កាលពីរាត្រីថ្ងៃទី១៦ ខែមេសា ដែលជាថ្ងៃបង្ហើយនៃកម្មវិធីបុណ្យចូលឆ្នាំថ្មីប្រពៃណីខ្មែរ មហាសង្ក្រាន្តឆ្នាំរោង ព.ស២៥៦៨ គ.ស២០២៤ ដោយអត់ទ្រាំនឹងទង្វើផ្គើនរបស់បវរកញ្ញាថៃពីវេទិកា Miss Grand ពុំបានបុគ្គលល្បីនិងអ្នកជំនួញលើវិស័យម្ហូបអាហារ និងភេសជ្ជៈ Pey Pey Dy បានបន្ថែម Caption នៅលើរូបភាពរបស់កញ្ញា Amy Viranya Berry យ៉ាងខ្លី និងសាមញ្ញ ប៉ុន្តែចាក់ដោតខ្លាំង។
បេក្ខភាពតំណាងឱ្យខេត្តនាភាគឦសាន្តប្រទេសថៃ បុរីរម្យ កញ្ញា Amy បានបង្ហោះរូបភាព ៣សន្លឹកក្នុងសំលៀកបំពាក់បុរាណ ស្បៃចំហៀងពណ៌ផ្កាឈូកខ្ចីនៅមុខប្រាសាទអង្គរវត្ត និងសរសេរថា រីករាយសង្ក្រាន្ត រីករាយចូលឆ្នាំថ្មីថៃ អ្នកគ្រប់គ្នា ដែល Caption មួយនេះ ដុតកំហឹងពលរដ្ឋកម្ពុជាជាខ្លាំង ព្រោះតែកញ្ញារូបនេះបានបង្ហោះរូបភាពនៅមុខប្រាសាទអង្គរវត្តរបស់ខ្មែរ បែរជាសរសេរខ្លឹមសារខាងលើ ដែលអាចធ្វើឱ្យបរទេសមានការភាន់ច្រឡំ ហើយអាចស្មានខុសថាប្រាសាទអង្គរដ៏អច្ឆរិយៈស្ថិតនៅក្នុងប្រទេសថៃ។
យ៉ាងណាមិញជាមួយនឹងចលនារួមគ្នាឆ្លើយតបតនឹងបេក្ខភាពរូបនេះ គេឃើញមានបុគ្គលល្បីៗជាច្រើនរូបបានចេញមកបង្ហាញមតិ និង ឆន្ទៈស្នេហាជាតិមាតុភូមិ ដោយលោក Pey Pey Dy បានចែករំលែកផុសកញ្ញា Amy ហើយ សរសេរយ៉ាងខ្លីថា៖ «សូមវត្ថុសក្តិសិទ្ធិជួយកាច់វាផង» ដោយពាក្យដ៏ខ្លីនេះទទួលបានការពេញចិត្តនិងមានការចែករំលែកយ៉ាងគគ្រឹកគគ្រេងស្ដែងឱ្យឃើញពីការគាំទ្រចំពោះអ្វីដែលលោកបាននិយាយ៕