សិល្បៈជាតិ៖ អប្សរាមានន័យថា «នារីរបាំសួគ៌» ដែលពីដើមឡើយមុននឹងស្តេចធ្វើព្រះរាជពិធីអ្វីមួយរមែងតែងតែមានការសម្តែងរបាំអប្សរា ក្នុងគោលបំណងដើម្បីប្រោះព្រំលើករាស្សីមុនកម្មវិធីសាសនារបស់ស្តេចចាប់ផ្តើមប្រារព្ធ។ មិនតែប៉ុណ្ណោះរូបអប្សរាមានប្រភពមកពីរឿងទេវកថារបស់សាសនាហីនឌូ ក្នុងរឿង «កូរសមុទ្រទឹកដោះ» ហើយបើចង់ឃើញរឿងនេះនៅក្នុងប្រាសាទអង្គរវត្តយើងអាចដើរទៅផ្នែកខាងកើតឈាងខាងត្បូងជាន់ទីពីរនៃប្រាសាទ នោះយើងនឹងឃើញពីចម្លាក់ ដែលដូនតាយើងបានឆ្លាក់ជាប់នៅនឹងជញ្ជាំង។ ចុះលោកអ្នកមានដឹងទេថា អប្សរានៅលើប្រាសាទអង្គរវត្តមានចំនួនប៉ុន្មាន?
ចំនួនអប្សរា ហាក់នៅមិនទាន់មានភាពឯកភាពគ្នា ព្រោះបើយោងតាម ការរាប់របស់លោក Davis សហការជាមួយនឹងគម្រោងអភិរក្សអប្សរារបស់អាឡឺម៉ង់ អប្សរាដែលមាននៅតាមប្រាសាទអង្គរវត្ត មានចំនួន១៧៩៦។ ខណៈដែលឯកសារខខ្លះបានលើកឡើងថា អ្នកប្រាជ្ញបានរាប់ឃើញថា មានរូបអប្សរាចំនួនច្រើនជាង ១៨៦០អង្គ នៅលើប្រាសាទស.វ ទី១២នេះ ខ្លះឆ្លាក់លើសរសរ ខ្លះលើជញ្ជាំង ខ្លះលើកំពូលប្រាសាទ។