និយាយដល់រឿងភាគកូរ៉េ សម្រាប់អ្នកនិយមគាំទ្រនិងចូលចិត្តទស្សនាប្រាកដជាស្គាល់ច្បាស់រាជិនី ៧ដួង នៅក្នុងវិស័យសិល្បៈភាពយន្តកូរ៉េ ធ្លាប់បានសាងកេរ្តិ៍ឈ្មោះយ៉ាងច្រើនតាមរយៈការសម្ដែងរឿងភាគ ភាពយន្តខ្នាតធំ ដែលអាចឆក់យកបេះដូងអ្នកទស្សនាឱ្យអណ្ដែតអណ្ដូងនិងចូលតួជាមួយនឹងការសម្ដែងទៅតាមចរិតនីមួយៗរបស់តួអង្គ។ អ្វីដែលគួរឱ្យកត់សម្គាល់ខ្លាំងទៀតនោះគឺតារាស្រីកូរ៉េប៉ុន្មានដួងនេះមិនថាពេលវេលាផ្លាស់ប្ដូរទៅយូរប៉ុណ្ណាតែសម្រស់របស់អ្នកទាំងនោះនៅតែមើលទៅក្មេងមិនសមនឹងអាយុទាល់តែសោះ។
តារាសម្ដែងស្រីកូរ៉េ5ដួង ដែលទស្សនិកជនអ្នកនិយមទស្សនាភាពយន្តកូរ៉េស្គាល់ច្បាស់ គឺជាតារាស្រីដែលមានវ័យជ្រេ ដោយអ្នកខ្លះចូលវ័យត្រាទុក៤និងត្រាទុក៥ ប៉ុន្តែនៅតែអាចក្ដោបតំណែងជាតួឯកស្រី យកឈ្នះនារីវ័យក្មេងៗជាតារាសម្ដែងស្រករក្រោយ។ តើរាជិនីទាំង៥ដួងនោះមានអ្នកណាខ្លះ?
១. Song Hye-kyo, ហៅ ហាន់ជីអ៊ុន បច្ចុប្បន្នមានវ័យ៣៩ ចាប់តាំងពីហក់ចូលក្នុងវិស័យសិល្បៈជាតារាសម្ដែងកុមារ រហូតផ្ទុះការគាំទ្រខ្លាំងតាមរយៈតារាទឹកភ្នែកក្នុងខ្សែភាពយន្ត «Autumn in my heart» ឬ «និទាឃរដូវក្នុងបេះដូង» ធ្វើឱ្យ Song Hye Kyo ក្លាយជាតារាស្រីឆ្នើមមួយរូបក្នុងពិភពសិល្បៈកូរ៉េ ម្យ៉ាងដោយសារតែសម្រស់ស្អាតពីធម្មជាតិរបស់ខ្លួន។ នៅក្នុងអាជីពតារាស្រីរូបនេះសម្ដែងជាតួឯកក្នុងភាពយន្តល្បីៗដូចជា All In (ឆ្នាំ 2003) Full House (បំណុលផ្ទះជំពាក់ស្នេហ៍ ឆ្នាំ ២០០៤) That winter, the wind blows (ឆ្នាំ ២០១៣) និងរឿងដ៏ល្បីល្បាញ Descendants of the Sun ឬម្ចាស់ព្រះអាទិត្យ (ឆ្នាំ 2016)ជាមួយនឹងអតីតស្វាមី Song Joong Ki។ ស្ដាប់ការរៀបរាប់បង្ហាញឱ្យឃើញថាតារារូបនេះសម្ដែងរឿងភាគល្បីៗជាច្រើនរឿងប៉ុន្តែបើសង្កេតពីមួយរឿងទៅមួយរឿងតារាស្រីរូបនេះហាក់ដូចជាមិនប្រែប្រួលទាល់តែសោះទោះជាអាយុក្បែរក្បាល៤ក្ដី។ រឿងដែលគួរឱ្យចាប់អារម្មណ៍ខ្លាំងនោះគឺកាលពីឆ្នាំ២០១៨ Song Hye Kyo បានសម្ដែងជាបុរសសង្ហា Park Bo Gum ដែលកាលណោះមានអាយុត្រឹម ២៧ឆ្នាំ គឺប្អូនសរុប១២ឆ្នាំ ប៉ុន្តែការសម្ដែងរបស់អ្នកទាំងពីរនៅមើលទៅស័ក្ដិសមឥតខ្ចោះ អ្នកទស្សនាមិនមានអារម្មណ៍ថាតួស្រីចាស់ជាងតួប្រុសបន្តិចនោះទេ។
