វប្បធម៌៖ អស់ពីរឿងមួយចូលដល់រឿងមួយទៀត ដែលបងប្អូននៅខាងផ្ទះលេខ២ ឬភាគីថៃ តែងតែមកឆ្កឹះឆ្កៀល ហើយតាមរករឿងបងប្អូនខ្មែរដល់ក្នុងរបងផ្ទះ ព្រោះបញ្ហាអ្នកផលិតមាតិកាបំភ្លៃការពិតមិនទាន់បានបិទបញ្ចប់ផងស្រាប់តែបេក្ខភាពស្រីស្អាតតំណាងឱ្យខេត្តបុរីរម្យ (Buri Ram) បានបង្ហោះរូបភាពចំនួន៣សន្លឹក នៅមុខប្រាសាទអង្គរវត្តរបស់កម្ពុជា ប៉ុន្តែជារូបភាពដែលហាក់ដូចជាបង្ហាញពីការច្រណែននិងការចង់កាឡៃប្រាប់ពិភពលោកថាប្រាសាទដ៏អច្ឆរិយៈរបស់កម្ពុជាមួយនេះជារបស់ខ្លួនទៅវិញ។
ស្រីស្អាត Amy Viranya Berry ដែលមានការសិក្សាខ្ពង់ខ្ពស់ព្រោះទៅរៀនដល់ក្រុងឡុងដ៍ ប្រទេសអង់គ្លេស នៅសកលវិទ្យាល័យ London Colleague of Fashion ប៉ុន្តែគំនិតនិងការគិតបែរជាទាបជាងក្មេងរៀនបឋមរូបនេះ បានសរសេរថា៖ «Happy Songkran Happy Thai New Year Everyone» បើគ្រាន់តែពាក្យប៉ុណ្ណឹង វាមិនមានអ្វីខុសនោះទេ ប៉ុន្តែអ្វីដែលពលរដ្ឋខ្មែរចាប់កំហុសនោះគឺនៅត្រង់ នាងបានបង្ហោះរូបថតរបស់ខ្លួននៅមុខប្រាសាទអង្គរវត្តទៅវិញទេ។
រូបភាពផ្គើនរបស់នាង បានធ្វើឱ្យពលរដ្ឋខ្មែរ ដែលមើលឃើញសម្ដែងការមិនពេញចិត្តជាខ្លាំង ព្រោះវាបានបង្ហាញចេតនាទាំងដុលរបស់នាង ដែលមានចិត្តច្រណែន និងចង់បំភាន់ភ្នែកពិភពលោកថា ប្រាសាទអង្គរវត្តជារបស់ថៃ។
សកម្មភាពរបស់នាងនេះ ត្រូវបានបងប្អូនខ្មែរអ្នកស្នេហាជាតិ និងអ្នកជាតិនិយម សម្ដែងក្ដីមិនពេញចិត្ត និងទាមទារចង់ឱ្យនាងបង្ហាញអ្វីដែលជាការពិត ព្រោះទង្វើរបស់នាងនេះ កំពុងតែបង្កឱ្យកើតមានទំនាស់គ្នា រវាងប្រជាជនខ្មែរនិងប្រជាជនថៃ ខណៈដែលកម្ពុជាកន្លងមកបានព្យាយាមរក្សាចំណងមិត្តភាពសាមគ្គីភាពក្នុងភាពជាបងប្អូនរស់នៅប្រទេសភូមិផងរបងជាមួយគ្នា។
បងប្អូនអ្នកលេងបណ្ដាញសង្គម និងសាធារណជន សង្ឃឹមថា កញ្ញា Amy Viranya Berry បេក្ខភាព Miss Grand តំណាងឱ្យខេត្តបុរីរម្យ ដែលជាខេត្តស្ថិតនៅ ភាគឦសាន្ត នឹងចេញមកពីពន្យល់ពីចេតនារបស់នាង ចំពោះការបង្ហោះផ្សព្វផ្សាយរូបភាព ៣សន្លឹក នៅមុខប្រាសាទអង្គរវត្ត របស់ខ្មែរ តើនាងមានបំណងអ្វីឱ្យពិតប្រាកដ?
