ក្រុមបាល់ទាត់ជម្រើសជាតិកម្ពុជា បានរងបរាជ័យជាលើកទី២ ក្រោមថ្វីជើងក្រុមជម្រើសជាតិហ្គីយ៉ាន ក្នុងលទ្ធផល ៤-១ កាលពីរាត្រីថ្ងៃទី២៦ ឈានចូលព្រឹកថ្ងៃទី២៧ ខែមីនានេះ នៅកីឡដ្ឋាន Prince Abdullah Al-Faisal Sports City នៃពានរង្វាន់ FIFA Series 2024 ខណ: សៀង ចន្ធា ស៊ុតគ្រាប់ដំបូងឲ្យគោព្រៃកម្ពុជា។
ស្របពេលការប្រកួតលើកទី១ គោព្រៃកម្ពុជា ក៏បានរងបរាជ័យ ២-០ ក្រោមថ្វីជើងក្រុមជម្រើសជាតិហ្គីណេអេក្វាទ័រ កាលពីរាត្រីថ្ងៃទី២២ ខែមីនា រំលងអធ្រាត្រ កម្ពុជា នៅកីឡដ្ឋាន Prince Abdullah Al-Faisal Sports City ប្រទេសអារ៉ាប៊ីសាអូឌីត។
តារាងចំណាត់ថ្នាក់ FIFA Series 2024 ពូល A៖
- កាប់វែរ (អាហ្វ្រិកខាងលិច) ២ប្រកួត ឈ្នះ២ មាន៦ពិន្ទុ
- ហ្គីយ៉ាន (អាមេរិកខាងជើង) ២ប្រកួត ឈ្នះ១ ចាញ់១ មាន៣ពិន្ទុ
- ហ្គីណេអេក្វាទ័រ (អាហ្វ្រិកកណ្តាល) ២ប្រកួត ឈ្នះ១ ចាញ់១ មាន៣ពិន្ទុ
- កម្ពុជា (អាស៊ាន) ២ប្រកួត ចាញ់២ មិនមានពិន្ទុ។
ចាប់តាំងពីបង្កើតសហព័ន្ធកីឡាបាល់ទាត់កម្ពុជា មកក្រុមជម្រើសជាតិកម្ពុជា ធ្លាប់ប្រកួតទល់ក្រុមហ្គីណេ តែមួយគត់ដែលនៅក្រៅទ្វីបអាស៊ី ក្នុងឆ្នាំ១៩៦៦ គ្រាដែលកម្ពុជា ទទួលសិទ្ធិធ្វើម្ចាស់ផ្ទះកីឡា GANEFO ក្រៅពីនោះការប្រកួតផ្លូវការរបស់ក្រុមជម្រើសជាតិគឺសុទ្ធសឹងតែប៉ះជាមួយក្រុមបណ្តាប្រទេសក្នុងទ្វីបអាស៊ី ទាំងអស់។
នេះគឺជាលើកទី២ ហើយក្នុងប្រវត្តិសាស្រ្តដែលបាល់ទាត់ជម្រើសជាតិបុរសកម្ពុជា ត្រូវប្រកួតទល់នឹងក្រុមនៅក្រៅទ្វីបអាស៊ី ក្នុងពានរង្វាន់ FIFA Series 2024៕