២. Jun Ji-hyun, ជុនជីយ៉ុន ហៅ ឆូ សុងអ៊ី បច្ចុប្បន្នវ័យ 39 ៖ចាប់តាំងពីសាងឈ្មោះល្បីតាមរយៈភាពយន្តខ្នាតធំ My Sassy Girl កាលពីឆ្នាំ២០០១ ទាំងរូបសម្បត្តិ ទាំងសមត្ថភាពនាងត្រូវបានអ្នកគាំទ្រទទួលស្គាល់ កន្លងមក១២ឆ្នាំអាយុមិនមែនជាបញ្ហាសម្រាប់តារាស្រីរូបនេះឡើយ ព្រោះនៅឆ្នាំ២០១៣ តារារូបនេះបានសម្ដែងជាតួអង្គតារាស្រីល្បីក្នុងភាពយន្តភាគ My Love From anther Star ជារឿងដែលឆក់បានបេះដូងអ្នកគាំទ្រទូទាំងអាស៊ី។ ៣ឆ្នាំក្រោយត្រលប់មកគ្រងបល្ល័ង្កសម្ដែងឡើងវិញ Jun Ji hyun បានទទួលថតជាតួអង្គទេពមច្ឆានៅក្នុងរឿង The Legend of the Blue Sea ជាមួយនឹងប្រុសស្អាត Lee Min Ho រឿងនេះក៏ទទួលបានជោគជ័យយ៉ាងសម្បើមផងដែរ និងចុងក្រោយសម្ដែងជាអ្នកចម្បាំងក្នុងភាពយន្តខ្មោច Zoombie «Kingdom»។ អ្នកគាំទ្របានពោលពាក្យដូចគ្នាថាចាប់តាំងពីឆ្នាំ២០០១ ដែលបានស្គាល់តារាស្រីរូបនេះនៅក្នុងភាពយន្តមកដល់បច្ចុប្បន្ន សម្រស់របស់អ្នកនាងនៅតែស្អាតជាអមតៈ មិនមានអ្វីប្រែប្រួល។
៣. Son Ye-jin, បច្ចុប្បន្នវ័យ 39ឆ្នាំ តារាសម្ដែងម្ចាស់រហស្សនាមម្ចាស់ក្សត្រីភាពយន្តកំប្លែងលាយមនោសញ្ចេតនា ចាប់ផ្ដើមទទួលបានការគាំទ្រខ្លាំងតាមរយៈរឿង The Classic (ឆ្នាំ២០០៣) A moment to remember (2004) April Snow (2005) , Be with you (2006) និង The Negotiation (2018) ថ្វីត្បិតជារាជិនីភាពយន្តប៉ុន្តែតារាស្រីរូបនេះក៏មានសមិទ្ធិផលភាពយន្តភាគល្បីល្បាញខ្លាំងដែរដូចជារឿង «Something in the Rain» ឆ្នាំ២០១៨ និងពិសេសរឿងចុងក្រោយ «Crash Landing on you» រឿងភាគកូរ៉េស្នេហាមនោសញ្ចេតនារបស់ទូរទស្សន៍ TVN ជាមួយនឹងមិត្តប្រុសបច្ចុប្បន្ន Hyun Bin។ ទោះជាបានប្រឡូកក្នុងវិស័យនេះ២០ឆ្នាំក្ដីប៉ុន្តែបើប្រៀបធៀបថ្ងៃមុននឹងថ្ងៃនេះអ្នកគាំទ្រនៅតែមិនអាចរកឃើញថាសម្រស់របស់តារារូបនេះមានការប្រែប្រួលត្រង់ចំណុចណានោះទេ។ សម្រាប់ឆ្នាំ២០២២ ខាងមុខនេះ Son Ye Jin នឹងមានវត្តមានដំបូងក្នុងភាពយន្តហូលីវូដ the Cross។
