ថ្លែងនៅក្នុងកម្មវិធីសម្ពោធអគារសហសិក្សា អគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នៅសាកលវិទ្យាល័យការពារជាតិ កាលពីព្រឹកថ្ងៃទី ១៩ ខែមេសា ឆ្នាំ ២០២៤ សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវអនុសាសន៍ចំនួន៩ចំណុចសំខាន់ៗ ដើម្បីបន្តគាំទ្រ និងជំរុញដល់វិស័យការពារជាតិរបស់កម្ពុជាឲ្យកាន់តែរឹងមាំ ខ្លាំងក្លា ប្រកបដោយឧត្ដមគតិ និងមានសមត្ថភាពគ្រប់គ្រាន់ក្នុងការការពារឯករាជ្យជាតិ អធិបតេយ្យ បូរណភាពទឹកដី ថែរក្សាការពារសុខសន្តិភាព និងសមិទ្ធផលសង្គមជាតិ ចូលរួមចំណែកយ៉ាងសកម្មក្នុងការកសាង និងពង្រឹងនីតិរដ្ឋ និងចូលរួមចំណែកអភិវឌ្ឍប្រទេសជាតិ។
ទី១៖ បន្តធ្វើកំណែទម្រង់ស៊ីជម្រៅលើគ្រប់វិស័យក្នុងកងយោធពលខេមរភូមិន្ទ ចាប់តាំងពីស្ថាប័នថ្នាក់ដឹកនាំបញ្ជា រហូតដល់កងឯកភាពឲ្យបានសម្រេចប្រកបដោយតម្លាភាព គណនីភាព និងស្មារតីសាមគ្គីភាព ទទួលខុសត្រូវបំផុត។
ទី២៖ វិស័យកសាង ពង្រឹងខឿនការពារជាតិ កងយោធពលខេមរភូមិន្ទត្រូវតែជាកងកម្លាំងដែលមានថាមពលខ្លាំងក្លា សមត្ថភាពពេញលេញ មានឆន្ទៈមោះមុត មនសិការ និងវិន័យល្អ ការពារបានរឹងមាំនូវឯករាជ្យជាតិ អធិបតេយ្យ បូរណភាពទឹកដី សន្តិសុខ សណ្ដាប់ធ្នាប់សង្គម គ្រប់កាលៈទេសៈ សំដៅធ្វើឲ្យបរាជ័យរាល់ឧបាយកល និងសកម្មភាពដែលបង្កមហន្តរាយដល់ប្រទេសជាតិ។ ទោះក្នុងតម្លៃណាក៏ដោយ ត្រូវរក្សាឲ្យបាននូវសន្តិភាព ហើយសកម្មក្នុងការទប់ស្កាត់រាល់បទល្មើសបានទាន់ពេលវេលា។
ទី៣៖ ត្រូវកែទម្រង់រចនាសម្ព័ន្ធចាត់តាំង កងឯកភាពត្រូវអនុវត្តតាមគោលការណ៍វិសមិតមុខងារតួនាទី ភារកិច្ច របស់ស្ថាប័នកងឯកភាព ដើម្បីលុបបំបាត់ភាពត្រួតគ្នាឲ្យបានសម្រេចតាមដំណាក់កាលនីមួយៗ យ៉ាងម៉ឺងម៉ាត់ហ្មត់ចត់។ រីឯចំនួនកងទ័ពតាមស្ថាប័នបញ្ជាការ ស្ថាប័នកងឯកភាពនានា ត្រូវស្ថិតនៅក្នុងកម្រិតសមស្រប។ ជាមួយគ្នានេះ សមាមាត្ររវាងនាយទាហាន និងពលទាហានត្រូវឲ្យមានភាពសមស្រប ហើយជាពិសេស ខិតខំលុបបំបាត់ឲ្យបានជាជំហានៗ នូវស្ថានភាពចំនួនទ័ពលើស តែខ្វះ ទ័ពខ្វះ តែលើស ដោយក្នុងនោះ៖
