ប្រទេសអ៊ីតាលី៖ ស្ត្រីជាផលិតករភាពយន្តជនជាតិអាហ្វហ្គានីស្ថានដែលបានរត់គេចពីក្រុមជ្រុលនិយមតាលីបង់បានអង្វរឱ្យពិភពលោកកុំបំភ្លេចជនជាតិអាហ្វហ្គានីស្ថាន ហើយជួយគាំទ្រសិល្បករជនជាតិនេះផង។
ក្នុងពេលដែលខ្លួនទទួលបានឱកាសថ្លែងក្នុងកម្មវិធីបុណ្យភាពយន្តទីក្រុង Venice នាប្រទេសអ៊ីតាលី ស្ត្រីជាអ្នកផលិតភាពយន្តបានបង្ហាញពីក្ដីកង្វល់ព្រមទាំងព្រមានថាប្រទេសដែលបាត់បង់វប្បធម៌ប្រៀបដូចជាប្រទេសមួយបាត់អត្តសញ្ញាណជាតិរបស់ខ្លួនដូច្នោះដែរ។
លោកស្រី Sahraa Karimi ស្ត្រីទីមួយដែលបានកាន់តួនាទីជាប្រធានអង្គភាពភាពយន្តប្រទេសអាហ្វហ្គានីស្ថាន ក្នុងខណៈរៀបរាប់ពីស្ថានភាពផ្សេងៗក៏ដូចជានិយាយដល់ការបាត់បង់ និងសោកនាដកម្មនានាដែលប្រជាជនខ្លួនបានជួបប្រទះក្រោយក្រុមតាលីបង់បានចូលមកគ្រប់គ្រងនិងក្ដោបក្ដាប់ប្រទេសជាតិខ្លួន ប្រាប់ដល់អ្នកកាសែតអ្នកស្រីស្រាប់តែអួលដើមកនិងខ្សឹកខ្សួល។
លោកស្រីបាននិយាយថាភាពយន្តជាច្រើនមានទាំង Pre Production និង Post Production ការងារ ក៏ដូចជាគម្រោងភាពយន្ត ត្រូវបានរាំងស្ទះទាំងអស់ ជាពិសេសភាពយន្តដែលបានផលិតរួចរាល់ពេលនេះស្ថិតក្នុងដៃក្រុមតាលីបង់ទាំងអស់។
ជាចុងក្រោយស្ត្រីជាផលិតករភាពយន្តរូបនេះបានលើកឡើងយ៉ាងខ្លីថា៖ «សាកស្រមៃទៅមើលប្រទេសដែលគ្មានសិល្បករ ប្រទេសដែលគ្មានអ្នកផលិតភាពយន្ត តើពួកគេអាចការពារអត្តសញ្ញាណជាតិដោយរបៀបណា?»
