ទីបំផុតពានរង្វាន់បាល់ទាត់ក្នុងសាល FIFA Futsal World Cup កំពុងតែរៀបចំនៅប្រទេសលីទុយអានី ក្នុងទ្វីបអឺរ៉ុប បានរកឃើញក្រុមខ្លាំងជាងគេចំនួន២ក្រុម គឺក្រុមជើងឯកទ្វីបអឺរ៉ុបព័រទុយហ្គាល់ មានឈ្មោះឡើងទៅប្រកួតផ្ដាច់ព្រ័ត្រជាមួយក្រុមអាហ្សង់ទីន ដែលជាក្រុមជើងឯកប្រចាំទ្វីបអាមេរិកខាងត្បូង។
លទ្ធផលវគ្គពាក់កណ្ដាលផ្ដាច់ព្រ័ត្រ៖
២៩ កញ្ញា ២០២១៖ ប្រេស៊ីល ១-២ អាហ្សង់ទីន
៣០ កញ្ញា ២០២១៖ ព័រទុយហ្គាល់ ២-២ (៤-៣) កាហ្សាក់ស្ថាន
តាមគម្រោងការប្រកួតចុងក្រោយនឹងធ្វើឡើងនៅថ្ងៃទី៣ តុលា ឆ្នាំ២០២១ ដូចគ្នានៅកីឡដ្ឋាន Žalgiris Arena ក្នុងទីក្រុងKaunasដោយក្នុងនោះ៖
ជើងឯក៖អាហ្សង់ទីន ប៉ះ ព័រទុយហ្គាល់
លេខ៣៖ ប្រេស៊ីល ប៉ះ កាហ្សាក់ស្ថាន
ពានរង្វាន់ហ្វូតសាលជើងឯកពិភពលោក 2021 FIFA Futsal World Cup នៅប្រទេសលីទុយអានី ចាប់ពីថ្ងៃទី១២ ខែកញ្ញា ដល់៣ ខែតុលា ឆ្នាំ២០២១ ដោយមានប្រទេស២៤ចូលរួមមកពីតាមទ្វីបនីមួយៗ។ កីឡាករ Ferrão របស់ប្រេស៊ីល រកបានគ្រាប់បាល់ច្រើនជាងគេគឺ៨គ្រាប់ម្នាក់ឯង។
គិតត្រឹមពេលនេះពានរង្វាន់ FIFA Futsal World Cup បង្កើតឡើងបាន៩លើកហើយ គិតចាប់តាំងពីឆ្នាំ១៩៨៩ មកដោយរៀបចំរាល់៤ឆ្នាំម្តង ខណៈក្រុមប្រេស៊ីល ឈ្នះជើងកបាន៥ដង អេស្ប៉ាញ ឈ្នះ២ដង និងអាហ្សង់ទីន ឈ្នះ១ដង និងការឈ្នះចុងក្រោយដែលរៀបចំនៅឆ្នាំ២០១៦ ក្នុងប្រទេសកូឡុំប៊ី។
ចំណែកក្រុមបាល់ទាត់ហ្វូតសាលជម្រើសជាតិ៥ប្រទេស តំណាងឱ្យទ្វីបអាស៊ី ដូចជា ជប៉ុន អ៊ីរ៉ង់ អ៊ូបេគីស្ថាន ថៃ និងវៀតណាម បានធ្លាក់ចេញអស់ហើយ៕