បន្ទាប់ពីដំណើរការប្រកួតដ៏ស្វិតស្វាញអស់រយ:ពេលជាង ២ខែមក ការប្រកួតបាល់ទាត់ដណ្ដើមពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ បានរកឃើញបេក្ខភាពវគ្គផ្ដាច់ព្រ័ត្រហើយ ក្នុងនោះរួមមានក្រុមក្រសួងអប់រំ យុវជន និងកីឡា និងក្រុមក្រសួងសុខាភិបាល ក្រោយយកឈ្នះគូប្រកួត ដោយការទាត់បាល់ប៉េណាល់ទីកាត់សេចក្ដីដូចគ្នា ក្នុងវគ្គពាក់កណ្ដាលផ្ដាច់ព្រ័ត្រ កាលថ្ងៃទី០១ ខែមេសា ឆ្នាំ២០២៤កនុ្លងទៅ នៅកីឡដ្ឋានកងយោធពលខេមរភូមិន្ទ (ស្តាតចាស់)។
ក្នុងជំនួបវគ្គពាក់កណ្ដាលផ្ដាច់ព្រ័ត្រ ដោយមានការប្រកួតយ៉ាងស្វិតស្វាញ ក្រុមក្រសួងអប់រំ យុវជន និងកីឡា បានត្រឹមស្មគ្នា ០-០ ជាមួយក្រុមសួងការពារជាតិ ប៉ន្តែឈ្នះដោយការទាត់បាល់ប៉េណាត់កាត់សេចក្ដី ៤-១ ខណៈប្រកួតបន្ទាប់ ក្រុមក្រុមក្រសួងសុខាភិបាល បានត្រឹមស្មគ្នា ០-០ ជាមួយ ក្រុមក្រសួងមុខងារសាធារណៈ ប៉ុន្តែបានយកឈ្នះ ដោយការទាត់បាល់ប៉េណាល់ទីកាត់សេចក្ដី ៤-១ ដូចគ្នា។
ដូចនេះសម្រាប់ជ័យជម្នះនេះ ធ្វើឲ្យក្រុមក្រសួងអប់រំ យុវជន និងកីឡា និងក្រុមក្រសួងសុខាភិបាល ដឹកដៃគ្នាឡើងវគ្គផ្ដាច់ព្រ័ត្រ ជួបគ្នាដើម្បីរកក្រុមជើងឯកពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ នៅល្ងាចថ្ងៃទី០៦ ខែមេសាខាងមុខ នៅកីឡដ្ឋានស្ដាតចាស់។ ខណ:ក្រុម ក្រសួងការពារជាតិ ត្រូបជួបក្រុមក្រសួងមុខងារសាធារណៈ ដណ្ដើមចំណាត់ថ្នាក់លេខ៣ នៅម៉ោង ៣:០០នាទីរសៀល ថ្ងៃទី០៦ ខែមេសា ឆ្នាំ២០២៤។
ព្រឹត្តិការណ៍នេះ មានក្រុមចូលរួមរហូតដល់ ៣៤ក្រុម ស្មើនឹង ៧២ប្រកួត។ ក្រុមទាំង ៣៤ក្រសួង-ស្ថាប័ន បែងចែកជា ៨ពូល ដើម្បីធ្វើការប្រកួតជម្រុះ ក្នុងនោះពូលA ដល់ពូលF គឺមាន ៤ក្រុមក្នុងមួយពូល ខណៈពូល G និងពូល H មាន ៥ក្រុម។ បន្ទាប់មកក្រុមឈរលេខ១ និងលេខ២ នៃពូលនីមួយៗ នឹងឡើងទៅវគ្គ ១៦ក្រុមចុងក្រោយ។ សម្រាប់ពីធីបើកធ្វើឡើងកាលពីថ្ងៃទី១៤ ខែមករា ឆ្នាំ២០២៤ នឹងក្រោងបិទបញ្ចប់នៅថ្ងៃទី០៦ ខែមេសា ឆ្នាំ ២០២៤។
ខាងក្រោមនេះជាប្រវត្តិក្រុមចូលរួមប្រកួតកន្លងមក៖
លើកទី១៖ ២០១៣ ក្រុមចូលរួមមានចំនួន ៩
លើកទី២៖ ២០១៤ ក្រុមចូលរួមមានចំនួន ២២
លើកទី៣៖ ២០១៥ ក្រុមចូលរួមមានចំនួន ២៥
លើកទី៤៖ ២០១៦ ក្រុមចូលរួមមានចំនួន ២៩
លើកទី៥៖ ២០១៧ ក្រុមចូលរួមមានចំនួន ៣០
លើកទី៦៖ ២០១៨ ក្រុមចូលរួមមានចំនួន ៣១
លើកទី៧៖ ២០១៩ ក្រុមចូលរួមមានចំនួន ៣១
លើកទី៨៖ ២០២២ ក្រុមចូលរួមមានចំនួន ៣១
លើកទី៩៖ ២០២៤ ក្រុមចូលរួមមានចំនួន ៣៤
គួរបញ្ជាក់ថា សម្រាប់ការប្រកួតកីឡាបាល់ទាត់ពានរង្វាន់ មិត្តភាពយុវជនអន្តរក្រសួង-ស្ថាប័ន លើក ទី៨ ឆ្នាំ២០២២ ក្រុមក្រសួងសាធារណៈការ និងដឹកជញ្ជូន បានក្លាយជាម្ចាស់ជើងឯក បន្ទាប់ពីយកឈ្នះក្រុមក្រសួងសុខាភិបាល ៤-៣ នៅវគ្គផ្តាច់ព្រ័ត្រ និងគ្រាដែលក្រសួងសង្គមកិច្ច អតីត យុទ្ធ ជន និងយុវនិតិសម្បទា ទទួលបានចំណាត់ថ្នាក់លេខ៣ ខណ:ក្រុម Fair Play គឺយុវជនក្រសួងបរិស្ថាន៕