បន្ទាប់ពីដំណើរការប្រកួតអស់រយ:ពេលជាង ២ខែមក ក្រុមក្រសួងអប់រំ យុវជន និងកីឡា បានក្លាយជាម្ចាស់ជើងឯក នៃពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ បន្ទាប់ពីប្រកួតដ៏ស្វិតស្វាញអស់រយ:ពេល ៧០នាទី យកឈ្នះក្រុមក្រសួងសុខាភិបាល នៅវគ្គផ្ដាច់ព្រ័ត្រ ក្នុងលទ្ធផល ២-១ នៅកីឡដ្ឋានកងយោធពលខេមរភូមិន្ទ (ស្តាតចាស់) នាថ្ងៃទី០៦ ខែមេសា ឆ្នាំ២០២៤។
សម្រាប់ជ័យជម្នះនេះ ក្រុមក្រសួងអប់រំ យុវជន យកឈ្នះកីឡា ក្រុមក្រសួងសុខាភិបាល ក្នុងលទ្ធផល ២-១ វគ្គផ្ដាច់ព្រ័ត្រ។ ខណ:ក្រុមក្រសួងការពារជាតិ យកឈ្នះក្រុមក្រសួងមុខងារសាធារណៈ ក្នុងលទ្ធផល ២-០ ដណ្ដើមចំណាត់ថ្នាក់លេខ៣ នៃការប្រកួតបាល់ទាត់ដណ្ដើមពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩។
មុនឡើងមកកាន់វគ្គផ្ដាច់ព្រ័ត្រ នៅក្នុងជំនួបវគ្គពាក់កណ្ដាលផ្ដាច់ព្រ័ត្រ កាលថ្ងៃទី០១ ខែមេសា ឆ្នាំ២០២៤កន្លងទៅ ដោយមានការប្រកួតយ៉ាងស្វិតស្វាញ ក្រុមក្រសួងអប់រំ យុវជន និងកីឡា បានត្រឹមស្មគ្នា ០-០ ជាមួយក្រុមសួងការពារជាតិ ប៉ន្តែឈ្នះដោយការទាត់បាល់ប៉េណាត់កាត់សេចក្ដី ៤-១ ខណៈប្រកួតបន្ទាប់ ក្រុមក្រុមក្រសួងសុខាភិបាល បានត្រឹមស្មគ្នា ០-០ ជាមួយ ក្រុមក្រសួងមុខងារសាធារណៈ ប៉ុន្តែបានយកឈ្នះ ដោយការទាត់បាល់ប៉េណាល់ទីកាត់សេចក្ដី ៤-១ ដូចគ្នា។
ខាងក្រោមនេះគឺជាចំណាត់ថ្នាក់ក្រុមជើងឯក ដល់លេខ៣ មានដូចខាងក្រោម៖
-ជើងឯក៖ ក្រសួងអប់រំ យុវជន និងកីឡា
-លេខ២៖ ក្រសួងសុខាភិបាល
-លេខ៣៖ ក្រុមយុវជនក្រសួងការពារជាតិ
-ក្រុម Fair Play៖ ក្រសួងមុខងារសាធារណៈ
-កីឡាករស៊ុតគ្រាប់បាល់ច្រើនជាងគេ៖ ដោក តុលា របស់ក្រសួងសុខាភិបាល
-អ្នកចាំទីល្អ៖ ឯក ចាន់សុភក្តិ របស់ក្រសួងអប់រំ យុវជន និងកីឡា
-គ្រូបង្វឹកល្អ៖ យ៉ាន់គី ស៊ីវុត្ថា របស់ក្រសួងអប់រំ យុវជន និងកីឡា
រំលឹកថា នេះគឺជាលើកទី២ហើយ ដែលក្រុមក្រសួងសុខាភិបាល បានត្រឹមជើងឯករង ដោយការប្រកួតកីឡាបាល់ទាត់ពានរង្វាន់ មិត្តភាពយុវជនអន្តរក្រសួង-ស្ថាប័ន លើក ទី៨ ឆ្នាំ២០២២ ក្រុមក្រសួងសាធារណៈការ និងដឹកជញ្ជូន បានក្លាយជាម្ចាស់ជើងឯក បន្ទាប់ពីយកឈ្នះក្រុមក្រសួងសុខាភិបាល ៤-៣ នៅវគ្គផ្តាច់ព្រ័ត្រ។
ព្រឹត្តិការណ៍នេះ មានក្រុមចូលរួមរហូតដល់ ៣៤ក្រុម ស្មើនឹង ៧២ប្រកួត បែងចែកជា ៨ពូល ដើម្បីធ្វើការប្រកួតជម្រុះ នៅទី លានវិទ្យាល័យបឹងត្របែក ក្នុងនោះពូលA ដល់ពូលF គឺមាន ៤ក្រុមក្នុងមួយពូល ខណៈពូល G និងពូល H មាន ៥ក្រុម។ បន្ទាប់មកក្រុមឈរលេខ១ និងលេខ២ នៃពូលនីមួយៗ នឹងឡើងទៅវគ្គ ១៦ក្រុមចុងក្រោយ ដែលត្រូវធ្វើការប្រកួតនៅកីឡដ្ឋានស្ដាតចាស់។ សម្រាប់ពីធីបើកធ្វើឡើងនៅថ្ងៃទី១៤ ខែមករា ឆ្នាំ២០២៤ និងបិទបញ្ចប់នៅថ្ងៃទី០៦ ខែមេសា ឆ្នាំ២០២៤។
គួរបញ្ជាក់ថា សម្រាប់លក្ខខណ្ឌចូលរួមប្រកួតប្រជែងនៅក្នុងព្រឹត្តិការណ៍នេះ រាល់កីឡាករទាំងអស់ ត្រូវតែជាមន្ដ្រីរាជការ ហើយក្រុមនីមួយៗ ត្រូវប្រកាន់ភ្ជាប់នូវស្មារតីកីឡា ទោះបីឈ្នះ ឬចាញ់ គឺជារឿងធម្មតា សំខាន់គឺការរឹតចំណងមិត្តភាព សាមគ្គីភាព និងបង្កើនទំនាក់ទំនងល្អ រវាងគ្នា និងគ្នា រាប់ចាប់ពីមន្ដ្រីរាជការក្នុងការិយាល័យ ឬនាយកដ្ឋាន រហូតដល់ក្រសួង-ស្ថាប័ននីមួយៗ តាមរយៈការប្រមូលផ្ដុំហ្វឹកហាត់ និងការប្រកួតជាដើម៕