លោក អ៊ិសូហ្កាយ៉ា ហិរ៉ុយូគិ នាយកនៃមជ្ឈមណ្ឌលអាស៊ីនៃមូលនិធិជប៉ុន ការិយាល័យទំនាក់ទំនងភ្នំពេញ នៅថ្ងៃទី៨ ខែកញ្ញា ឆ្នាំ២០២១ ថ្មីៗនេះ បានធ្វើទស្សនកិច្ចសាលាបាល់ទាត់កម្ពុជា នៅបាទីខេត្តតាកែវ ដែលមានគ្រូបង្វឹកចំនួន៣រូបជាគ្រូបង្វឹកនៅទីនោះ។
«នៅសាលានេះគឺមានកីឡាករបាល់ទាត់ចំនួន ៥០នាក់ដែលមានអាយុចន្លោះពី ១៤ ទៅ ១៨ ឆ្នាំដែលត្រូវបានជ្រើសរើសមកពីទូទាំងប្រទេសកម្ពុជា ដែលសាលាបានផ្តល់កន្លែងស្នាក់នៅ និង អាហារទទួលទានទៅដល់ពួកគេដើម្បីធ្វើការហ្វឹកហាត់បាល់ទាត់»។ នេះបើតាមការបញ្ជាក់របស់ មជ្ឈមណ្ឌលអាស៊ីនៃមូលនិធិជប៉ុន។
សមាគមន៍បាល់ទាត់ជប៉ុន និងមជ្ឈមណ្ឌលអាស៊ីនៃមូលនិធិជប៉ុន បានបញ្ចូនលោក Koji Gyotoku ដែលជាគ្រូបង្វឹកជម្រើសជាតិ U-20 និង U-18 ធ្វើជាគ្រូបង្វឹក FFC Academy U-18 និងលោក Inoue Kazunori ជាគ្រូបង្វឹកជម្រើសជាតិ U-16 ធ្វើជាគ្រូបង្វឹក FFC Academy U-15 និង លោក Mistumaru Toshihiro ជាគ្រូបង្វឹកអ្នកចាំទី U-18។
លោក អ៊ិសូហ្កាយ៉ា ហិរ៉ុយូគិ បានផ្ញើនូវបំណងប្រាថ្នាដ៏ល្អបំផុតរបស់លោកចំពោះកីឡាករកម្ពុជាថា៖«ខ្ញុំសង្ឃឹមថានៅពេលអនាគតពួកគេនឹងក្លាយជាកីឡាករសកម្មមិនត្រឹមតែនៅក្នុងប្រទេសកម្ពុជា ប៉ុណ្ណោះទេ តែថែមទាំងនៅក្នុងពិភពបាល់ទាត់ជប៉ុន ផងដែរ»។