១– ត្រូវសិក្សាស្រាវជ្រាវឲ្យបានហ្មត់ចត់អំពីច្បាប់កាតព្វកិច្ចយោធា និងឯកសារគតិយុត្តិពាក់ព័ន្ធ ដែលមានរួចមកហើយ ពិចារណាកែសម្រួល បំពេញបន្ថែមឲ្យបានពេញលេញ ដើម្បីស្នើសុំធ្វើវិសោធនកម្ម និងកសាងបន្ថែមនូវឯកសារគតិយុត្តិពាក់ព័ន្ធចាំបាច់ ឆ្ពោះទៅអនុវត្តច្បាប់កាតព្វកិច្ចយោធាឲ្យបានជាជំហានៗស្របតាមសភាពការណ៍ និងភារកិច្ចការពារជាតិនៅពេលវេលាសមស្របខាងមុខ។
២– ធ្វើការជ្រើសរើសតែងតាំង និងដំឡើងឋានន្តរស័ក្តិនឹងត្រូវអនុវត្តបានត្រឹមត្រូវតាមគោលការណ៍គុណាធិបតេយ្យ ដោយផ្អែកតាមមុខតំណែង និងច្បាប់សហលក្ខន្តិកៈទូទៅ សម្រាប់យោធិន នៃកងយោធពលខេមរភូមិន្ទ ហើយត្រូវតែឆ្លងកាត់តាមរយៈការវាយតម្លៃ របស់ក្រុមប្រឹក្សា និងគណៈកម្មការវាយតម្លៃរបស់កងឯកភាពតាមឋានានុក្រម។
ត្រូវខិតខំផ្ដល់អាទិភាព ចំពោះការបណ្ដុះបណ្ដាលក្នុងស្រុក លើកលែងតែការបណ្ដុះបណ្ដាលជំនាញបច្ចេកទេសជាន់ខ្ពស់ ដែលត្រូវពឹងផ្អែកលើកការបណ្ដុះបណ្ដាលនៅក្រៅប្រទេស ដើម្បីធ្វើការបណ្ដុះបណ្ដាលនាយទាហានដឹកនាំបញ្ជា នាយទាហានគ្រប់គ្រងវ័យក្មេងសម្រាប់បន្តវេនដឹកនាំ គ្រប់គ្រងតាមស្ថាប័នកងឯកភាព។
ការចាត់បញ្ជូនយោធិនឲ្យចូលរៀនតាមគ្រឹះស្ថានសិក្សា ត្រូវគោរពតាមគោលការណ៍នៃការជ្រើសរើសលក្ខណៈសម្បត្តិយោធិនតាមវគ្គនីមួយៗ របស់ក្រសួងការពារជាតិ។
ទី៤៖ ការងារហ្វឹកហ្វឺននៅតាមបណ្ដាសាលា ការងារបណ្ដុះបណ្ដាល កសាងធនធានមនុស្ស ពោលគឺជាថ្នាលបណ្ដុះពូជនាយទាហានវ័យក្មេង ដែលនឹងក្លាយជានាយទាហានថ្នាក់ដឹកនាំបញ្ជា និងគ្រប់គ្រងស្ថាប័នកងឯកភាពគ្រប់លំដាប់ថ្នាក់។
១– ត្រូវបន្តកសាងពង្រឹងជួយដល់យោធាចារ្យ ក៏ដូចជាសាលា រាល់ឯកសារបង្រៀនគ្រប់ជំនាញ និងគ្រប់មុខវិជ្ជាឲ្យមានគុណភាព និងសមត្ថភាពពេញលេញ គ្រប់លក្ខណៈសម្បត្តិ និងស្របតាមការវិវឌ្ឍនៃវិស័យបច្ចេកវិទ្យាយោធា។ ចំពោះយោធាចារ្យ ក្រសួងការពារជាតិ និងស្ថាប័នពាក់ព័ន្ធ ត្រូវយកចិត្តទុកដាក់បង្កើនសមត្ថភាព ដោយធ្វើការបំពាក់បំប៉នគរុកោសល្យ និងការគិតគូរគោលនយោបាយឲ្យបានច្បាស់លាស់ ដូចជាការជំរុញឲ្យអនុវត្តនូវគោលការណ៍ដែលមានស្រាប់ ស្ដីពីប្រាក់កម្រៃម៉ោងបង្រៀន ប្រាក់សម្រាប់ការស្រាវជ្រាវឲ្យបានទាន់ពេលវេលា មានតម្លាភាព និងផ្ដល់កិត្តិយស គិតគូរពីឋានន្តរសក្ដិ គ្រឿងឥស្សរិយយស បណ្ណែសរសើរ ព្រមទាំងគិតគូរជាអាទិភាពកសាងយោធាចារ្យថ្មីបន្តវេន ដោយជ្រើសរើសពិនិត្យអ្នកដែលរៀនបានពិន្ទុខ្ពស់ និងយោធិនដែលមានស្នាដៃល្អក្នុងការគ្រប់គ្រងកងឯកភាពមកបណ្ដុះបណ្ដាលយោធាចារ្យវិលជុំ។
