កម្ពុជា ដែលស្ថិតក្នុងពូល B នៃពានរង្វាន់បាល់ទាត់ផ្នែកបុរសធំប្រចាំតំបន់អាស៊ាន ឈ្មោះថា AFF Suzuki Cup ឆ្នាំ២០២០ នឹងត្រូវប្រកួតបើកឆាកជាមួយក្រុមជម្រើសជាតិម៉ាឡេស៊ី នៅថ្ងៃទី៦ ខែធ្នូ ឆ្នាំ២០២១ ខាងមុខនេះ ខណៈទីលាននិងម៉ោងប្រកួតនៅមិនទាន់កំណត់នៅឡើយ។
បើតាមលទ្ធផលនៃការចាប់ឆ្នោតនៅរសៀលថ្ងៃអង្គារ សប្ដាហ៍នេះឃើញថា៖
ពូល A៖ ថៃ,មីយ៉ាន់ម៉ា,ហ្វីលីពីន,សិង្ហបុរី, ក្រុមវគ្គជម្រុះ អាចប្រ៊ុយណេ ឬ ទីម័រខាងកើត
ពូល B៖ វៀតណាម,ម៉ាឡេស៊ី,ឥណ្ឌូណេស៊ី,កម្ពុជា,ឡាវ
ពានរង្វាន់នេះគ្រោងដំណើរការប្រកួតពីថ្ងៃទី៥ ខែធ្នូ ឆ្នាំ២០២១ ដល់ថ្ងៃទី១ ខែ មករា ឆ្នាំ២០២២។
ព្រឹត្តិការណ៍ AFF Championship រៀបចំឡើងដំបូងចាប់ពីឆ្នាំ១៩៩៦ មកដែលកាលណោះដាក់ឈ្មោះថា Tiger Cup តែចាប់ពីឆ្នាំ២០០៨ មកបានប្តូរឈ្មោះទៅជា AFF Suzuki Cup ឱ្យស្របតាមម្ចាស់ឧបត្ថម្ភ និងរៀបចំរាល់២ឆ្នាំម្តង។ ក្រុមកម្ពុជា មិនធ្លាប់ឆ្លងផុតវគ្គចែកពូលម្តងណានោះទេ តាំងពីពានរង្វាន់នេះបង្កើតមក ខណៈក្រុមថៃ ឈ្នះជើងឯកបានច្រើនជាងគេគឺរហូតដល់៥ដង ហើយក្រុមវៀតណាម ជាម្ចាស់ជើងឯកឆ្នាំចាស់ ២០១៨៕