ប៉េកាំង៖ តារាសម្ដែងស្រីដ៏ល្បីនិងជាសេដ្ឋិនីប្រចាំស្រុកចិន Vicki Zhao ហៅត្រចៀកកាំ បានបង្ហាញវត្តមានជាសាធារណៈឡើងវិញក្រោយបាត់មុខ២០ថ្ងៃ នេះបើយោងតាមការរយៈការបង្ហោះនៅលើ Platform បណ្ដាញសង្គម Weibo របស់ប្រទេសចិន។
ស្ត្រីដ៏មានប្រជាប្រិយភាពតាមរយៈភាពយន្តភាគបុរាណចិន My Fair Princess (ព្រះនាយ៉េយេឆ្នាំ១៩៩៨) បានបាត់មុខឈឹងចេញអ៊ិនធឺណិតចាប់តាំងពីថ្ងៃទី២៦ ខែសីហាហ ក្រោយសមិទ្ធិផលការងាររបស់អ្នកស្រីត្រូវបានដកចេញគ្មានសល់ពី Platform នានា ពិសេសសូម្បីតែប្រធានបទដែលពាក់ព័ន្ធនឹងអ្នកស្រីក៏ត្រូវបានលុបចោលខ្ទេចពីលើ Weibo ដូចគ្នាដែរ។
មកដល់ពេលនេះមិនទាន់មានហេតុផលណាមួយត្រូវបានបញ្ជាក់អះអាងនោះទេ ក្រោយឈ្មោះអ្នកស្រីត្រូវបានបញ្ជូនក្នុងបញ្ជីខ្មៅ ក្នុងនោះទៀតសោត តារាសម្ដែងវ័យ៤៥ឆ្នាំរូបនេះត្រូវបានគេអះអាងថាកំពុងជាប់ឃុំឃាំងនៅក្នុងផ្ទះរបស់ខ្លួន ខណៈមានអ្នកខ្លះបានលើកឡើងថាអ្នកស្រីបានភៀសខ្លួនទៅប្រទេសបារាំង ទៅកាន់តំប់ដែលអ្នកស្រីជាម្ចាស់ចំការទំពាំងបាយជូនៅក្នុងទីក្រុង Bordeaux ជាមួយនឹងស្វាមីលោក Huang Youlong ជាធុរជនដ៏ល្បីនិងមានទ្រព្យ។
យ៉ាងណាមិញរូបភាពរបស់ ត្រចៀកកាំ ត្រូវគេថតបាននៅក្នុងស្រុកកំណើតរបស់អ្នកស្រីនាក្រុង Wuhu ក្នុងខេត្ត Anhui កាលពីរាត្រីទី១៤ ត្រូវនឹងថ្ងៃអង្គារ ខែកញ្ញា ឆ្នាំ២០២១ ត្រូវបានផុសចែលរំលែកពេញអ៊ិនធឺិណិត។ ក្នុងរូបនោះ ឃើញត្រចៀកកាំពាក់មួក និងស្លៀកសំលៀកបំពាក់សាមញ្ញា ដោយពាក់អាយឺតពណ៌ស្វាយនិងខោខ្លីពណ៌បៃតងខ្ចី។ រូបមួយទៀត អ្នកស្រីអង្គុយលើកៅអីដែលមានសរសេរជាភាសាចិនថា «នាយកដ្ឋានបម្រើសេវាកម្មអតិថិជនសម្រាប់រដ្ឋាភិបាលនិងសហគ្រិន»
អ្នកគាំទ្រខ្លះបានអះអាងថាការចោទប្រកាន់ទៅលើតារាស្រីរូបនេះគ្មានមូលដ្ឋានគ្រប់គ្រាន់ ខណៈអ្នកខ្លះទៀតឆ្ងល់ថារូបភាពដែលថតបាននៅមុនពេលថ្ងៃទី២៦ ខែសីហា ព្រោះសង្កេតឃើញថាមិនមានបុគ្គលបម្រើការងារពាក់ម៉ាស ខណៈដែលថ្មីៗនេះជំងឺកូវីដ-១៩ បានផ្ទុះឡើងជាថ្មី។
តារាសម្ដែងរូបនេះធ្លាប់បានផុសរូបចំនួន៣សន្លឹកកាលពីថ្ងៃទី ២៩ ខែសីហា ដែលបង្ហាញថាអ្នកស្រីស្ថិតនៅក្នុងក្រុងប៉េជីង ប៉ុន្តែលុបចេញវិញ។
នៅថ្ងៃទី១២ ខែកញ្ញា ត្រចៀកកាំ បានជូនពរអ្នកដឹកនាំល្បី Li Mengqiao «រីករាយថ្ងៃទីកំណើត» នៅលើ Weibo ទោះជាថ្ងៃកំណើតរបស់អ្នកដឹកនាំរូបនេះតាំងពីថ្ងៃទី២៩ ខែសីហាមកម្លេះ ប៉ុន្តែផុសនោះបានលុបចេញវិញ។
ការបង្ហាញវត្តមានរបស់តារានេះទោះជាក្នុងរយៈពេលមួយខ្លីនៅលើអ៊ិនធឺណិត ធ្វើឱ្យអ្នកគាំទ្របានធូរចិត្ត ព្រោះបានសេចក្ដីថាតារាស្រីរូបនេះសុខទុក្ខធម្មតា៕