២– ទន្ទឹមនឹងការអនុវត្តភារកិច្ចស្នូល ត្រូវសហការគ្នាយ៉ាងស្អិតល្មួត ប្រែក្លាយសាលាទៅជាមជ្ឈមណ្ឌលប្រមូលផ្ដុំសិក្សាស្រាវជ្រាវ កសាងឯកសារយោធាគ្រប់ជំនាញឲ្យបានឯកភាពគ្នា រួមទាំងឯកសារបច្ចេកវិទ្យាវិទ្យាសាស្ត្រយោធា ឯកសារសេដ្ឋកិច្ចនយោបាយយោធា និងអប់រំចិត្តសាស្ត្រ។
ត្រូវបង្កលក្ខណៈល្អឲ្យគ្នាទៅវិញទៅមក និងសហការគ្នាដកស្រង់ពីការបំពេញភារកិច្ចរបស់ខ្លួន កសាងឲ្យបាននូវសូចនាករសំខាន់ៗ ចាំបាច់នានា សម្រាប់បម្រើការក្នុងវិស័យការពារជាតិ ហើយផ្លាស់ប្ដូរព័ត៌មានចាំបាច់ឲ្យគ្នា សម្រាប់ការសិក្សាស្រាវជ្រាវ និងដកពិសោធន៍ ដើម្បីជាមូលដ្ឋានក្នុងការធ្វើផែនការយុទ្ធសាស្ត្រ។
ត្រូវសិក្សាស្រាវជ្រាវ ដកបទពិសោធន៍សង្គ្រាមពីតាមបណ្ដាប្រទេសនានា ទាំងពីអតីតកាល និងបច្ចុប្បន្ន ជាមួយនឹងការក្ដាប់បាននូវការបំពាក់តាមលទ្ធភាពជាក់ស្ដែងឲ្យស្របតាមកាលវិវឌ្ឍរីកចម្រើនចុងក្រោយនៃវិស័យបច្ចេកវិទ្យាយោធា។
ត្រូវយកចិត្តទុកដាក់បន្ថែមលើការបណ្ដុះបណ្ដាល និងគ្រប់គ្រងធនធានមនុស្ស ដោយព្យាយាមសិក្សាស្រាវជ្រាវ បន្តអភិវឌ្ឍចំណេះជំនាញរបស់ខ្លួនមិនឈប់ឈរ ដើម្បីពង្រឹងពង្រីកចំណេះដឹង ឲ្យបានទាន់កាលវិវឌ្ឍរីកចម្រើននៃបច្ចេកវិទ្យាយោធា។
ត្រូវយកចិត្តទុកដាក់ពង្រឹងហេដ្ឋារចនាសម្ព័ន្ធតាមបណ្ដាសាលា មជ្ឈមណ្ឌលហ្វឹកហ្វឺន ដែលមានស្រាប់ និងកំពុងតែបង្កើតថ្មីឲ្យស្របតាមនិយាម និងគោលដៅតាមជំនាញ ព្រមទាំងបំពាក់សម្ភារៈហ្វឹកហ្វឺនទំនើបៗស្របទៅតាមលទ្ធភាពដែលអាចធ្វើបាន។
ក្រៅពីការពង្រឹងប្រព័ន្ធហ្វឹកហ្វឺននៅតាមសាលា ក្រសួងការពារជាតិ កងយោធពលខេមរភូមិន្ទ នាយទាហានគ្រប់លំដាប់ថ្នាក់ត្រូវយកចិត្តទុកដាក់បន្ថែមលើការហ្វឹកហាត់លើទីលានតាមកងឯកភាពទៅតាមជំនាញឯកទេសនីមួយៗ ដើម្បីជាការគ្រប់គ្រងកម្លាំង គ្រឿងបំពាក់ និងបង្កើនសមត្ថភាពកងទ័ព។
ទី៥៖ ត្រូវបង្កើនទំនាក់ទំនងសហប្រតិបត្តិការល្អជាមួយដៃគូបរទេស ក៏ដូចជាបណ្ដាប្រទេសជាមិត្ត ដើម្បីផ្លាស់ប្ដូរបទពិសោធន៍ រួមទាំងការជួយឧបត្ថម្ភផ្នែកស្មារតី និងសម្ភារៈដល់វិស័យហ្វឹកហ្វឺន រៀនសូត្ររបស់យើង ដោយឈរលើស្មារតីការពារឧត្ដមប្រយោជន៍របស់កងយោធពលខេមរភូមិន្ទស្របតាមអភិក្រម កែទម្រង់ខាងក្នុង បង្កើនមិត្តខាងក្រៅ ក្នុងស្មារតីឯករាជ្យ។