៤. Lee Young-ae, ហៅចាំង គីម បច្ចុប្បន្នវ័យ 50 បើនិយាយពីតារាស្រីដែលត្រូវបានអ្នកគាំទ្រចាត់ចូលក្រុមតារាមានសម្រស់អមតៈ មានឈ្មោះរបស់ Lee Yong Ae មិនចម្លែកនោះឡើយ ព្រោះតួអង្គចាំងគីមដ៏ល្បីល្បាញ ដែលធ្វើឱ្យភាពយន្តបុរាណបែបប្រវត្តិសាស្ត្រកូរ៉េល្បីល្បាញធ្លាយមកដល់កម្ពុជារូបនេះ ទោះជាមានវ័យកាន់តែជ្រេក្ដីប៉ុន្តែសំបុរ សាច់ ស្បែក និងស្នាមញញឹមនៅតែទាក់ទាញនិងអាចធ្វើឱ្យបេះដូងកំលោះៗឈ្លក់វង្វេងដដែល។ រយៈពេលច្រើនឆ្នាំក្នុងសិល្បៈរាជិនីសម្រស់រូបនេះ នៅតែក្មេងដដែលមិនមានអ្វីប្រែប្រួលនោះឡើយ។
៥. Choi Ji-woo, បច្ចុប្បន្ន វ័យ 45 ឆ្នាំ តារាសម្ដែងម្ចាស់រហស្សនាមតារាទឹកភ្នែមមួយរូបនៅក្នុងពិភពសិល្បៈភាពយន្តកូរ៉េ K-drama ឆយ ជីវ៉ូ តួឯកស្រីនៅក្នុងភាពយន្តភាគមនោសញ្ចេតនាស្នេហាកម្សត់ «Winter Sonata 2002» ឬ «ចម្រៀងស្នេហារដូវរងា» និងរឿងភាគស្នេហា «Stairway to Heaven 2003» ឬ «កាំជណ្ដើរសួរគ៌ 2003» គឺជារឿងភាគដ៏ល្បីល្បាញបំផុតកាលពីជំនាន់នោះរហូតធ្វើឱ្យអ្នកទស្សនាស្រក់ទឹកភ្នែកស្ទើក្លាយជាទន្លេព្រោះតែអាណិតដល់តួអង្គដែលតារាស្រីរូបនេះបានសម្ដែង។ បាត់ពីសិល្បៈមួយរយៈ និងសំរាលកូនដំបូងរួច ស្រាប់តែលេចវត្តមានតារារូបនេះជាតារាកិត្តិយសក្នុងរឿង «Crash Landing on you» ធ្វើអ្នកទស្សនាពិតជាអន្ទះសារចង់ឃើញការវិលត្រលប់មកកាន់ការសម្ដែងឡើងវិញជាខ្លាំងព្រោះរូបសម្រស់របស់ ឆយ ជីវ៉ូ នៅតែស្អាត គួរឱ្យគយគន់មិនចេះជិនណាយដូចគ្នា។
ក្រៅពីរាជិនី៥ដួងខាងលើនេះ តារាសម្ដែង Kim Tae Hee ភរិយារបស់តារាសម្ដែងតារាចម្រៀងល្បី Rain ក៏ចាត់ចូលជាតារាសម្ដែងដែលនៅតែរក្សានិងក្ដោបតំណែងជាតួឯកស្រីបានផងដែរទោះជាអាយុ៤១ឆ្នាំហើយក្ដី ដោយរឿងចុងក្រោយដែលសម្ដែងជាតួឯកថ្មីៗនេះគឺរឿង «Hi! Bye Mama» ។