យោងតាមចេញផ្សាយរបស់ក្រុមហ៊ុន Cambodian Premier League នៅរសៀលថ្ងៃទី២៨ ខែមីនា ឆ្នាំ២០២៤ បានឲ្យដឹងថាក្រុមបាល់ទាត់វិសាខា នឹងត្រូវធ្វើដំណើរទៅកីឡដ្ឋានស្តាតចាស់ ដើម្បីជួប Tiffy Army FC នៅថ្ងៃទី៣១ ខែមីនា ដូចការគ្រោងទុក ដើម្បីបញ្ចប់មន្ទិលសង្ស័យរបស់អ្នកគាំទ្រជុំវិញរឿងវិសាខា ត្រលប់ចូលរួមលីគកំពូលកម្ពុជា ឬអត់។
ស្របភាគីក្លិបទាំងវិសាខា និង Tiffy Army ក៏បានប្រកាសនៅលើគណនី Facebook Page ជាផ្លូវការអំពីការប្រកួតនៅថ្ងៃអាទិត្យ ទី៣១ ខែមីនា ឆ្នាំ២០២៤ នៃពានរង្វាន់ Cambodian Premier League រដូវកាល ២០២៣-២៤ ជុំទី៣ សប្តាហ៍ទី២៥។
កម្មវិធីប្រកួត CPL ជុំទី៣ សប្តាហ៍ទី២៥៖
សូមរំលឹកថា ក្លិបបាល់ទាត់វិសាខា ម្ចាស់ជើងឯកពានរង្វាន់បាល់ទាត់សម្តេចតេជោ ហ៊ុន សែន ៣សម័យកាល បានប្រកាសដកខ្លួនចេញពីគ្រប់ពានរង្វាន់ដែលខ្លួននៅសេសសល់ ក្នុងរដូវកាលឆ្នាំ២០២៣-២៤ នេះ ពោលគឺគ្រប់ពានរង្វាន់ដែលរៀបចំឡើងដោយក្រុមហ៊ុន Cambodian Premier League (លីគទី១ និងលីគទី២) និងពានរង្វាន់សម្តេចតេជោ ហ៊ុន សែន កាលពីថ្ងៃទី៨ ខែមីនា ឆ្នាំ២០២៤ កន្លងទៅ៕
តារាងចំណាត់ថ្នាក់ CPL បណ្តោះអាសន្ន៖
ក្លិបបាល់ទាត់វិសាខា បានឡើងមកលេងលីគកំពូលកម្ពុជា នៅរដូវកាលឆ្នាំ២០១៨ ក្រោយឈ្នះជើងឯកលីគទី២ នៅរដូវកាលឆ្នាំ២០១៧។ ក្នុងរដូវកាលដំបូងក្នុងលីគកំពូលកម្ពុជា ក្លិបមួយនេះបានខ្ចីកីឡដ្ឋានក្លិបវេស្ទើន ធ្វើជាទឹកដីខ្លួនបណ្ដោះអាសន្ន ស្របពេលខ្លួនបានកសាងកីឡដ្ឋានស្តង់ដារ នៅម្តុំហ្រ្គេនភ្នំពេញ ហើយក្រោយសាងសង់រួចរាល់ ក្លិបបានដាក់ឈ្មោះថាកីឡដ្ឋានព្រីនស៍។
កីឡដ្ឋានព្រីនស៍ ធ្លាប់ទទួលសិទ្ធិធ្វើជាម្ចាស់ផ្ទះការប្រកួតថ្នាក់ជាតិនិងអន្តរជាតិជាច្រើន ជាពិសេសជាទីតាំងសំខាន់មួយក្នុងបេសកកម្មរបស់កម្ពុជា ទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ កន្លងទៅថែមទៀតផង។
ក្រុមថ្មីថ្មោងមួយនេះធ្លាប់ឈរជាក្រុមជើងឯករងពានរង្វាន់លីគកំពូលកម្ពុជា ២សម័យកាលគឺនៅឆ្នាំ២០១៩ និង២០២២ ខណៈជាក្រុមឈ្នះជើងឯកពានរង្វាន់សម្តេចតេជោ ហ៊ុន សែន ៣សម័យកាលជាប់ៗគ្នាគឺនៅឆ្នាំ២០២០, ២០២១, ២០២២ ព្រមទាំងធ្លាប់រងជើងឯកពានរង្វាន់ Cambodian Super Cup នៅឆ្នាំ២០២២ និង ២០២៣ និងរងជើងឯកពានរង្វាន់ Cambodian League Cup ឆ្នាំ២០២២ ទៀតផង៕
