ថ្មីៗនេះតារាសម្ដែងនិងជាសេដ្ឋិនីស្រុកចិនអ្នកនាង Zhao Wei ហៅត្រចៀកកាំ ត្រូវបានសាធារណជនយល់ថាឈ្មោះរបស់តារារូបនេះត្រូវបានដាក់ចូលក្នុងបញ្ជីខ្មៅ ព្រោះឈ្មោះរបស់ Zhao Wei ត្រូវបានដកចេញពីបញ្ជីឈ្មោះភាពយន្តឬការងារសិល្បៈផ្សេងៗឧទាហរណ៍ដូចជារឿង «My Fair Princess» ខ្សែភាពយន្តបុរាណចិនដែលតារាស្រីរូបនេះសម្ដែងហើយទទួលបានប្រជាប្រិយភាពខ្លាំង។
តារាសម្ដែងវ័យ៤៥ឆ្នាំរូបនេះបានអវត្តមានពីទីសាធារណៈ ហើយសូម្បីតែមិត្តសម្លាញ់របស់ខ្លួនតារាសម្ដែង Yuan Li ក៏បានលើកឡើងដែរថាខ្លួនមិនអាចទំនាក់ទំនងជាមួយនឹង Zhao Wei បាននោះទេ។
ប៉ុន្តែយោងតាមសាធារណជនដែលមានមិត្តភក្ដិនិងសាច់ញាតិនៅទីក្រុង Bordeaux ប្រទេសបារាំង បានឱ្យដឹងថា ត្រចៀកកាំបានធ្វើដំណើរទៅប្រទេសបារាំងតាមរយៈយន្តហោះផ្ទាល់ខ្លួន។ ដោយមានមនុស្សម្នាក់បានអះអាងថាខ្លួនបានទៅព្រលានយន្តហោះនៅបារាំងហើយជួប Zhao Wei នៅទីនោះប្រហែលជាម៉ោង២និង២០នាទីអធ្រាត្រ ម៉ោងគិតក្នុងប្រទេសចិន ត្រូវនឹងថ្ងៃទី២៧ខែសីហា ឆ្នាំ២០២១ បន្ទាប់ពីចុះដល់ដី Zhao Wei បានប្រញាប់ចាកចេញពីព្រលានយន្តហោះភ្លាមៗ តាមរយៈរថយន្ត Toyota មួយគ្រឿង។
មានដំណឹងលេចឮដែរថាស្វាមីរបស់អ្នកនាងលោក Huang Youlong បានរង់ចាំអ្នកនាងនៅកន្លែងផលិតស្រា ខណៈអ្នកខ្លះទៀតបានលើកឡើងថាមិនមែនជារឿងចម្លែកនោះទេ ដែល ត្រចៀងកាំ ហោះទៅបារាំង ព្រោះជាទៀតទាត់តារាសម្ដែងល្បីរូបនេះត្រូវទៅទីនោះស្រាប់ហើយព្រោះមានចំការទំពាំងបាយជូនៅទីនោះ។
កាលពីឆ្នាំ២០០៨ Zhao Wei បានទៅទស្សនកិច្ចនៅប្រទេសបារាំងជាលើកដំបូង បន្តមកនៅឆ្នាំ២០១១ ស្វាមីរបស់អ្នកនាងបានទិញ Château Monlot នៅក្នុងតំបន់ St Emillion ជាចំការទំពាំងបាយជូមានទំហំ៨ហិចតា ដើម្បីជាកាដូដល់ឧត្តមភរិយារបស់លោកគឺ Zhao Wei។ មួយឆ្នាំក្រោយ Zhao Wei បង្កើតក្រុមហ៊ុនស្រាក្រហម Bordeaux៕
