ក្លិបកីឡាបាល់ទាត់ វិសាខា បានជូនដំណឹងនៅរសៀលថ្ងៃសៅរ៍ នេះថាក្លិបបានឈានដល់កិច្ចព្រមព្រៀងផ្ទេរកីឡាករ ២រូប ទៅក្លិបបាល់ទាត់ខេត្តព្រៃវែង និងក្លិបបាល់ទាត់អគ្គិសនីកម្ពុជា ក្នុងទីផ្សារដោះដូរកីឡាករជុំទី២នៃពានរង្វាន់លីគកំពូលកម្ពុជា Metfone Cambodian League 2021 ដោយក្នុងនោះមានខ្សែការពារ ងយ ស្រ៊ីន និងខ្សែការពារវ័យក្មេង ផុន តៃនិញ។
កីឡាករទាំង២រូបនឹងបង្ហាញខ្លួនក្នុងជើងទី២នៃពានរង្វាន់លីគកំពូលកម្ពុជា ខណៈកីឡាករ ងយ ស្រ៊ីន នឹងត្រូវផ្ទេរទៅលេងឲ្យក្លិបបាល់ទាត់ខេត្តព្រៃវែង ខណៈកីឡាករ ផុន តៃនិញ នឹងត្រូវផ្ទេរទៅក្លិបបាល់ទាត់អគ្គិសនីកម្ពុជា ក្រោមលក្ខខណ្ឌខ្ចីជើងដូចគ្នា។
កីឡាករ ងយ ស្រ៊ីន បានចូលរួមជាមួយវិសាខា តាំងពីដើមរដូវកាលឆ្នាំ២០១៨ ក្រោយពេលក្រុមនេះទទួលបានឡើងមកលេងក្របខណ្ឌពានរង្វាន់មិត្តហ្វូនខេមបូឌានលីគលើកដំបូង បន្ទាប់ពីចាកចេញពីក្រុមណាហ្គាវើល។ ចំណែកកីឡាករ ផុន តៃនិញ វិញបានចូលរួមជាមួយពួកវិសាខា នៅចុងឆ្នាំ២០១៨ ក្រោយចាកចេញពីសាលាបាល់ទាត់ជាតិបាទី។