ឯកអគ្គរាជទូតមិកាមិ ឯកអគ្គរាជរបស់ជប៉ុន ប្រចាំកម្ពុជា នៅព្រឹកថ្ងៃអង្គារ ទី២៤ខែសីហា ឆ្នាំ២០២១ នេះបានជូនពរដល់កីឡាករ វ៉ាន វ៉ុន ទៅប្រកួតព្រឹត្តិការណ៍កីឡាប៉ារ៉ាឡាំពិករដូវកាលក្ដៅឆ្នាំ២០២០ (2020 Summer Paralympics) នៅទីក្រុងតូក្យូ ប្រទេសជប៉ុន។
នៅលើហ្វេសប៊ុករបស់ស្ថានទូតជប៉ុន បញ្ជាក់ថា៖«បន្ទាប់ពីការប្រកួតកីឡាអូឡាំពិកតូក្យូ២០២០ បានបញ្ចប់នៅថ្ងៃទី៨ ខែសីហា មក ការប្រកួតកីឡាប៉ារ៉ាឡាំពិកតូក្យូ២០២០ នឹងចាប់ផ្តើមនៅថ្ងៃទី២៤ ខែសីហា។ ពីប្រទេសកម្ពុជា លោក វ៉ាន វ៉ុន ជាកីឡាករប្រណាំងរទេះ នឹងចូលរួមការប្រកួតនេះ។ គាត់ត្រូវបានហ្វឹកហាត់ជាច្រើនឆ្នាំក្រោមការគាំទ្រពីអង្គការ Hearts of Gold ជាអង្គកាក្រៅរដ្ឋាភិបាលជប៉ុនមួយ ដែលបានចូលរួមជាយូរមកហើយក្នុងកិច្ចសហប្រតិបត្តិការអភិវឌ្ឍតាមរយៈកីឡា និងការអប់រំនៅកម្ពុជា។
ឯកអគ្គរាជបន្ថែមថា៖«ខ្ញុំរីករាយដែលបានឃើញអត្តពលិកដែលមានទំនាក់ទំនងជាមួយជប៉ុន នឹងធ្វើជាតំណាងឱ្យប្រទេសកម្ពុជា នៅក្នុងការប្រកួតកីឡាប៉ារ៉ាឡាំពិកទីក្រុងតូក្យូ២០២០។ ខ្ញុំសូមជូនពរឱ្យគាត់សម្រេចបានជោគជ័យ ហើយខ្ញុំក៏សង្ឃឹមថា គាត់នឹងផ្តល់ការលើកទឹកចិត្ត និងក្តីសង្ឃឹមដល់ប្រជាជនទាំងអស់នៅក្នុងប្រទេសជប៉ុន និងប្រទេសកម្ពុជា ក៏ដូចជាប្រជាជនទូទាំងពិភពលោកផងដែរ»។
អត្ថបទពាក់ព័ន្ធ៖ប្រតិភូនិងអត្តពលិកកម្ពុជា ធ្វើដំណើរដល់ជប៉ុនហើយ ត្រៀមប្រកួតកីឡាប៉ារ៉ាឡាំពិក
«គ្រប់គ្នាបានដឹងហើយថា ការប្រកួតប៉ារ៉ាឡាំពិករដូវក្តៅ គឺជាការប្រកួតប្រជែងលំដាប់ថ្នាក់ពិភពលោករបស់អត្តពលិកជនពិការ។ វាត្រូវបានគេប្រារព្ធធ្វើរៀងរាល់៤ឆ្នាំម្តងនៅទីក្រុងដដែលដូចនឹងកីឡាអូឡាំពិក។ ខ្ញុំជឿជាក់ថា យើងមិនត្រឹមតែរំភើបចិត្តដោយការប្រកួតប្រជែងប៉ុណ្ណោះទេ ប៉ុន្តែយើងក៏បានរៀនសូត្រជាច្រើន ឧទាហរណ៍ដូចជា ភាពសម្បូរបែបនៃគុណតម្លៃនៅក្នុងសង្គមរបស់យើង និងសារៈសំខាន់នៃការបន្តការព្យាយាម។ សូមគាំទ្រអត្តពលិកប៉ារ៉ាឡាំពិកទាំងអស់គ្នា»។
សូមបញ្ជាក់ថានេះជាលើកទី៦ហើយ ដែលកម្ពុជា បញ្ជូនអត្តពលិកទៅប្រកួតក្នុងព្រឹត្តិការណ៍ប៉ារ៉ាឡាំពិក ដោយក្នុងនោះមានឆ្នាំ២០០០,២០០៤,២០០៨,២០១២,២០១៦និង២០២០ នេះ។ កីឡា 2020 Summer Paralympics បើកឱ្យប្រកួតចំនួន២២កីឡា មាន៥៤០វិញ្ញាសា ដោយចាប់ផ្ដើមប្រកួតពីថ្ងៃទី២៤ សីហា ដល់៥ កញ្ញា ឆ្នាំ២០២១ នៅប្រទេសជប៉ុន ដោយរំពឹងថានឹងមានអត្តពលិកចូលរួមប្រកួតប្រមាណជាង៤ពាន់៕
