ក្លិបបាល់ទាត់ Life FC ដែលមានមូលដ្ឋាននៅខេត្តព្រះសីហនុ បានឈ្នះជើងឯកពានរង្វាន់លីគទី២ កម្ពុជា Cambodian League 2 រដូវកាល២០២៣-២៤ ក្រោយយកឈ្នះលើគូប្រជែងក្លិបបាល់ទាត់ក្រសួងមហាផ្ទៃ ព្រមទាំងកក់កៅអីឡើងទៅលេងលីគកំពូលកម្ពុជា (Cambodian Premier League) រដូវកាល២០២៤-២៥ ថែមទៀតផង។
ក្រោយឈ្នះជើងឯកលីគទី២កម្ពុជា ក្រុមបាល់ទាត់ Life FC បានធ្វើការសំខាន់ៗជាបន្តបន្ទាប់គួរអោយកត់សម្គាល់ដូចជា៖
ទី១) ហែពានក្រោយឈ្នះជើងឯក
ក្រោយបញ្ចប់បេសកកម្មយ៉ាងជោគជ័យ ក្នុងពានរង្វាន់លីគទី២ (Cambodian League 2) ក្លិបបាល់ទាត់ឡាយហ្វ ខេត្តព្រះសីហនុ បានដង្ហែពានរង្វាន់លីគទី២ ជុំវិញទីក្រុងនៃទីរួមខេត្តព្រះសីហនុ ជាមួយក្រុមកីឡាករ គ្រូបង្វឹក សិស្សានុសិស្សជា ច្រើន នៃសាកលវិទ្យាល័យឡាយហ្វ រួមជាមួយអ្នកគាំទ្រ ហែហមតាមដងផ្លូវថែមទៀតផង។
ក្លិបទាត់ឡាយហ្វ ខេត្តព្រះសីហនុ អាចគ្រងជើងឯកពានរង្វាន់ លីគទី២ រដូវកាលនេះបាន ក្រោយអាចរកពិន្ទុបានច្រើនជាងគេ នៅក្នុងតារាងចំណាត់ថ្នាក់ បើធៀបនឹងក្រុមទាំង៧ផ្សេងទៀតមានដូចជា ក្រុមក្រសួងមហាផ្ទៃ, វិសាខា(ខ) សៀមរាប, កងយោធពលខេមរភូមិន្ទ (ខ), អាយ អេស អាយ ដង្កោសែនជ័យ (ខ), និង ក្រុមយុវជនសាលាបាល់ទាត់ជាតិបាទី អាយុក្រោម ១៨ឆ្នាំ ។ ក្នុងនោះក្រុមឡាយហ្វ មាន៣៥ពិន្ទុពេញក្រោយឆ្លងកាត់១៨ប្រកួត ឈ្នះ១០ ស្មើ៥ និងចាញ់៣ ប្រកួត ចុងក្រោយស្មើជាមួយក្រុមក្រសួងមហាផ្ទៃ ដោយលទ្ធផល ៤-៤ ខណៈប្រកួតនោះ ជាប្រកួតចុងក្រោយ កាត់ក្តីរវាងក្រុងទាំងពីរធ្វើឡើងនៅ កីឡដ្ឋានបណ្ឌិត្យសភានគរបាលកម្ពុជា ក្នុងខេត្តកណ្តាល។
ទី២) ចុះកុងត្រាយកគ្រូបង្វឹកសំបូរបទពិសោធន៍
គ្រងជើងឯកនៃពានរង្វាន់លីគទី២ កម្ពុជា បានតែ១ថ្ងៃប៉ុណ្ណោះ ក្លិបបាល់ទាត់ឡាយហ្វ ខេត្តព្រះស៊ីហនុ ដែលមាន លោក Koo Ja Hyeon (ឈ្មោះហៅក្រៅ Peter Koo) ជាអគ្គលេខាធិការក្លឹបបាល់ទាត់ Life FC បាន ប្រកាសតែងតាំងលោក ប្រាក់ សុវណ្ណារ៉ា ជាគ្រូបង្គោលថ្មីរបស់ក្រុមក្នុងថ្ងៃទី២ ខែមេសា ឆ្នាំ២០២៤ កន្លងទៅ។
លោកប្រាក់សុវណ្ណារ៉ា បច្ចុប្បន្ន មានវ័យ ៥១ឆ្នាំធ្លាប់បានដឹកនាំក្រុមជម្រើសជាតិកម្ពុជា ចន្លោះ ឆ្នាំ២០០៨ ដល់ឆ្នាំ២០០៩ ក្រោយមកលោកបានដឹកនាំក្រុម ព្រះខ័នរាជស្វាយរៀង បាន១រដូវកាលក្នុង ឆ្នាំ ២០០៩ ក្រោយមក នៅឆ្នាំ២០១២ លោក ប្រាក់សុវណ្ណារ៉ា បានចូលដឹកនាំក្រុមជម្រើសជាតិបាន១ឆ្នាំ ចេញពីជម្រើសជាតិ លោក បានចូលដឹកនាំក្រុមណាហ្គាវើលដ៍ ចន្លោះឆ្នាំ២០១៣ ដល់ឆ្នាំ២០១៤ ក្នុងនោះលោក បាន ចូលរួមជាមួយក្រុម គិរីវង្សសុខសែនជ័យ ក្នុងឆ្នាំ២០២១៤ ដដែរ។
ចូលដល់ ឆ្នាំ២០១៥ លោក ប្រាក់ សុវណ្ណារ៉ា បានចូលរួម ជាមួយក្លិបបាល់ទាត់បឹងកេត ដល់ឆ្នាំ២០១៧ ក្រោយ មកនៅឆ្នាំ២០១៧ ដល់ឆ្នាំ២០១៨ លោកបានចូលរួមជាគ្រូជំនួយក្រុមជម្រើសជាតិ នៅឆ្នាំ២០១៩ ដល់ ឆ្នាំ២០២០ លោកបានចូលរូមមួយសមាគមន៏កីឡាករបាល់ទាត់ក្រសួងមហាផ្ទៃ។
