ក្នុងជំនួបរវាងនាយករដ្ឋមន្ត្រីកម្ពុជា និងប្រធានរដ្ឋឡាវ កាលពីថ្ងៃទី ២៣ ខែមេសា ឆ្នាំ ២០២៤ រាជរដ្ឋាភិបាលកម្ពុជាបានគូសបញ្ជាក់ថា វិស័យថាមពលមានសារៈសំខាន់សម្រាប់ប្រទេស កម្ពុជា ជាពិសេសដើម្បីធានាឱ្យបាននូវសន្តិសុខថាមពល និងធានាបាននូវភាពប្រកួតប្រជែងរបស់កម្ពុជានៅក្នុង តំបន់ និងពិភពលោក ហើយសម្ដេចធិបតី ក៏បានស្នើឱ្យភាគីឡាវពិចារណា និងរិះរកដំណោះស្រាយសមស្របនានា ដើម្បីធ្វើយ៉ាងណាអាចធានាបាននូវការផ្គត់ផ្គង់អគ្គិសនីមកកម្ពុជាប្រកបដោយនិរន្តរភាព និងទាន់ពេលវេលា។ សេចក្ដីប្រកាសព័ត៌មានរបស់ក្រុមអ្នកនាំពាក្យរាជរដ្ឋាភិបាលបញ្ជាក់បែបនេះ។
ឡាវជាប្រភពផ្គត់ផ្គង់អគ្គិសនីធំមួយនៅក្នុងតំបន់ កម្ពុជាក៏កំពុងទទួលការផ្គត់អគ្គិសនីពីប្រទេសឡាវផងដែរ ខណៈគោលនយោបាយឯករាជ្យផ្នែកថាមពលអគ្គិសនីគឺជាគោលដៅរបស់រាជរដ្ឋាភិបាលដែលត្រូវធ្វើឲ្យបាននៅឆ្នាំ ២០៣០។
«សន្តិសុខថាមពលអគ្គិសនី ពិតជាសំខាន់ណាស់សម្រាប់ការអភិវឌ្ឍ និងប្រជាជន សន្តិសុខ និងឯករាជ្យនៃថាមពលអគ្គិសនី គឺជាទិសដៅរបស់រាជរដ្ឋាភិបាលត្រូវតែពង្រឹង និងពង្រីក» សម្ដេចមហាបវរធិបតី ហ៊ុន ម៉ាណែត បានបញ្ជាក់បែបនេះ កាលពីថ្ងៃទី ៣០ ខែវិច្ឆិកា ឆ្នាំ ២០២៣ កន្លងទៅក្នុងពិធី បិទស្ទឹង បើកការដ្ឋានសាងសង់ទំនប់វារីអគ្គិសនី តាតៃលើ ស្ថិតនៅក្នុងស្រុកថ្មបាំង ខេត្តកោះកុង។
យោងតាមរបាយការណ៍របស់អគ្គិសនីកម្ពុជាបង្ហាញថា កាលពីឆ្នាំ២០២២ អានុភាពថាមពលអគ្គិសនីរបស់កម្ពុជាមាន ៤ ៤៩៥ មេហ្កាវ៉ាត់ ឯបរិមាណថាមពល ដែលបានប្រើប្រាស់ចេញពីប្រភពអគ្គិសនី ១៥ ៤៥៥ លានគីឡូវ៉ាត់ម៉ោង ហើយបរិមាណនេះនៅតែបន្តកើនឡើងទៀតនៅឆ្នាំ ២០២៣។ បើប្រៀបធៀបការប្រើប្រាស់ប្រចាំថ្ងៃគឺមិនខ្វះនោះទេ ដោយបរិមាណផ្គត់ផ្គង់មានដល់ជិត ៤ពាន់៥រយ មេហ្កាវ៉ាត់ ឯបរិមាណប្រើប្រាស់ នៅក្រោម៤ពាន់មេហ្កាវ៉ាត់ (ប្រហែល៣៦០០ MW) ។
យោងតាមការចុះផ្សាយរបស់សារព័ត៌មានក្នុងស្រុក រដ្ឋមន្ត្រីក្រសួងរ៉ែ និងថាមពលបានលើកឡើងកាលពីខែវិច្ឆិកា ឆ្នាំ២០២៣ កន្លងទៅថា «តាមការវាយតម្លៃរបស់ក្រុមអ្នកជំនាញជប៉ុន កម្ពុជាមានសមត្ថភាពផលិតថាមពលអគ្គិសនី ប្រមាណ២ម៉ឺនមេហ្កាវ៉ាត់។ ប៉ុន្តែ ដោយសារមិនចង់ឱ្យមានផលប៉ះពាល់ធ្ងន់ធ្ងរពីការទប់ទំនប់វារីអគ្គិសនី ទើបមកដល់សព្វថ្ងៃ កម្ពុជាបន្តទិញប្រភពថាមពលអគ្គិសនីស្អាតពីឡាវ ប្រមាណ៣០ភាគរយ ហើយទិញពីវៀតណាម ១ភាគរយប៉ុណ្ណោះ»។
តាមការព្យាករណ៍របស់អគ្គិសនីកម្ពុជា តម្រូវការថាមពលអគ្គិសនីនៅកម្ពុជា នឹងកើនឡើងដល់ ២៤ ០០០ លានគីឡូវ៉ាត់ម៉ោង នៅឆ្នាំ២០២៥ ដល់ ៣៦ ០០០ លានគីឡូវ៉ាត់ម៉ោងនៅឆ្នាំ២០៣០ ដល់ ៥០ ០០០ លានគីឡូវ៉ាត់ម៉ោង នៅឆ្នាំ២០៣៥ និង ៦៦ ០០០ លានគីឡូវ៉ាត់ម៉ោងនៅឆ្នាំ២០៤០។
អត្ថបទ៖ ឈិន ធារ៉ាត់
