ខណៈស្ពានអាកាសមរតកតេជោ (ក្បាលថ្នល់) ដំណាក់កាលទី១ ត្រូវបានដាក់ឲ្យប្រើប្រាស់ជាបណ្ដោះអាសន្ន ចាប់តាំងពីដើមខែមេសា ឆ្នាំ២០២៤ និងបន្តសាងសង់គម្រោងទី២ មកដល់សប្ដាហ៍ទី៤ នៃខែមេសាដដែល គម្រោងស្ពានឆ្លងទន្លេបាសាក់ ចាក់អង្រែក្រោម-ព្រែកប្រា ក៏សម្រេចបានលទ្ធផលជាបណ្ដើរផងដែរ។
បើគិតត្រឹមពាក់កណ្ដាលខែមេសា ឆ្នាំ២០២៤ គម្រោងនេះ សម្រេចបាន ៧.៥ភាគរយហើយ លឿនជាងផែនការដែលបានគ្រោងទុកតិចតួចដែរ (០.៦%)។ នេះជាការបញ្ជាក់របស់ក្រសួងសាធារណការ និងដឹកជញ្ជូនលើទំព័រហ្វេសប៊ុកផ្លូវការរបស់ខ្លួន កាលពីថ្ងៃទី១៩ ខែមេសា ឆ្នាំ២០២៤។ ដូច្នេះ គេអាចសន្និដ្ឋានបានថា បើគិតដល់ចុងខែមេសា វាអាចសម្រេចបានដល់ជិត១០ភាគរយ។
យោងតាមការចុះផ្សាយរបស់ទីស្ដីការគណៈរដ្ឋមន្ត្រី គម្រោងស្ពានឆ្លងទន្លេបាសាក់ ចាក់អង្រែក្រោម-ព្រែកប្រា បើកការដ្ឋានស្ថាបនាជាផ្លូវការនៅថ្ងៃទី១៩ ខែកុម្ភៈ ឆ្នាំ២០២៤ ខណៈដែលគម្រោងស្ពាននេះសាងសង់បាន ២ភាគរយហើយ។ គម្រោងស្ពាននេះមានតម្លៃប្រមាណ ៦០លានដុល្លារអាមេរិក និងប្រើរយៈពេលសាងសង់ ៤២ខែ ដោយប្រើឥណទានសម្បទានពីប្រទេសចិន ដែលមានប្រវែងសរុប ១ ៦៥០ម៉ែត្រ (ប្រវែងស្ពាន ៨៤៥.៧០ម៉ែត្រ ទទឹងផ្លូវ២៧ម៉ែត្រ ផ្លូវតភ្ជាប់ក្បាលស្ពានប្រវែង ៨០៤.៣០ម៉ែត្រ ទទឹងផ្លូវ ២៧ម៉ែត្រ)។ ស្ពាននេះមាន ៤គន្លងរថយន្ត ២កន្លងម៉ូតូ និង ២គន្លងថ្មើរជើង សាងសង់ដោយក្រុមហ៊ុន សំណង់សៀងហៃ ដោយមានទីប្រឹក្សាគម្រោង គឺក្រុមហ៊ុនក្វាងចូវវ៉ានអាន។
ទីស្ដីការគណៈរដ្ឋមន្ត្រីពន្យល់ថា ពេលសាងសង់រួចស្ពានឆ្លងទន្លេបាសាក់ ចាក់អង្រែក្រោម-ព្រែកប្រានឹងនាំមកនូវផលប្រយោជន៍ជាច្រើន៖
ទី១៖ កាត់បន្ថយការកកស្ទះចរាចរណ៍លើស្ពានព្រះមុនីវង្សឆ្លងកាត់ទន្លេបាសាក់ ភ្ជាប់ផ្លូវជាតិលេខ១ នៅខណ្ឌច្បារអំពៅ។
ទី២៖ ជួយពង្រឹងដល់ទំនាក់ទំនងសេដ្ឋកិច្ចសង្គម រវាងរាជធានីភ្នំពេញប៉ែកខាងត្បូង អាកាសយានដ្ឋានអន្តរជាតិតេជោក្រុងតាខ្មៅ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។
ទី៣៖ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះផងដែរ។
គួរបញ្ជាក់ថា នេះជាស្ពានទី៦ ក្នុងចំណោមស្ពានដែលបានសាងសង់រួចដូចជា ស្ពានឆ្លងកោះពេជ្រ-កោះនរា ស្ពានព្រះមុនីវង្សទាំង២ ស្ពានព្រែកសំរោង-តាខ្មៅ ស្ពានកោះអន្លង់ចិន ស្ពានកោះធំ និងស្ពានមួយទៀតកំពុងសិក្សាភ្ជាប់ផ្លូវជាតិលេខ២៣។
អត្ថបទ៖ ឈិន ធារ៉ាត់
