ក្លិបបាល់ទាត់ Everton ធ្លាក់ទៅឈរលេខរៀងទី១៦ នៃតារាងចំណាត់ថ្នាក់លីគកំពូលអង់គ្លេស Premier Leauge រដូវកាល ២០២៣-២៤ បន្ទាប់ពីត្រូវបានដកអស់២ពិន្ទុបន្ថែមទៀត ពីបទបំពានច្បាប់ចាយវាយ (PSR) កាលពីយប់ថ្ងៃ៨ ខែមេសា។
នេះជាលើកទី២ ផងដែរសម្រាប់ក្លិបស្ករគ្រាប់ Everton ដែលត្រូវបានរងការកាត់ពិន្ទុក្នុងរដូវកាលនេះ ធ្វើឱ្យក្រុមបាល់ទាត់ Everton ក្រោមការដឹកនាំរបស់លោក Sean Dyche មាន២៧ពិន្ទុ ឈរលេខរៀងទី១៦ ពោលគឺលើសតែ២ពិន្ទុប៉ុណ្ណោះពីលើតំបន់កាត់ចោល ខណ: Premier League នៅសល់៧ប្រកួតទៀត មុនបញ្ចប់រដូវកាល ២០២៣-២៤។
យោងតាមការចេញផ្សាយរបស់ BBC បានឱ្យដឹងថាគណៈកម្មការឯករាជ្យបានដាក់ទណ្ឌកម្មភ្លាមៗ បន្ទាប់ពីក្លិប Everton បានសារភាពថា ខ្លួនបានបំពានច្បាប់ PSR តាមរយៈខាតបង់ប្រាក់លើស ១៦.៦លានផោន សម្រាប់រយៈពេល ៣ឆ្នាំបញ្ចប់ត្រឹមតែមិថុនា ឆ្នាំ២០២៣។
គួរដឹងថាកាលពីថ្ងៃទី១៨ ខែវិច្ឆិកា ឆ្នាំ២០២៣ កន្លងទៅ ក្លិបបាល់ទាត់ស្ករគ្រាប់ Everton ក៏ត្រូវបានកាត់ចំនួន ១០ពិន្ទុផងដែរ បន្ទាប់ពីរកឃើញថា ក្លិបបានរាយការណ៍មិនច្បាស់លាស់អំពីចំណូលចំណាយ ប្រចាំឆ្នាំរបស់ខ្លួននៅ Premier League យ៉ាងណាមិញបន្ទាប់ពីការប្តឹងតវ៉ារបស់ Everton ការកាត់ពិន្ទុបានថយមកកាត់ត្រឹម ៦ពិន្ទុវិញ៕