បន្ទាប់ពីប្រទេសម៉ាឡេស៊ី ប្រកាសដកខ្លួនមិនបញ្ជូនស្រីស្អាតទៅចូលរួមប្រកួត ខណៈនេះប្រទេសឡាវ គឺជាប្រទេសទីពីរហើយបានប្រកាសដកខ្លួនមិនបញ្ជូនស្រីស្អាតទៅប្រកួតក្នុងព្រឹត្តិការណ៍ប្រកួត Miss Universe លើកទី៧០ ឯប្រទេសអ៊ីស្រាលអែល។
នៅក្នុងសេចក្ដីប្រកាសនាថ្ងៃអង្គារនេះ បានឱ្យដឹងថា Miss Universe ឡាវ បានបដិសេធការអញ្ជើញចូលរួមក្នុងព្រឹត្តិការណ៍ប្រកួតអន្តរជាតិនៅក្នុងប្រទេសអ៊ីស្រាអែលនាអំឡុងខែធ្នូខាងមុខនេះ។
ការប្រកាសដកខ្លួនរបស់ប្រទេសឡាវ ដោយសារតែកត្តារីករាលដាលនៃជំងឺកូវីដ-១៩ ពិសេសដោយសារបញ្ហាសុខភាពជាសកលដែលធ្វើឱ្យការហោះហើរមានការកំណត់ ពិសេសពិបាកក្នុងការស្នើសុំវីសា។
អង្គភាពរៀបចំកម្មវិធីប្រកួតក៏បានបន្ថែមដែរថា ពួកគេមិនអាចរៀបចំការប្រកួតបវរកញ្ញាចក្រវាឡឡាវព្រោះតែស្ថានភាពឆ្លងជំងឺកូវីដ-១៩។ កាលពីសប្ដាហ៍មុនប្រទេសម៉ាឡេស៊ីក៏បានប្រកាសដែរថាមិនបញ្ជូនស្រីស្អាតខ្លួនទៅចូលរួមប្រកួតបវរកញ្ញាចក្រវាឡលើកទី៧០ ដូចគ្នា។
ចុចអានព័ត៌មាន កូវីដធ្វើទុក្ខបុកម្នេញខ្លាំង ម៉ាឡេស៊ីដកខ្លួនមិនបញ្ជូនស្រីស្អាត ចេញទៅប្រកួតនៅអ៊ីស្រាអែល!
រំលឹកឡើងវិញ Miss universe លើកទី៦៩ បានរៀបចំឡើងកាលពីថ្ងៃទី១៦ ខែឧសភា នាប្រទេសអាមេរិក ដោយកាលណោះបវរកញ្ញាមិចស៊ិក កញ្ញា Andrea Meza គឺជាម្ចាស់ជ័យលាភី។
ខណៈដែលកម្ពុជាក៏បានបញ្ជូនកញ្ញា រ៉េត សារីតា កញ្ញាឯកចក្រវាឡកម្ពុជាទៅចូលរួមក្នុងព្រឹត្តិការណ៍ដ៏ធំលំដាប់អន្តរជាតិមួយនេះផងដែរ៕