ក្រោយក្រុមតាលីបង់ ចូលគ្រប់គ្រងនិងក្ដោបក្ដាប់ប្រទេសអាហ្វហ្គានីស្ថាន ប្រជាជនអាហ្វហ្គានីស្ថាន ត្រូវទ្រាំរស់នៅដោយភាពភ័យខ្លាច យុវជនអាហ្វហ្គានីស្ថាន បានយកចម្រៀងនិងអាល់ប៊ុមចម្រៀងលាក់ទុក ព្រោះតែភ័យខ្លាចក្រុមតាលីបង់សម្លាប់។
កវីនិពន្ធ អ្នកកំប្លែង អ្នកចម្រៀងប្រពៃណីជនជាតិអាហ្វហ្គានីស្ថាន ត្រូវបានក្រុមជ្រុលនិយមតាលីបង់បាញ់សម្លាប់ជាបន្តបន្ទាប់យ៉ាងព្រៃផ្សៃបំផុត។
យោងតាមសារព័ត៌មានរបស់អាហ្វហ្គានីស្ថានជាភាសាអង់គ្លេស ហ្គាន់ដារ៉ា បានចុះផ្សាយកាលពីថ្ងៃទី៥ ខែសីហា ឆ្នាំ២០២១ កវីនិពន្ធនិងជាអ្នកបុរាណវិទូដ៏ល្បីលោក អាប់ដុលឡា អាទីហ្វី ត្រូវបានក្រុមតាលីបង់ធ្វើទារុណកម្ម មុននឹងបាញ់សម្លាប់លោកនៅភាគខាងត្បូងប្រទេស។ ប៉ុន្តែអ្នកនាំពាក្យរបស់ក្រុមតាលីបង់បានបដិសេធថាទាហានរបស់ខ្លួនមិនពាក់ព័ន្ធនឹងករណីស្លាប់របស់លោក អាប់ដុលឡានោះទេ។
ខណៈនៅថ្ងៃទី២៩ ខែកក្កដា ឆ្នាំ២០២១ សារព័ត៌មាន Aljazeera បានផ្សាយថាក្រុមទាហានប្រដាប់អាវុធតាលីបង់បានទទួលស្គាល់ថាក្រុមខ្លួនបានសម្លាប់អ្នកកំប្លែងល្បីលើ Tiktok លោក ណាហ្សា មូហាម៉ាត់ ខាសា (Nazar Mohammad Khasha ) ដោយសពរបស់លោកត្រូវបានរកឃើញនៅ កាន់ដាហា មានស្នាមបាញ់ជាច្រើនគ្រាប់ បន្ទាប់ពីវីដេអូបែកធ្លាយ លោកត្រូវបានគេវាយដំធ្វើបាបលើរាងកាយក្នុងរថយន្តដោយខ្មាន់កាំភ្លើងពីរនាក់។
ឈានចូលមកដល់ថ្ងៃទី២៩ ខែសីហា ឆ្នាំ២០២១ សារព័ត៌មាន insider បានផ្សាយថា ក្រុមជ្រុលនិយមតាលីបង់ បានសម្លាប់អ្នកចម្រៀងប្រពៃណីដ៏ល្បីមួយរូបទៀត គឺលោក ហ្វាវ៉ាដ អាន់ដ្រាប៊ី ដោយក្រុមនេះបានចូលទៅចាប់លោកដល់ក្នុងផ្ទះរួចហើយ វាយដំធ្វើបាបលោក មុននឹងបាញ់សម្លាប់ចោល។ ក្រុមនេះបាននិយាយថាពួកគេសង្ឃឹមថានឹងហាមឃាត់មិនឱ្យមានការតន្ត្រីប្រគំនៅតាមទីសាធារណៈក្នុងប្រទេសអាហ្វហ្គានីស្ថាន ព្រោះពួកគេជឿថាតន្ត្រីគឺជាអំពើបាប ហើយក៏ជាអំពើមួយប្រឆាំងនឹងច្បាប់របស់សាសនាអ៊ីស្លាមផងដែរ។
គួរដឹងថាអ្នកសិល្បៈនិងតន្ត្រីករក្មេងៗអាហ្វហ្គានីស្ថាន មួយចំនួនបានរត់គេចខ្លួន និងលាក់អត្តសញ្ញាណរបស់ខ្លួនចាប់តាំងក្រុមតាលីបង់ចូលមកគ្រប់គ្រងប្រទេសកាលពីថ្ងៃទី១៥ ខែសីហា ឆ្នាំ២០២១ ព្រោះតែបារម្ភពីសុវត្ថិភាពខ្លួន និងគេចពីការកាប់សម្លាប់របស់ក្រុមនេះ៕
ទស្សនាវីដេអូព័ត៌មានខាងក្រោម៖