បទ បថ្យាវត្ត
ភ្លើងពណ៌ចម្រុះឆ្លុះច្បាស់ភក្ត្រា ឃើញទាំងរុក្ខានាពេលរាត្រី
តាំងនៅសួនច្បារទើបសាងសង់ថ្មី អមដោយតន្ត្រីពិព័រណ៍ចម្រុះ។
ទំនិញច្រើនមុខផ្គាប់ចិត្តស្រីប្រុស ទៅដល់មិនខុសទេក្រុងព្រៃវែង
ចាក់ក្បាច់រាំងវែងក្រឡុកគ្រលែង កក្រើកព្រៃវែងថ្ងៃចូលឆ្នាំខ្មែរ។
ថ្ងៃក្តៅបន្តិចក៏មិនអន់ដែរ ក្មេងចាស់លម្ហែដោយស្នាមញញឹម
មានបទកន្ត្រាក់ញាក់ទាំងកន្ទ្រឹម រហើយរហឹមទីត្រជាក់ចិត្ត។
មន្ត្រីប្រជាកៀកគ្នាស្នាលស្និទ្ធ លេងល្បែងរួមចិត្តប្រជាប្រិយខ្មែរ
ទាញព្រ័ត្រវាយក្អមចោលឈូងផ្សងស្នេហ៍ គោដៅរួមថែដំណែលដូនតា។
ចូលឆ្នាំព្រៃវែងមានអន់ឯណា ក្មេងចាស់ពោលថាសប្បាយគ្រប់គ្នា
ស្រុកសន្តិភាពយើងប្រាកដជា សប្បាយជុំគ្នាជារៀងរាល់ឆ្នាំ៕
អត្ថបទ៖សំ នឿន