“យោគៈ និងសមាធិ ដើម្បីបង្កើនគុណភាពជីវិត លើកទី៤” គឺជាកម្មវិធីមួយដែលរៀបចំឡើងដោយសភាយុវពាណិជ្ជករអន្តរជាតិកម្ពុជា សាខាទួលគោក ក្នុងគោលបំណង លើកកម្ពស់ការយល់ដឹងអំពីសារប្រយោជន៍នៃ យោគៈ និងសមាធិ ចំពោះសុខភាពផ្លូវកាយ និងផ្លូវចិត្ត ដែលជាកាតាលីករចម្បងមួយក្នុងការជំរុញ សុខុមាលភាពផ្លូវចិត្ត ការប្រាស្រ័យទាក់ទងល្អ ប្រសិទ្ធភាព និងផលិតភាពការងារ ក៏ដូចជាបង្កើននូវគុណភាពរស់នៅកាន់តែប្រសើរ ទៅដល់អ្នកចូលរួម និងសាធារណជនជាច្រើនរយនាក់។
ប្រធានគម្រោង កញ្ញា ជោត ដាលីន បានឱ្យដឹងថា កម្មវិធី “យោគៈ និងសមាធិ ដើម្បីបង្កើនគុណភាពជីវិត លើកទី៤” នេះ នឹងប្រព្រឹត្តទៅក្រោមប្រធានបទដ៏ស៊ីជម្រៅមួយគឺ «តុល្យភាព ការងារ និងជីវិតរស់នៅ» ដោយផ្ដោតសំខាន់ទៅលើ ការថែរក្សាសុខភាពផ្លូវចិត្ត ជាពិសេសក្នុងអំឡុងវិបត្តិសេដ្ឋកិច្ចនេះ ដោយសារតែយើងសង្កេតឃើញថា មនុស្សជាច្រើនកំពុងតែចំណាយពេលវេលាស្ទើរតែទាំងអស់របស់ខ្លួនទៅលើការងារ ដោយពុំបានគិតគូរពីសុខុមាលភាពផ្លូវចិត្ត បណ្ដាលឱ្យពួកគាត់ជួបប្រទះនូវបញ្ហាសុខភាពផ្លូវចិត្តកាន់តែច្រើនឡើង ជាពិសេសក្នុងខណៈពេលដ៏លំបាកនេះ។ គួរបញ្ជាក់ផងដែរថា កាលពីឆ្នាំ២០២៣កន្លងទៅ កម្មវិធីនេះបានប្រព្រឹត្តទៅយ៉ាងរលូន និងជោគជ័យតាមការរំពឹងទុក ក្រោមការនិមន្តចូលរួមពីសំណាក់ព្រះភិក្ខុ វជិរប្បញ្ញោ គូ សុភាព, និងវាគ្មិនកិត្តិយសលោក នឹម ឈុន្នី, អ្នកនាង យីម សុធារី និងលោក យាន់ វណ្ណៈ ព្រមទាំងសាធារណជនជិតឆ្ងាយប្រមាណជាង២០០នាក់ទៀតផង។
សភាយុវពាណិជ្ជករអន្តរជាតិកម្ពុជា សាខាទួលគោក ពិតជាសង្ឃឹមយ៉ាងមុតមាំថា កម្មវិធីលើកទី៤នេះ នឹងទទួលបានការចូលរួម និងគាំទ្រពីសំណាក់សាធារណជនកាន់តែច្រើនជាងកាលពីឆ្នាំកន្លងទៅទៀត ដើម្បីបញ្ជ្រាបការយល់ដឹងអំពីសារសំខាន់នៃសុខុមាលភាពផ្លូវចិត្ត ក៏ដូចជាអត្ថប្រយោជន៍ដ៏លើសលប់នៃយោគៈ និងសមាធិឱ្យបានកាន់តែទូលំទូលាយនៅក្នុងសង្គមរបស់យើង។ ឆ្លៀតក្នុងឱកាសនេះផងដែរ សភាយុវពាណិជ្ជករអន្តរជាតិកម្ពុជា សាខាទួលគោក ក៏ចង់សម្តែងនូវសេចក្តីសោមនស្សរីករាយ និងថ្លែងអំណរគុណយ៉ាងក្រៃលែង ទៅដល់ក្រុមហ៊ុន Phnom Penh Precast Plants, Three Corner Coffee Rostar, SCPC Automation, Urban Dynamics, កាយា ទឹករ៉ែធម្មជាតិ, Pixel Entertainment, AIA Cambodia និងក្រុមហ៊ុនជាច្រើនទៀត ដែលបានចូលរួមឧបត្ថម្ភគាំទ្រគម្រោងនេះឱ្យប្រព្រឹត្តិទៅបាន។
ស្របពេលនេះផងដែរ សភាយុវពាណិជ្ជករអន្តរជាតិកម្ពុជា សាខាទួលគោក ពិតជាមានកិត្តិយស សូមគោរពអញ្ជើញ សមាជិកសភាយុវពាណិជ្ជករអន្តរជាតិកម្ពុជា និងសាធារណជនទាំងអស់ចូលរួមកម្មវិធី “យោគៈ និងសមាធិ ដើម្បីបង្កើនគុណភាពជីវិត លើកទី៤” នាពេលខាងមុខនេះ ដោយចុះឈ្មោះតាមរយៈតំណភ្ជាប់ខាងក្រោម ៖ https://forms.gle/q6eDkG9UK8oHWGWt9
(ផុតកំណត់ចុះឈ្មោះត្រឹមថ្ងៃទី២៦ ខែមេសា ឆ្នាំ២០២៤ /សំបុត្រមានចំនួនកំណត់)។
