ខ្លឹមសារនៅក្នុងសេចក្ដីណែនាំរបស់ក្រសួងធនធានទឹក និងឧតុនិយម ចុះថ្ងៃទី ១៤ ខែមេសា ឆ្នាំ ២០២៤ និងបញ្ចេញនៅលើក្រុមតេលេក្រាមផ្លូវការនៃអង្គភាពប្រតិកម្មរហ័សរបស់រាជរដ្ឋាភិបាលនៅថ្ងៃទី ២១ មានសេចក្ដីថា បច្ចុប្បន្ន ព្រះរាជាណាចក្រកម្ពុជា ក៏ដូចជាបណ្ដាប្រទេសមួយចំនួនក្នុងតំបន់កំពុងទទួលរង នូវឥទ្ធិពលយ៉ាងធ្ងន់ធ្ងរពីបាតុភូតអែលនីណូ(El Nino) ដោយបានបង្កឱ្យមានផលប៉ះពាល់ជាអវិជ្ជមាន ជាពិសេសគ្រោះរាំងស្ងួត ដោយសារធាតុអាកាសមានសភាពក្ដៅហួតហែងខ្លាំង ហើយរដូវវស្សានឹងឈានមកដល់ ដោយមានភាពយឺតយ៉ាវខុសប្រក្រតី ចំណែកទឹកទន្លេមេគង្គមានការប្រែប្រួល ពោលគឺស្រកចុះខ្លាំង ដែលជាហេតុនាំឱ្យតំបន់មួយ ចំនួនខ្វះខាតទឹកប្រើប្រាស់ និងទទួលទានជាប្រចាំថ្ងៃ។
ស្ថិតក្នុងស្ថានភាពបែបនេះ ក្រសួងអភិវឌ្ឍន៍ជនបទ បានណែនាំដល់ មន្ត្រីគ្រប់លំដាប់ថ្នាក់ រាប់តាំងពីរដ្ឋលេខាធិការ អនុរដ្ឋលេខាធិការ អគ្គនាយកបច្ចេកទេស ប្រធាននាយកដ្ឋានផ្គត់ផ្គង់ទឹកជនបទ និងប្រធានមន្ទីរអភិវឌ្ឍន៍ជនបទរាជធានី ខេត្ត នូវវិធានការមួយចំនួន ដែលក្នុងនោះរួមមាន៖
១. ត្រូវចាត់មន្ត្រីដើម្បីចុះពិនិត្យមើល ស្រះទឹក អណ្ដូង និងមានវិធានការចាំបាច់ ព្រមទាំងផ្ដល់ កិច្ចអន្តរាគមន៍បន្ទាន់ ក្នុងករណីអណ្ដូងខូច និងស្រះទឹករីងស្ងួត។ល។ ដើម្បីឆ្លើយតបទៅនឹងការខ្វះខាត ទឹកប្រើប្រាស់ និងទឹកបរិភោគប្រចាំថ្ងៃរបស់ប្រជាពលរដ្ឋ។
២. ត្រូវធ្វើការណែនាំ និងអប់រំផ្សព្វផ្សាយ ដល់ប្រជាពលរដ្ឋដែលរស់នៅតាមតំបន់ដែលងាយ រងគ្រោះដោយសារកង្វះខាតទឹក ឱ្យបង្កើនការយកចិត្តទុកដាក់ខ្ពស់ក្នុងការថែរក្សាប្រភពទឹក និងការ ប្រើប្រាស់ទឹកដោយសន្សំសំចៃ។
៣. ត្រូវទំនាក់ទំនងជាមួយអាជ្ញាធរមូលដ្ឋាន ដៃគូអភិវឌ្ឍន៍នានា អង្គការបរទេស និងក្នុងស្រុក ដើម្បីជួយជាវិធានការ និងផ្ដល់កិច្ចអន្តរាគមន៍ភ្លាមៗដល់ប្រជាពលរដ្ឋដែលកំពុងខ្វះខាតទឹកប្រើប្រាស់
និងទឹកបរិភោគ។
៤. រដ្ឋលេខាធិការ និងអនុរដ្ឋលេខាធិការ ចុះជួយមន្ទីរអភិវឌ្ឍន៍ជនបទរាជធានី ខេត្តទាំងអស់ ត្រូវដឹកនាំត្រួតពិនិត្យការផ្គត់ផ្គង់ទឹកជនបទ និងចាត់វិធានការអន្តរាគមន៍បន្ទាន់ក្នុងករណីប្រជាពលរដ្ឋ នៅជនបទត្រូវការ។
៥. ត្រូវធ្វើរបាយការណ៍ និងរាយការណ៍ជាប្រចាំមកក្រសួង ដើម្បីមានវិធានការបន្ទាន់។ ទទួលបានសេចក្ដីណែនាំនេះ មន្ត្រីគ្រប់លំដាប់ថ្នាក់រដ្ឋលេខាធិការ អនុរដ្ឋលេខាធិការ អគ្គនាយកបច្ចេកទេស ប្រធាននាយកដ្ឋានផ្គត់ផ្គង់ទឹកជនបទ និងប្រធានមន្ទីរអភិវឌ្ឍន៍ជនបទរាជធានី ខេត្ត ត្រូវអនុវត្តតាមសេចក្ដីណែនាំនេះឱ្យមានប្រសិទ្ធភាពខ្ពស់។
យោងតាមការចេញផ្សាយរបស់ក្រសួងធនធានទឹក និងឧតុនិយមអំពីស្ថានភាពធាតុអាកាសនៅព្រះរាជាណាចក្រកម្ពុជា ចាប់ពីដើមខែមីនា មកត្រឹម ថ្ងៃទី២២ ខែមេសា ឆ្នាំ២០២៤ សីតុណ្ហភាពអាកាសធាតុស្ថិតក្នុងរង្វង់ ២៥ ទៅ ៣៧ អង្សា (C) ប៉ុន្តែជាញឹកញាប់ ថ្ងៃខ្លះអាចហក់ឡើងដល់ ៣៨-៣៩ អង្សា (C) ដែលជាសីតុណ្ហភាពមួយក្ដៅខ្លាំង។ បើប្រៀបធៀបទៅនឹងឆ្នាំ ២០២៣ ក្នុងរយៈពេលដូចគ្នានេះ សីតុណ្ហភាពអតិបរមាប្រហែល ៣៥-៣៧ អង្សា (C) យូរៗម្ដង អាចឡើងដល់ ៣៨ អង្សា (C) ។ បើទោះបីជាសីតុណ្ហភាពមិនសូវខុសគ្នាឆ្ងាយពិតមែន ប៉ុន្តែដោយសារឥទ្ធិពលពីបាតុភូតអែលនីណូ(El Nino) ធ្វើឲ្យធាតុអាកាសមានសភាពក្ដៅហួតហែងខ្លាំង។