មន្ទីរទេសចរណ៍រាជធានី ខេត្ត ត្រូវផ្ដល់យោបល់ជូនរដ្ឋបាលរាជធានី ខេត្ត ដោយមិនត្រូវផ្ដល់អាជ្ញាប័ណ្ណទេសចរណ៍ឱ្យអាជីវកម្មក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្គាឌិនទាំងឡាយណា ដែលគ្មាន ច្រកសុវត្ថិភាព បំពាក់ប្រព័ន្ធបង្ការ និងពន្លត់អគ្គិភ័យ ប្រព័ន្ធផ្ដល់សញ្ញាប្រកាសអាសន្នឱ្យភ្ញៀវបានដឹងពេលមាន អគ្គិភ័យឆាបឆេះ។ នេះជាខ្លឹមសារនៃសារាចរណែនាំ ស្ដីពី ការគ្រប់គ្រងប្រព័ន្ធអគ្គិភ័យនៅតាមមណ្ឌលកម្សាន្តទេសចរណ៍មនុស្សពេញវ័យ (ក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្គាឌិន) របស់ក្រសួងទេសចរណ៍ ដែលប្រកាសចេញកាលពីថ្ងៃទី ១៧ ខែមេសា ឆ្នាំ ២០២៤។
តាមរយៈសារាចរនេះក្រសួងក៏បានណែនាំដល់មន្ទីរទេសចរណ៍រាជធានី ខេត្ត ត្រូវសហការជាមួយស្ថាប័នពាក់ព័ន្ធ រដ្ឋបាលថ្នាក់ក្រោមជាតិ អង្គភាព ជំនាញផ្នែកបច្ចេកទេសប្រព័ន្ធបង្ការ និងពន្លត់អគ្គិភ័យ ដើម្បីផ្សព្វផ្សាយអំពីវិធានការបង្ការ និងទប់ស្កាត់អគ្គិភ័យ នៅតាមមណ្ឌលកម្សាន្តទេសចរណ៍មនុស្សពេញវ័យ (ក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្គាឌិន)។
មន្ទីរទេសចរណ៍រាជធានី ខេត្ត ត្រូវណែនាំឱ្យម្ចាស់ ឬអ្នកគ្រប់គ្រងអាជីវកម្មមណ្ឌលកម្សាន្តទេសចរណ៍ មនុស្សពេញវ័យ (ក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្គាឌិន) ត្រូវយកចិត្តទុកដាក់ និងទប់ស្កាត់ គ្រោះអគ្គិភ័យ ដោយត្រូវរៀបចំឱ្យមាន៖
– ច្រកសុវត្ថិភាព ស្លាកសញ្ញាបង្ហាញច្រកសុវត្ថិភាព ប្រព័ន្ធបង្ការ និងពន្លត់អគ្គិភ័យ បំពង់ពន្លត់ អគ្គិភ័យនៅគ្រប់ទីកន្លែង តាមជាន់ និងតាមបន្ទប់នីមួយៗ នៅក្នុងបរិវេណអាជីវកម្មមណ្ឌលកម្សាន្ត ទេសចរណ៍មនុស្សពេញវ័យ
– បំពាក់ប្រព័ន្ធជូនដំណឹងកាត់ផ្ដាច់ចរន្តអគ្គិសនីដោយស្វ័យប្រវត្តិ ក្នុងករណីមានអគ្គិភ័យកើតឡើងជាយថាហេតុ។
រដ្ឋបាលថ្នាក់ក្រោមជាតិ មន្ទីរទេសចរណ៍រាជធានី ខេត្ត ប្រតិបត្តិករ ទេសចរណ៍ និងអង្គភាពក្រោមឱវាទក្រសួងទេសចរណ៍ ត្រូវអនុវត្តតាមខ្លឹមសារខាងលើឱ្យមានប្រសិទ្ធភាពប្រកបដោយស្មារតីទទួលខុសត្រូវខ្ពស់ ចាប់ពីថ្ងៃចុះហត្ថលេខានេះតទៅ ដើម្បីធានាឱ្យបាននូវសន្តិសុខ សុវត្ថិភាព និងការពារអាយុជីវិតភ្ញៀវ ទ្រព្យសម្បត្តិ សណ្ដាប់ធ្នាប់សាធារណៈ និងសុវត្ថិភាពសង្គមពីគ្រោះអគ្គិភ័យ នៅតាមមណ្ឌលកម្សាន្តទេសចរណ៍មនុស្សពេញវ័យ (ក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្គាឌិន)៕