ការប្រកួតជម្រើសជើងឯក Cambodian League 2 រដូវកាល ២០២៣-២៤ បានរកឃើញម្ចាស់ជើងឯកហើយ ពោលគឺបានលើក្លិបបាល់ទាត់ឡាយហ្វ ខេត្តព្រះសីហនុ ទោះប្រកួតចុងក្រោយ រវាងក្រុមលើសមាគមកីឡាបាល់ទាត់ក្រសួងមហាផ្ទៃ ទល់នឹងឡាហ្វ ស្នើគ្នាក៏ដោយក្តី។
ការប្រកួតដែលកាត់ក្តីដោយលោក ឃិន ឧសីហា មន្ត្រីអាជ្ញាកណ្តាលកម្រឹតអន្តជាតិ បានចាយកាត់លើក្រុមម្ចាស់ផ្ទះក្រសួងមហាផ្ទៃ ចំនួន៤សន្លឹក និងក្រុមភ្ញៀវឡាយហ្វ ខេត្តព្រះហនុចំនួន ៤សន្លឹកដូចគ្នា ខណៈលទ្ធផល ក្រុមម្ចាស់ផ្ទះក្រសួងមហាផ្ទៃ បានវាយបកតាមស្នើដោយលទ្ធផល ៤ទល់នឹង៤។
ទោះយ៉ាងណាក្តី ក្រុមចំនូលថ្មីឡាយហ្វខេត្តព្រះសីហនុ មួយនេះនៅតែអាចគ្រងពានរង្វាន់ពានរង្វាន់លីគទី២ Cambodian League 2 នេះបាន ដោយយោងតាមពិន្ទុ និងផលសងគ្រាប់បាល់(Head to Head) មានព្រាបជាងក្រុមម្ចាស់ផ្ទះ ពោលគឺក្រុមឡាយហ្វ ខេត្តព្រះសីហនុ។
កីឡដ្ឋាន បណ្ឌិត្យសភានគរបាលកម្ពុជា ដែលស្ថិតនៅស្រុកកៀនស្វាយ ខេត្តកណ្តាល ជាទីតាំងការប្រកួតកាត់ក្តីរកក្រុមឈ្នះ និងជាការប្រកួតជុំទី៣ នៃពានរង្វាន់លីគទី២ Cambodian league 2 ខណៈការប្រកួតនោះ បានចាប់ផ្តើមនៅវេលាម៉ោង ៣៤៥នាទីរសៀល។
៤គ្រាប់របស់ក្រុមភ្ញៀវគឺរកបានដោយកីឡាករ Kipson Atuherie នៅនាទី៤០, គួរ សុភ័ក្រ ៧២, Okaro Osa Orobosa ៧៩, និងម៉ៅ ពិសិដ្ឋ រកបាននៅនាទី៨២។
ចំណែកឯ ៤គ្រាប់របស់ម្ចាស់ផ្ទះ គឺរកបាននៅនាទី៣៧ ដែលជាគ្រាប់នាំមុខ ដោយកីឡាករ ម៉ាត់ សាក់រ៉ាវី ហើយរូបគេបន្ថែមការនាំមុខនៅវគ្គទី១ ចំនួន១គ្រាប់ទៀតនៅនាទី៤៥+៤ រីឯគ្រាប់ទី៣ គឺរកបានដោយកីឡាករ នុប តុលា នៅនាទី៨៤ និងគ្រាប់តាមស្នើចុងក្រោយគឺរកបានដោយកីឡាករ សាន បូរ៉ា នៅនាទី ៩០+៩ ។
គួរឱ្យដឹងផងដែរថាការប៉ះគ្នា២ប្រកួតកន្លងទៅ ម្ចាស់ផ្ទះសមាគមកីឡាបាល់ទាត់ក្រសួងមហាផ្ទៃ មិនទាន់ស្គាល់ពាក្យថាឈ្នះក្លិបបាល់ទាត់ឡាយហ្វ ខេត្តព្រះសីហនុ នោះទេ ដោយជើងទី១ ក្រសួងមហាផ្ទៃ ចាញ់ ឡាយហ្វ ២ទល់០ និង ជើងទី២ ក្រសួងមហាផ្ទៃ បន្ដចាញ់ ក្លិបបាល់ទាត់ឡាយហ្វ ១ទល់០ ទៀត។
សម្រាប់ម្ចាស់ជើងឯកពានរង្វាន់លីគទី២ គិតចាប់តាំងពីបង្កើតឡើងមកមាន ឆ្នាំ២០១៦ បានទៅក្រុមគីរីវង់សុខសែនជ័យ ឆ្នាំ២០១៧ បានទៅក្រុមវិសាខា ឆ្នាំ២០១៨និង២០១៨ មិនមានការរៀបចំនោះទេ ហើយនៅឆ្នាំ២០២០ ជើងឯកបានទៅក្រុមព្រៃវែងអែហ្វស៊ី ឆ្នាំ២០២១ បានទៅក្រុមយុវជនសាលាបាល់ទាត់ជាតិបាទី និងឆ្នាំ២០២២ នេះជើងឯកបានទៅក្រុមអគ្គីសនីកម្ពុជា និងនៅរដូវកាលឆ្នាំ២០២៣ ២៤ នៃពានរង្វាន់លីគទី២ នេះម្ចាស់ជើងឯកបានលើក្លិបចំនូលថ្មី ឡាយហ្វ ខេត្តព្រះសីហនុ។
ដូចនេះក្រុមឡាហ្វ ខេត្តព្រះសីហនុ នឹងឡើងទៅលីគកំពូលកម្ពុជា Cambodian Premier League នៅរដូវកាលឆ្នាំ២០២៤-២៥ ខាងមុខ៕