សហព័ន្ធកីឡាបាល់ទាត់កម្ពុជា (ស.ប.ក) បានបញ្ជាក់ថ្មីៗនេះថានឹងបញ្ជូនកីឡាការិនីចំនួន២២រូបទៅហ្វឹកហាត់នៅប្រទេសចិន រយៈពេល៣ខែ ឬ ៩០ថ្ងៃ ក្នុងផែនការមួយត្រៀមប្រកួតក្នុងព្រឹត្តិការណ៍កីឡាស៊ីហ្គេមឆ្នាំ២០២៣។
នៅលើហ្វេសប៊ុករបស់សហព័ន្ធបានបញ្ជាក់ថា៖«ដើម្បីពង្រឹងសមត្ថភាពអត្តពលិកកម្ពុជា ត្រៀមសម្រាប់ព្រឹត្តការណ៍កីឡាស៊ីហ្គេមឆ្នាំ២០២៣ សហព័ន្ធកីឡាបាល់ទាត់កម្ពុជា ក្រោមការសហការណ៍ពីភាគីខាងសាធារណរដ្ឋប្រជាមានិតចិន តាមរយៈគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ នឹងបញ្ជូនកីឡាការិនីជម្រើសជាតិកម្ពុជា ដែលមានរាយនាមក្នុងបញ្ជី ទៅហ្វឹកហាត់នៅសាធារណរដ្ឋប្រជាមានិតចិនរយៈពេល ៩០ថ្ងៃ។ ក្រុមជម្រើសជាតិនារីនឹងត្រូវធ្វើដំណើរទៅហ្វឹកហាត់នាចុងខែកញ្ញានេះ ក្រោយពន្យារពេលមួយរយៈដោយសារវិបត្តជំងឺឆ្លងកូវីដ-១៩។