលបន្ថែម ការផ្គត់ផ្គង់ធាតុចូលដូចជាគ្រាប់ពូជ ជី ថ្នាំ ជាដើមក្នុងតម្លៃធូរថ្លៃដោយសារនាំចូលជាដុំ កសិករអាចទទួលបានឥណទានពីសហគមន៍ដែលមានអត្រាការប្រាក់ទាបជាងប្រភពខាងក្រៅ ហើយតាមរយៈចងក្រងជាសហគមន៍កសិករអាចទទួលបានព័ត៌មានស្ដីពីទីផ្សារកសិកម្មបានទូលំទូលាយ។
លោក គង់ ពិសិដ្ឋ បន្តថា ដើម្បីគាំទ្រ និងជំរុញសហគមន៍កសិកម្មឲ្យមានសមត្ថភាព និងប្រសិទ្ធភាពការងារកាន់តែប្រសើរ ក្រសួងកសិកម្ម រុក្ខាប្រមាញ់ និងនេសាទ តាមរយៈនាយកដ្ឋានអភិវឌ្ឍសហគមន៍កសិកម្ម នៃអគ្គនាយកដ្ឋានកសិកម្ម បានធ្វើការពង្រឹងបន្ថែមលើបទដ្ឋានគតិយុត្តិពាក់ព័ន្ធនឹងសហគមន៍កសិកម្ម គាំទ្រផ្នែកបច្ចេកទេសដាំដុះដំណាំដែលកំពុងមានសក្ដានុពល ផ្ដល់នូវចំណេះដឹងផ្នែកគ្រប់គ្រងសហគមន៍ ការរៀបចំផែនការ ឯកសារ របាយការណ៍កសិកម្ម បញ្ជីស្នាមផ្សេងៗ និងចំណេះដឹងផ្នែកទីផ្សារកសិកម្ម។
ពាក់ព័ន្ធនឹងការចងក្រងជាសហគមន៍កសិកម្ម ប្រធានក្រុមប្រឹក្សាភិបាល នៃសហភាពសហគមន៍កសិកម្មព្រះវិហារមានជ័យ ខេត្តព្រះវិហារ លោក នួន ដេ បានចែករំលែកនូវបទពិសោធន៍របស់លោកក្នុងការដឹកនាំក្រុមសហគមន៍របស់លោកថា សហគមន៍កសិកម្មមួយដែលរឹងមាំ មាននិរន្តរភាព និងសមិទ្ធផលការងារ ត្រូវមានការចូលរួមពីគ្រប់ភាគីពាក់ព័ន្ធទាំងអស់ រាប់តាំងពីកសិករដែលមានសាមគ្គីភាពក្នុងឆន្ទៈតែមួយ គណៈដឹកនាំសហគមន៍ ដែលមានសមត្ថភាព ការគាំទ្រពីបណ្ដាក្រុមហ៊ុន សហគ្រាសដែលរកស៊ីលើផលិផលកសិកម្ម ព្រមទាំងបណ្ដាស្ថាប័នរដ្ឋាភិបាល និងអង្គការក្រៅរដ្ឋាភិបាលផងដែរ។ លោក នួន ដេ ពន្យល់ថា ការចងក្រងជាសហគមន៍កសិកម្ម នឹងជួយឲ្យកសិករមានភាពរឹងមាំ ធានាបាននូវបរិមាណនៃផលិតផលកសិកម្ម ស្របតាមតម្រូវការទីផ្សារ ធានាបាននូវទីផ្សារកសិកម្ម តាមរយៈការធ្វើកសិកម្មកិច្ចសន្យាជាមួយឈ្មួញ ធានាបាននូវស្ថិរភាពតម្លៃដែលអាចឲ្យកសិករទទួលបានប្រាក់ចំណេញសមរម្យ និងមានឱកាសទទួលបាននូវចំណេះដឹងផ្នែកបច្ចេកទេស និងព័ត៌មានផ្សេងទាក់ទងនឹងកសិកម្ម និងការគាំទ្រពីស្ថាប័ននានា។
ជាមួយគ្នានេះដែរ ក្រុមកសិករ នៃសហភាពសហគមន៍កសិកម្មព្រះវិហារមានជ័យ លើកឡើងស្រដៀងគ្នាថា កសិផលរបស់ពួកគាត់ មានស្រូវ ដំឡូង និងគ្រាប់ស្វាយចន្ទីជាដើម បើទោះបីអត្រាតម្លៃមានការឡើងចុះ ក៏នៅតែអាចរក្សាបានតម្លៃខ្ពស់គួរសមដែរព្រោះថាឈ្មួញខាងក្រៅមិនហ៊ានទម្លាក់តម្លៃនោះទេ កាលណាឈ្មួញឲ្យតម្លៃទាប កសិករនឹងលក់ឲ្យសហគមន៍ ដូច្នេះឈ្មួញត្រូវតែឲ្យតម្លៃខ្ពស់ជាង ឬស្មើសហគមន៍ ដើម្បីទិញកសិផលពីកសិករ។
យោងតាមការឲ្យដឹងពី ប្រធានការិយាល័យចុះបញ្ជី និងជំរុញសហគមន៍កសិកម្ម នៃនាយកដ្ឋានអភិវឌ្ឍសហគមន៍កសិកម្ម គិតត្រឹមដើមឆ្នាំ ២០២៤ នេះ សហគមន៍កសិកម្ម ដែលបានចុះបញ្ជីទទួលស្គាល់ដោយមន្ទីរកសិកម្មរាជធានីខេត្ត មានចំនួន ១២៤៥ សហគមន៍ ក្នុងនោះសហភាពសហគមន៍កសិកម្មមានចំនួន ២១។ ប៉ុន្តែក្នុងចំណោម ២១ សហភាពសហគមន៍កសិកម្មនេះ មានតែ ៣ ប៉ុណ្ណោះដែលក្នុងនោះមាន ២៥៨ សហគមន៍ កំពុងដំណើរការទៅដោយភាពល្អប្រសើរ គឺ សហភាពសហគមន៍កសិកម្មព្រះវិហារមានជ័យ ខេត្តព្រះវិហារ សហភាពសហគមន៍គ្រឿងទេស ខេត្តត្បូងឃ្មុំ និងសហភាពសហគមន៍បន្លែសុវត្ថិភាព ខេត្តបាត់ដំបង។
ក្នុងនាមជាមន្ត្រីជំនាញផ្នែកសហគមន៍កសិកម្ម ដែលតែងចុះទៅកៀកនឹងប្រជាកសិករ លោក គង់ ពិសិដ្ឋ ទទួលស្គាល់ថា សមត្ថភាពរបស់កសិករ ក៏ដូចជាអ្នកដឹកនាំសហគមន៍កសិកម្ម នៅតែមានកម្រិតមួយ ដែលមិនទាន់អាចឆ្លើយតបនឹងតម្រូវការការងារ កង្វះខាតហេដ្ឋារចនាសម្ព័ន្ធបម្រើឲ្យសហគមន៍កសិកម្ម កង្វះទុនវិនិយោគក្នុងសហគមន៍ ដែលជះឥទ្ធិពលមិនល្អដល់ការប្រកួតប្រជែងក្នុងទីផ្សារ និងការទប់ទល់នឹងបញ្ហាបម្រែបម្រួលអាកាសធាតុ៕
អត្ថបទ៖ ឈិន ធារ៉ាត់