សិល្បៈជាតិ៖ ទើបតែផ្លាស់សករាជឆ្នាំចាស់ផ្លាស់ចូលឆ្នាំថ្មី តារាសម្ដែង និងពិធីការិនីកម្មវិធី 3Fun អ្នកនាង គង់ ច័ន្ទស្រីមុំ ទទួលរងនូវពាក្យរិះគន់យ៉ាងដំណំ ករណីដែលអ្នកនាងទៅដើរលេងកម្សាន្តនៅប្រទេសថៃ ដោយឡែកអ្វីដែលគួរឱ្យចាប់អារម្មណ៍ត្បិតថា មិនបានផុសចំៗ តែតារាប្រុស២ដួងគឺ តារាចម្រៀងវេហាស៍ និងតារាសម្ដែង ឆឹម សក្កដា បានបង្ហោះ Status ស្រដៀងៗគ្នា ដែលអ្នកខ្លះកាត់ន័យយល់ថា ពួកលោកទំនងជាចង់សំដៅដល់អ្នកនាង គង់ ច័ន្ទស្រីមុំ ទោះជាមិនបង្ហាញឈ្មោះត្រង់ៗក្ដី។
ក្រោយផ្ទុះករណីអ្នកនាង គង់ ច័ន្ទស្រីមុំ ទៅលេងចូលឆ្នាំនៅប្រទេសថៃ ដែលហាក់ដូចជាប្រូម៉ូតពីវប្បធម៌របស់គេនោះ លោក ឆឹម សក្កដា គូដណ្ដឹងរបស់អ្នកនាង ពេជ្រ សោភា បានសរសេរខ្លី ខ្លឹម ប៉ុន្តែស្ដាប់ហើយឈឺខួរក្បាល កាលពីថ្ងៃច័ន្ទទី១៥ ខែ មេសា ដែរថា «ខ្មែរយើងមានសង្ក្រាន្ដជាពិធីបុណ្យចូលឆ្នាំថ្មីប្រពៃណីជាតិ ហេតុអីបងប្អូនមួយចំនួនទៅគាំទ្រផ្ទះលេខពីរ អោយគេកាន់តែមើលងាយយើង? គេហ្នឹងថាគេជាម្ចាស់ដើម ព្រោះសូម្បីតែយើងក៏ទៅលេងផ្ទះគេ!»
ក្រោយមកទៀតនៅវេលាម៉ោងប្រមាណជា១២ កន្លះ គេឃើញគណនីហ្វេសប៊ុករបស់តារាចម្រៀងប្រចាំផលិតកម្មសាន់ដេរ លោក វេហាស៍ ក៏បានចេញមកបង្ហាញមតិផ្ទាល់ខ្លួន ដែលសាធារណជន យល់ស្របដូចគ្នាថា បុរសសង្ហារូបនេះទំនងជាចង់ថាឱ្យអ្នកនាង គង់ ច័ន្ទស្រីមុំ ដូចគ្នាទៅនឹងលោក ឆឹម សក្កដា ដែរ។ លោកលោក វេហាស៍ បានលើកឡើងថា៖ «លុយគេទេ គេចង់ទៅដើរលេងសង្រ្កាន្តនៅកន្លែងណា ប្រទេសណាក៏បាន សិទ្ធិគេតាស់ ទទួលស្គាល់ថាលុយគេ សិទ្ធិគេ តែចេះឈឺចាប់អត់នៅពេលដែលគេមកលេងផ្ទះខ្លួនឯងម្តងៗគេផុសដៀលក្បាលយើងម្ចាស់ផ្ទះដូចឆ្កែនៀក? បើមិនចេះឈឺចាប់រឿងគេដៀលផ្ទះខ្លួនឯងទេ ក៏គួរចេះសោកស្តាយនូវពាក្យ’សង្រ្កាន្ត’ដែលពួកវាទើបដាក់ចូលយូណេស្កូដែរ។ ទៅដើរលេងស្រុកពួកវាហើយផុសសប្បាយអបអរគគ្រឹកគគ្រែងដូចជួយផ្សព្វផ្សាយបន្ថែមអោយពិភពលោកបានដឹងថាសង្រ្កាន្តជារបស់ពួកវាចឹង។ លោកអើយលោក បើថាជ្រើមចង់ទៅដើរលេងស្រុកវាម្លឹងៗ ក៏គួរលាក់ៗខ្លះទៅ ទៅធ្វើឯងអីណាសប្បាយអឹងកងបង្ហោះបង្ហាញដល់ហើយ ទាំងដែលជនជាតិពួកវានោះផុសដៀលប្រទេសខ្លួនឯងតាម social media សឹងរាល់ថ្ងៃ។ ចេះឈឺចាប់ខ្លះផង អ្នកល្បីៗអើយ។»
មែនទែនទៅ អ្វីដែលតារាប្រុស២ដួងនេះ លើកយកមកនិយាយ មិនខុសទេ ក្នុងនាមជាតារា បុគ្គលសាធារណជន ឬមនុស្សរបស់មហាជន ចាំបាច់ត្រូវតែមានការប្រុងប្រយ័ត្នឱ្យបានខ្ពស់ ព្រោះរាល់ទង្វើ កាយវិការ ឬពាក្យពេចន៍ណាមួយនោះ គឺជាគំរូសម្រាប់អ្នកគាំទ្រ ជាពិសេសខណៈដែលបញ្ហាដ៏រសើបនិងចម្រូងចម្រាសគ្នារវាងខ្មែរនិងថៃ លើរឿងសង្ក្រាន្តទៀតនោះ ទើបមហាជន មានការព្រួយបារម្ភ ព្រោះគ្រប់រូបភាពទាំងអស់សុទ្ធតែអាចជាចំណុចខ្សោយសម្រាប់ឱ្យគេយកមកជាន់ពន្លិចលើខ្មែរយើងបាន ពិសេសអ្នកនាង គឺជាតារាល្បីដែលមានអ្នកតាមដានលើបណ្ដាញ Social Media ច្រើនសន្ធឹកសន្ធាប់រហូតដល់ទៅ១.៩M ដូច្នេះទៀត៕
