សិល្បៈជាតិ៖ តារាចម្រៀងជើងចាស់ លោក ទិត្យ វិច្ឆិកា បានចេញមកនិយាយបែបនេះក្រោយកូនប្រុសសម្លាញ់បានធ្លាក់ចេញពីកម្មវិធីប្រកួតចម្រៀង Beat The Best របស់ស្ថានីយទូរទស្សន៍ហង្សមាស។
តាមពិតបេក្ខជនរូបសង្ហា ផុន អាព្រិលករុណា ដែលទើបតែរបូតចេញពីកម្មវិធីប្រកួតគឺជាកូនប្រុសបង្កើតរបស់លោក ទិត្យ វិច្ឆិកា ដែលជាតារាចម្រៀងជើងចាស់ និងមានកេរ្តិ៍ឈ្មោះល្បីបង្គួរមួយរូប។ ដំបូងឡើយមិនមានអ្នកដឹងទេថា បេក្ខជន ករុណ មានឈាមជ័រជាអ្នកចម្រៀង ព្រោះបេក្ខជនរូបនេះ មិនបានអួតអាង ឬប្រាប់គេឱ្យដឹងពីសាវតាខ្លួន ថាជាកូនប្រុសរបស់តារាចម្រៀង ទិត្យ វិច្ឆិកា។
យ៉ាងណាមិញ ក្រោយពី ករុណា ធ្លាក់ពីកម្មវិធីប្រកួត លោកឪពុក របស់បេក្ខជនរូបនេះ បានចេញសារលើកទឹកចិត្តកូនប្រុសរបស់ខ្លួន ដែលធ្វើឱ្យមហាជនមានការចាប់អារម្មណ៍ និងបានដឹងការពិតថា ផុន អាព្រិលករុណា មានឈាមជ័រសិល្បៈ។
លោក ទិត្យ វិច្ឆិកា បានសរសេរថា៖ «លើកក្រោយសាកល្បងនឹងព្យាយាមម្តងទៀត អ្វីដែលសំខាន់ត្រូវប្រឹងហ្វឹកហាត់ប្រើសម្លេងបន្ថែមអោយបានល្អ…ខ្ញុំបាទ ទិត្យ វិច្ឆិកា សូមអរគុណប្អូនៗដែលជាគណៈកម្មការទាំងបួនដួងដែលបានផ្តល់ពិន្ទុយ៉ាងសុក្រឹតសំរាប់បេក្ខជនគ្រប់រូប … បងគោរពស្រលាញ់ប្អូនៗទាំងអស់គ្នា…ពេលនេះកូនប្រុសរបស់បង គួរតែប្រើពាក្យ លោកពូ អ្នកមីង ទៅកាន់ប្អូនៗវិញបានហើយ ព្រោះនិយាយពីការគោរព ផុន អាព្រិលករុណាគឺជាក្មួយរបស់ប្អូនៗ… ហើយបងក៏សុំទោសប្អូនៗដែរ ព្រោះពេលដែលគាត់ទៅប្រលង បងមិនបានអនុញាតអោយគាត់បង្ហាញថាគាត់ជាកូនប្រុសរបស់បង
ទោះបីជាកូនប្រុសមិនបានទៅកាន់វគ្គបន្តក៏ដោយ តែប៉ាមានមោទនភាពណាស់ដែលកូនប្រុសបានទៅឈរប្រលងនៅលើឆាករបស់ស្ថានីយ៍ទូរទស្សន៍ហង្សមាស ពិតជាមានតំលៃសំរាប់ប៉ាខ្លាំងណាស់
»
សូមជម្រាបជូនថា បេក្ខជន ផុន អាព្រិលករុណា បានលើកយកបទចម្រៀង «បើក្បត់ម្ដេចឱ្យចាំ» មកបកស្រាយនៅក្នុងការប្រកួតនាសប្ដាហ៍កន្លងទៅ មុននឹងចាកចេញពីកម្មវិធីប្រកួត Beat The Best របស់ទូរទស្សន៍ហង្សមាស៕