ទី៣) ចេញទៅចងសម្ព័ន្ធភាពជាមួយដៃគូនៅអឺរ៉ុប
ក្នុងថ្ងៃទី៩ ខែមេសា ឆ្នាំ២០២៤ កន្លងទៅលោក Koo Ja Hyeon អគ្គលេខាធិការ ក្លិបបាល់ទាត់ឡាយហ្វ ខេត្តព្រះសីហនុ បានទៅធ្វើទស្សនកិច្ចនៅប្រទេសអង់គ្លេស ព្រមទាំងបានធ្វើដំណើរទៅក្លឹបបាល់ទាត់ Real Bedford ដើម្បីបង្កើតបណ្តាញ និងពង្រីកការតភ្ជាប់សម្រាប់ក្លិបបាល់ទាត់ឡាយហ្វ។
លោក Koo Ja Hyeon បានលើកឡើងថា៖ “ខ្ញុំពិតជាមានការរីករាយណាស់ក្នុងការមកដល់ Real Bedford ដើម្បីភ្ជាប់បណ្តាញ និងរៀនពីគម្រោងព្រមទាំង បទពិសោធន៍សិក្សាដ៏អស្ចារ្យពី ក្លឹបបាល់ទាត់ Real Bedford សមត្ថភាព បច្ចេកទេសរបស់កីឡាករ គឺពិតជាពូកែ គណៈគ្រប់គ្រង បុគ្គលិក និងគ្រូបង្វឹកមានភាពរួសរាយរាក់ទាក់ទៅលើរបៀបដែលពួកគេបានជួយដល់ខ្ញុំ។ ខ្ញុំមានភាពរីករាយរាល់ពេលវេលាដែលខ្ញុំនៅជាមួយក្លឹបបាល់ទាត់ Real Bedford។ នេះគឺជាអ្វីដែលពិតជាពិសេស”។
ទី៤) រៀបចំខ្លួនឱ្យត្រូវនឹងស្តង់ដាររបស់ CPL និង AFC
ក្នុងថ្ងៃទី០៥ ខែមេសា ឆ្នាំ២០២៤ កញ្ញា ជា ស្រីលីស អ្នកគ្រប់គ្រងអាជ្ញាប័ណ្ណក្លិបបាល់ទាត់របស់ក្រុមហ៊ុនខេមបូឌានព្រីមៀរលីគ Cambodian Premier League បានចុះជួបពិភាក្សាជា មួយក្លិប បាល់ទាត់ ឡាយហ្វខេត្តព្រះសីហនុ នៅកីឡដ្ឋានឡាយហ្វ ខេត្តព្រះស៊ីហនុ ផ្ទាល់ ដើម្បីជជែកពិភាក្សា ពិនិត្យនិងផ្ទៀងផ្ទាត់ឯកសារមួយចំនួនដែលបានចុះបញ្ជីក្នុងប្រព័ន្ធ AFC Club Licensing ព្រមទាំងចុះពិនិត្យមើលហេដ្ឋារចនាសម្ព័នជាក់ស្ដែងនៅក្នុងក្លិប ឱ្យស្របតាមច្បាប់ ឬល័ក្ខខ័ណ្ឌសមស្របរបស់សហព័ន្ធកីឡាបាល់ទាត់ទ្វីបអាស៊ី (AFC)។
ក្លិបបាល់ទាត់ Life FC បង្កើតឡើង ព្រមទាំងចូលប្រកួតពានរង្វាន់ផ្លូវការរបស់សហព័ន្ធកីឡាបាល់ទាត់កម្ពុជា តាំងពីឆ្នាំ២០០៩ មក តែក្លិបដែលមានមូលដ្ឋាននៅខេត្តជាប់មាត់សមុទ្រ មួយ នេះទើបអាចចូលជាសមាជិកលីគទី២ នៅរដូវកាល២០២៣-២៤។
សូមរំលឹកថាកាលពីឆ្នាំ២០០៩ ក្រុមនេះប្រើឈ្មោះថាក្រុមបាល់ទាត់សាកលវិទ្យាល័យឡាយ (Life University FC) ចូលប្រកួតពានរង្វាន់សម្តេចតេជោ ហ៊ុន សែន ពោលគឺឈ្នះ ២លើកចាញ់១លើក ក្នុងវគ្គជម្រុះតាមពូល ព្រមទាំងដឹកដៃក្រុមព្រះខ័នរាជ (បច្ចុប្បន្នព្រះខ័រាជស្វាយរៀង) ឡើងទៅវគ្គ១៦ក្រុមចុងក្រោយថែមទៀតផង។ តែចូលដល់១៦ក្រុមចុងក្រោយ ក្រុម Life University FC បានចាញ់ក្រុម Ranger FC (ប្តូរឈ្មោះពីខេមរាកីឡា) ដោយលទ្ធផល ៦ទល់៣។
តាំងពីពេលនោះមកក៏បាត់ឈ្មោះក្រុម Life FC ឈឹងតែម្តង ប៉ុន្តែមានពាក្យចចាមអារាមខ្លះថាក្រុមមួយនេះតែងតែចូលប្រកួតប្រើឈ្មោះជាក្រុមតំណាងខេត្តព្រះសីហនុ វិញ ហើយរហូតបង្ហាញខ្លួនជាថ្មីនៅឆ្នាំ២០២៣-២៤ នេះផ្ទាល់តែម្តង៕
