Lucas សមាជិកក្រុមចម្រៀង WayV របស់ចិនត្រូវបានអតីតមិត្តស្រីចេញមកអាក្រាតនៅលើបណ្ដាញសង្គមថាតារារូបនេះសម្ដែងធ្វើជាមនុស្សចិត្តល្អ ស្រលាញ់អ្នកគាំទ្រ ការពិតគឺជាការបោកប្រាស់ និងជា concept របស់គេប៉ុណ្ណោះ។ តែការពិតគេចាត់ទុកអ្នកគាំទ្រគ្រាន់តែជាស្រីកំណាន់ ហើយប្រើប្រាស់ការស្រលាញ់មកលើរូបគេដើម្បីជាប្រយោជន៍ប៉ុណ្ណោះ។
ស្ត្រីម្នាក់ដែលហៅខ្លួនឯងថា «B» បានផុសនៅលើបណ្ដាញសង្គមកាលពីថ្ងៃទី២៥ ខែសីហា ដោយបានអាក្រាតពីតារារូបនេះដូចការលើកឡើងខាងលើ។ ស្ត្រី «B» ដដែលនេះ ថែមទាំងនិយាយទៀតថា ខ្លួនបានជួបជាមួយនឹង Lucas នៅក្នុងកម្មវិធីជួបជុំ ចុះហត្ថលេខា រវាងតារានិងអ្នកគាំទ្រ ហើយនាងបានប្រាប់គណនីខ្លួនទៅ Lucas ហើយតារារូបនេះបានផ្ញើសារមកកាន់រូបនាង។
អ្នកទាំងពីរបានជជែកគ្នាតាមរយៈ wechat រហូតថ្ងៃមួយ Lucas បានហៅខ្លួនឱ្យទៅជួបនៅសណ្ឋាគារដែលគេកំពុងស្នាក់នៅ នៅទីនោះអ្នកទាំងពីរបានមានទំនាក់ទំនងផ្លូវភេទរួមគ្នា។ នៅក្នុងឱកាសនោះដែរ ស្ត្រី «B» ក៏បានរកឃើញដែរថា Lucas ក៏មានទំនាក់ទំនងបែបនេះជាមួយនឹងអ្នកគាំទ្រជាស្ត្រីផ្សេងៗទៀតដែរ។
ស្ត្រី «B» បាននិយាយដែរថា «ខ្ញុំស្រមៃមិនចេញទេថា តើគាត់ជាបុរសខ្លាំងប៉ុណ្ណាដែលអាចជួបមនុស្សស្រីពីរនាក់ក្នុងថ្ងៃតែមួយ ម្នាក់ពេលព្រឹក ចំណែកម្នាក់ទៀតពេលយប់។ ខ្ញុំព្យាយាមគ្រប់យ៉ាងដើម្បីសម្របតាម Lucas រយៈពេល២ឆ្នាំ តែគ្រប់យ៉ាងគឺជាការកុហក»។ ស្ត្រីរូបនេះក៏បានប្រើប្រាស់ប្រជាប្រិយភាពរបស់ខ្លួននិយាយអាក្រក់ពី Kris ដែលបច្ចុប្បន្នកំពុងជាប់ឃុំឃាំងដោយសារតែបញ្ហាផ្លូវភេទជាមួយនឹងស្ត្រីអនីតិជនផងដែរ។
មុននេះធ្លាប់មាននារី «A» បានបកអាក្រាតរឿង Lucas បានប្រើប្រាស់លុយនាង ហើយក៏មានមនុស្សស្រីកាន់តេច្រើនបានចេញមកអះអាងថាខ្លួនជាអតីតមិត្តស្រីនិងអះអាងពីទង្វើអាក្រក់របស់តារារូបនេះ។
ក្នុងចំណោមនោះមានតែនារី «B» ម្នាក់គត់ដែល Lucas នៅបន្តទាក់ទងទោះជាបានបញ្ចប់ទំនាក់ទំនងជាមួយគ្នាហើយក្ដី ក្នុងនោះនារី «B» បានអះអាងថា Lucas បានប្រើប្រាស់លុយខ្លួនថែមទាំងឱ្យអ្នកនាងចាយប្រាក់ពេលដើរកម្សាន្តរួមគ្នាថែមទៀតផង។
រឿងដូចគ្នានេះក៏ត្រូវបានស្ត្រី «C» លើកឡើងថាកញ្ញាក៏ជួបរឿងដូចជានារី «A» និង «B» ដែរ។ ខណៈដែលរឿងរ៉ាវបម្រូងចម្រាស់កាន់តែពុះកញ្ជ្រោលនៅប្រទេសចិន Lucas បានចេញមកផុសសំបុត្រសុំទោស ហើយផ្អាករាល់សកម្មភាពសិល្បៈរបស់គេទាំងអស់៕
