ក្រុមកីឡាករបាល់ទះអាយុក្រោម ២០ឆ្នាំ (U-20) ជាច្រើននាក់កំពុងចូលរួមធ្វើតេស្តសមត្ថភាពជ្រើសរើស ដើម្បីចូលរួមក្នុងក្រុមជម្រើសជាតិបាល់ទះកម្ពុជា អាយុក្រោម ២០ឆ្នាំ ត្រៀមប្រមូលផ្ដុំហ្វឹកហាត់ ចូលរួមប្រកួតពានរង្វាន់នានា នៅពេលខាងមុខ។
ក្រោមការដឹងនាំត្រួតពិន្យរបស់លោក Li Jun គ្រូបង្វឹកក្រុមជម្រើសជាតិបាល់ទះកម្ពុជា កំពុងធ្វើ តេស្ត ជ្រើសរើស កីឡាករអាយុក្រោម ២០ឆ្នាំនេះ ដោយមានការចូលរួមមកពីបណ្ដាលក្លិបធំៗចំនួន ៣គឺ យុវជនក្លិបបាល់ទះវិសាខា យុវជនសមាគមបាល់ទះក្រសួងមហាផ្ទៃ និងយុវជន របស់ក្រុមបាល់ទះស្នងការដ្ឋាននគរបាលរាជធានីភ្នំពេញ។
ការធ្វើតេស្តជម្រើសរើសនេះ គឺសម្រាប់យុវជនដែលមានអាយុក្រោម ២០ឆ្នាំ ដែលមានថ្ងៃកំណើតកើតចាប់ពីឆ្នាំ២០០៥ ឡើងទៅ។ ចំពោះពេលវេលានៃការជ្រើសរើស មិនទាន់មានការកំណត់ពេលវេលា ខណ:ការជ្រើស រើសយកត្រឹម ១៤រូបប៉ុណ្ណោះ។
គួរបញ្ជាក់ថា ការប្រមូលផ្ដុំហ្វឹកហាត់របស់ក្រុម U-20 កម្ពុជា នេះដែរ គឺដើម្បីត្រៀមប្រកួតក្នុងវគ្គជម្រុះ ក្នុងព្រឹត្តិការណ៍ Asian Men’s U20 Championship លើកទី 22 នៅទីក្រុង Surabaya ប្រទេសឥណ្ឌូនេស៊ី។ ខណ:ការប្រកួតគ្រោងចាប់ផ្ដើមចាប់ពីថ្ងៃទី២៣ ដល់ថ្ងៃទី៣០ ខែកក្កដា ឆ្នាំ២០២៤៕