សិល្បៈជាតិ៖ តារាសម្ដែងដ៏ស្រស់សោភា កញ្ញា សឹម ស្រីនិច្ច គឺជាបុប្ផាមួយទងដ៏ស្រស់សោភាហើយក៏ជានារីម្នាក់ដែលមានបុរសមិនតិចឡើយចោមរោមនិងប៉ងប្រាថ្នាកញ្ញា ប៉ុន្តែកញ្ញាយើងបែរជាពោលពាក្យក្នុងចិត្តថាខ្លួនស័ក្តិសមនឹងនៅម្នាក់ឯង ព្រមទាំងអរគុណយុគ៩ថែមទៀត។
នៅយប់ថ្ងៃអាទិត្យ ទី២១ ខែមេសា កញ្ញា សឹម ស្រីនិច្ច បានបញ្ចេញសារមួយនៅលើគណនីហ្វេសប៊ុករបស់ខ្លួន ហើយបើមើលតាមការរៀបរាប់ កញ្ញាហាក់ដូចជាកំពុងតែនិយាយបញ្ជោះបន្សោកឱ្យជីវិតរបស់ខ្លួនដែលប្រឹងប្រែងធ្វើការរយៈពេល១០ឆ្នាំ ដោយមិនខ្លាចហត់នឿយ ដើម្បីរងចាំមើលជីវិតគូ ប៉ុន្តែចុងក្រោយបែរជាសម្រេចចិត្តថាខ្លួនសមនឹងរស់នៅម្នាក់ឯងទៅវិញ។ អ្នកនាងបានលើកឡើងថា៖ «ពេលនេះម៉ោងនេះខ្ញុំក៏បានដឹងយ៉ាងច្បាស់បំផុតថា រយៈពេលធ្វេីការ១០ឆ្នាំមកនេះមានរយៈពេល៧ឆ្នាំដែលខ្ញុំមិនហ៊ានសូម្បីតែសម្រាកពេលយប់ថតរឿងខ្មោចពេលថ្ងៃថតរឿងភាគរត់ទៅឆ្លៀត event រត់ទៅថតផលិតផលរត់ទៅច្រៀងរត់ទៅធ្វេី MC នោះព្រោះការប្រឹងសន្សំទាំងញេីសឈាមដោយបៀមក្នុងចិត្តមិនត្អូញមិនប្រាប់អ្នកណាឡេីយ ហេីយខ្ញុំក៏ទុកក្នុងចិត្តម្នាក់ឯងរងចាំមេីលថាតេីខ្ញុំគួរមានជីវិតគូ រឺបែបណា តេីខ្ញុំត្រូវសន្សំទុកដាក់ដោយរបៀបណា ពេលវេលាការស្រលាញ់ចុងក្រោយនេះខ្ញុំក៏ដឹងថាខ្ញុំសាកសមនិងនៅម្នាក់ឯងណាស់ ខ្ញុំមិនបាច់ប្រឹងសន្សំពេកមិនបាច់ប្រឹងគិតអនាគតជាមួយអ្នកណាពេក មិនបាច់គិតពីកិត្តយសអារម្មណ៍របស់អ្នកណាពេក ខ្ញុំនិងនៅជាមួយរាងកាយរបស់ខ្ញុំដោយមោទនភាពនឹងសេរីភាពក្តីស្រលាញ់យកចិត្តទុកដាក់ជាមួយខ្លួនឯងអោយបានយ៉ាងល្អបំផុត មូលហេតុព្រោះ
1. ខ្ញុំស្មោះត្រង់ណាស់
2. ខ្ញុំពូកែអត់ធ្មត់ណាស់
3. ខ្ញុំរឹងមាំណាស់
2024 អរគុណយុគ៩
បន្ទាប់ពីមានការបង្ហោះបែបនេះ ស្រាប់តែដៃគូដ៏ស័ក្ដិសម ដែលមហាជនពិសេសហ្វេនៗផ្គូរផ្គងកញ្ញាជាមួយគឺលោក សុខ សាន់នី បានចូលមកបង្ហោះរូបភាពវីដេអូជាមួយគ្នាហាក់បង្ហាញការលើកទឹកចិត្ត ដោយសរសេរថា សប្បាយៗ សឹម ស្រីនិច្ច។ ការបង្ហោះនេះក៏ទាក់ទាញឱ្យមានការចាប់អារម្មណ៍ច្រើនពីហ្វេនដែលពេញចិត្តអ្នកទាំងពីរ កាន់តែចង់ឃើញដៃគូក្នុងរឿងភាគនេះ ក្លាយជាដៃគូពិត ប៉ុន្តែគ្រប់យ៉ាងគឺជារឿងបេះដូង គ្មានអ្នកណាអាចបង្ខិតបង្ខំបាននោះឡើយ។
ងាកមកវិញ កញ្ញា សឹម ស្រីនិច្ច នៅក្មេង ហើយនេះវាអាចគ្រាន់តែជាការបង្ហោះព្រោះអារម្មណ៍មួយឆាវក៏បាន ត្បិតអីកញ្ញា គឺជានារីម្នាក់ដែលមានសម្រស់ស្រស់ស្អាត អាជីពការងារក៏ល្អ ដូច្នេះមិនខ្វះឡើយបុរសបេតី គ្រាន់តែចាំបាច់ពិនិត្យឱ្យច្បាស់ថាមកដើម្បីគ្រាន់តែលេងសើច ឬមកដើម្បីយកធ្វើជាគូអនាគត។ អ្នកគាំទ្រសង្ឃឹមថាកញ្ញានឹងអាចរកបានបុរសល្អម្នាក់សម្រាប់ជាបង្អែក ព្រោះស្ត្រីទោះជារឹងមាំយ៉ាងណា ក៏ចាំបាច់ត្រូវការបុរសល្អម្នាក់នៅក្បែរខ្លួនដើម្បីចាំលើកទឹកចិត្ត ផ្ដល់កម្លាំងចិត្ត និងជាទីពំនាក់។