ទី៦៖ ការងារអប់រំចិត្តសាស្ត្រ ព័ត៌មាន និងគោលនយោបាយ ជាកិច្ចការដែលមិនអាចខ្វះបាន ក្នុងការកសាងឆន្ទៈមនសិការ ស្នេហាជាតិមាតុភូមិ សំដៅសម្រេចភារកិច្ចការពារជាតិ ដែលជាតិគុណសម្បត្តិចម្បងរបស់នាយទាហាន ពលទាហានគ្រប់រូប។
ទី៧៖ ការកែទម្រង់គ្រឿងបំពាក់គ្រប់ប្រភេទ សម្រាប់គ្រប់ប្រភេទកងទ័ព កងទ័ពជំនាញ ទន្ទឹមនឹងការបំពេញបរិមាណតាមក្របខ័ណ្ឌបំពាក់ ត្រូវយកចិត្តទុកដាក់លើគុណភាពជាអាទិភាព។ កន្លងមករាជរដ្ឋាភិបាល និងក្រសួងការពារជាតិបានខិតខំស្វែងរក និងបង្កប្រភព ដោយបានធ្វើការបំពាក់បន្ថែមនូវអាវុធយុទ្ធោបករណ៍ទំនើបៗជាច្រើន ដើម្បីឆ្លើយតបនឹងសំណូមពរភារកិច្ចការពារជាតិ។ ហើយសូមយកចិត្តទុកដាក់ថែទាំបច្ចេកទេស និងធានាប្រសិទ្ធភាពនៃការប្រើប្រាស់ឲ្យបានយូរអង្វែង។
ទី៨៖ ការងារធានា ភស្តុភារ និងហិរញ្ញវត្ថុ ត្រូវយកចិត្តទុកដាក់គ្រប់គ្រង ការងារធានា ផ្គត់ផ្គង់ បើក ចែក តាមគោលរបបកំណត់ គ្រប់ ទាន់ពេលវេលា ធានាគុណភាពដល់យោធភូមិភាគ និងយោធិនគ្រប់រូប គួបផ្សំនឹងការខិតខំកែច្នៃជីវភាពរស់នៅ សុខុមាលភាពយោធិន ដោយការបង្កបង្កើនផលបន្ថែម លើកកម្ពស់ជីវភាពរស់នៅរបស់យោធិន និងក្រុមគ្រួសារឲ្យបានល្អប្រសើរ។ ត្រូវយកចិត្តទុកដាក់លើការងារសម្ព័ន្ធមេត្រីភាពរវាងកងទ័ព ជាមួយស្ថាប័នស៊ីវិល និងឯកជន និងតាមដាន គ្រប់គ្រង ត្រួតពិនិត្យ នូវការប្រើប្រាស់ជំនួយឧត្ថម្ភរបស់ដៃគូឲ្យចំគោលដៅ។
ទី៩៖ ត្រូវត្រៀមលក្ខណៈជានិច្ចក្នុងការបំពេញភារកិច្ចនានា តាមបទបញ្ជារបស់រាជរដ្ឋាភិបាលនៅគ្រប់កាលៈទេសៈ យកចិត្តទុកដាក់ត្រៀមកម្លាំង និងមធ្យោបាយ សម្ភារៈគ្រប់បែបយ៉ាង ដើម្បីចូលរួមជួយសង្គ្រោះប្រជាពលរដ្ឋនៅពេលដែលមានគ្រោះភ័យជាយថាហេតុ ដោយត្រូវមានស្មារតីបុរេសកម្ម ព្រមទាំងសហការឲ្យបានស្អិតល្មួតជាមួយអាជ្ញាធរដែនដី នៅក្នុងក្រសួងស្ថាប័នពាក់ព័ន្ធ។
សម្ដេចធិបតី ក៏បានបង្ហាញនូវសេចក្ដីសង្ឃឹមយ៉ាងមុតមាំលើយោធិនគ្រប់លំដាប់ថ្នាក់នៃកងយោធពលខេមរភូមិន្ទថា នឹងនៅតែបន្តប្រពៃណីសាមគ្គី ឯកភាព ជាធ្លុងមួយ ដោយមានការដឹកនាំបញ្ជា ប្រកបដោយទេពកោសល្យ ឆន្ទៈមោះមុត និងស្មារតីទទួលខុសត្រូវខ្ពស់របស់ឯកឧត្ដមឧបនាយករដ្ឋមន្ត្រី រដ្ឋមន្ត្រីការពារជាតិ ក្នុងការបំពេញភារកិច្ចដែលរាជរដ្ឋាភិបាលបានប្រគល់ជូន។
អត្ថបទ៖ ឈិន ធារ៉ាត់
