អតីតតារាសម្ដែងសិចស៊ី ដែលពេលនេះជីវិតបានធ្លាក់ដុនដាបដល់ចំណុចសូន្យ ប្រែប្រួលរូបរាងពីនារីសាច់សខ្ចី ភ្លឺថ្លាទ្រលុកទ្រលន់ មកមានមុខជាំខ្មៅស្រអាប់ មានជំងឺប្រចាំរួមរឹតរូបកាយដូចជាជំងឺទឹកនោមប្រៃ លើសឈាម ខ្សោយបេះដូង និងឡើងជាតិខ្លាញ់ ហើយថែមទាំងកើតជំងឺកូវីដ-១៩ កំពុងសម្រាកព្យាបាលនៅមន្ទីរពេទ្យសម្ដេចឪខេត្តបាត់ដំបង នេះបើយោងតាមការប្រកាសរបស់សមីខ្លួនផ្ទាល់លើបណ្ដាញសង្គម។ សេង សូណា បានប្រកាសស្វែងរកជំនួយកាលពីពេលថ្មីៗនេះព្រោះបច្ចុប្បន្នតារាស្រីសិចស៊ីរូបនេះមានជីវភាពខ្វះខាតនិងលំបាកខ្លាំង។
កាលពីអំឡុងឆ្នាំ២០១៨ អតីតតារាសិចស៊ី សេង សូណា ត្រូវបានក្រសួងវប្បធម៌ និងវិចិត្រសិល្បៈ ចេញលិខិតអំពាវនាវឲ្យគ្រប់ស្ថានីយ៍ទូរទស្សន៍ ព្រមទាំងអាជីវករដែលមានមុខរបរពាក់ព័ន្ធ និងវិស័យសិល្បៈវប្បធម៌ ឲ្យផ្អាកទទួលយកតារាសម្តែងសិចស៊ីរូបនេះចូលរួមសម្ដែង។
មូលហេតុ ដែលធ្វើឱ្យអតីតតារាសិចស៊ីរូបនេះត្រូវរងនូវការព្រមាននិងចេញបម្រាមពីក្រសួងវប្បធម៌ព្រោះតែអតីតតារាសម្ដែងរូបនេះតែងតែបន្ដការប្រើប្រាស់សម្លៀកបំពាក់ និងឥរិយាបថ ដែលធ្វើឲ្យប៉ះពាល់ ដល់ទំនៀមទម្លាប់ ប្រពៃណីដ៏ល្អផូរផង់របស់ជាតិ តាមរយៈការថតបង្ហាញនៅក្នុងខ្សែភាពយន្ដ បណ្ដាញសារព័ត៌មាន ដោយប្រើរូបភាពសិចស៊ីនិងស្រើបស្រាលជ្រុលខ្លាំង។
សេង សូណា ជួបទុក្ខជីវិតខ្សត់ខ្សោយព្រោះតែក្រោយពីរងបម្រាម ការព្រមានឱ្យកែប្រែខ្លួនរួចមក មិនមានផលិតកម្មឬក្រុមហ៊ុនណាហៅតារាស្រីរូបនេះថតទៀតទេ មិនថាជាការថត វីដេអូឃ្លីប ថតសំអាង ខារ៉ាអូខេ រឿងឬកម្មវិធីផ្សេងៗនោះឡើយ និយាយរួមរយៈពេល២ឆ្នាំពេញដែល សេង សូណា មានតែចំណាយតែគ្មានចំណូល។
ចំណែករឿងដែលមានលេចឮថាកញ្ញាចាញ់បោកប្រុសឈ្មោលនិងលេងល្បែង ស៊ីសងនោះ ទើបធ្លាប់ខ្លួននោះតារាស្រីរូបនេះលើកឡើងថាមិនមែនជាការពិតនោះទេ។
សេង សូណា ដែលបច្ចុប្បន្នមិនមានផ្ទះសម្បែងផ្ទាល់ខ្លួនហើយជួលផ្ទះគេនៅរហូតសង្ឃឹមថានឹងមានសប្បុរសជនអាណិតអាសូរហើយជួយផ្ដល់ជាជម្រកតូចមួយសម្រាប់ឱ្យរូបខ្លួនបានជ្រកកោន៕
