ពានរង្វាន់បាល់ទាត់ AFC Champion League 2023-24 ដែលជាពានរង្វាន់ក្លិបធំជាងគេប្រចាំទ្វីបអាស៊ី បានឈានដល់វគ្គផ្តាច់ព្រ័ត្រហើយ ស្របពេល Al Ain របស់អារ៉ាប់រួម បានទម្លាក់ក្រុមខ្លាំង Al Hilal របស់អារ៉ាប៊ីសាអូឌីត នៅវគ្គពាក់កណ្តាលផ្តាច់ព្រ័ត្រ ក្នុងលទ្ធផលសរុបទាំង២ជើង ៥-៤ យ៉ាងគួរឲ្យភ្ញាក់ផ្អើល។
ស្របពេលក្រុម Yokohama F. Marinos របស់ជប៉ុន បានទម្លាក់ក្រុម Ulsan HD របស់កូរ៉េខាងត្បូង ដោយបាល់កាត់សេចក្តី១១ម៉ែត្រ ៥-៤ បន្ទាប់ពីក្រុមទាំងពីរស្មើគ្នាក្នុងលទ្ធផលសរុបទាំងពីរជើង ៣-៣។
វគ្គផ្តាច់ព្រ័ត្រ AFC Champion League 2023-24 ធ្វើឡើងចំនួន២ជើង៖
- (ជើងទី១) ១១ ឧសភា ២០២៤ Yokohama F. Marinos vs Al Ain នៅកីឡដ្ឋាន Nissan Stadium។
- (ជើងទី២) ២៥ ឧសភា ២០២៤ Al Ain vs Yokohama F. Marinos នៅកីឡដ្ឋាន Hazza bin Zayed។
ពានរង្វាន់ AFC Champions League 2023 ត្រូវបានសហព័ន្ធកីឡាបាល់ទាត់អាស៊ី បែងចែកជា២តំបន់ដោយក្នុងនោះមានតំបន់ភាគខាងលិច (សហព័ន្ធបាល់ទាត់អាស៊ីខាងលិច,សហព័ន្ធបាល់ទាត់អាស៊ីខាងត្បូងនិងសហព័ន្ធបាល់ទាត់អាស៊ីកណ្ដាល) ចំណែកតំបន់មួយទៀតគឺអាស៊ីខាងកើត (សហព័ន្ធបាល់ទាត់អាស៊ីខាងកើត និងសហព័ន្ធបាល់ទាត់អាស៊ាន)។
ពានរង្វាន់ AFC Champions League បង្កើតឡើងដំបូងតាំងពីឆ្នាំ១៩៩៦-៩៧ ហើយក្រុម Al-Hilal របស់អារ៉ាប៊ីសាអ៊ូឌីត ឈ្នះជើងឯកច្រើនជាងគេគឺចំនួន ៤លើក ខណ:ក្រុម Pohang Steelers របស់កូរ៉េខាងត្បូង បាន៣ដងម្នាក់៕